Jeremiya 46:1-28
46 Yahova adauza mprofeta Jeremiya mafala yakulewa bza mitundu ya wanthu,
2 yakulewa bza Edjipito na yakulewambo bza acikunda wa Farawo Neko, mambo wa ku Edjipito, omwe akhali pafupi na mkulo wa Eufrate ku Karikemisi, pomwe Nabukadinazori* mambo wa ku Babiloniya adakundidwa mu gole lacinai la utongi bwa Jewoyakimu mwana wa Djosiya, mambo wa Djuda. Iye adalewa kuti:
3 “Konzekerani bzakukhotcera bzanu, bzikulu-bzikulu na bzing’ono-bzing’ono,*Ndipo ndokoni ku nkhondo.
4 Imwe anyakupakira makavalo,
Konzekerani makavalo ndipo yapakireni, konzekerani ndipo bvalani makapaseti.
Nozani madipa yanu ndipo bvalani bzakubvala bzanu bza nkhondo.
5 ‘Thangwe ranyi ndikuwawona kuti ana mantha?
Iwo akubwerera ndipo anyankhondo wawo akundidwa.
Iwo ana mantha ndipo anyankhondo wawo akunyang’anisa lini m’mbuyo.
Kuli-kwentse wanthu akugopa,’ walewa tenepo Yahova.
6 ‘Nyakuthamanga akutazira kuthawa ndipo anyankhondo akutazirambo kuthawa.
Ku norte pafupi na ng’ambu ya mkulo wa Eufrate,Iwo akukhukhumudwa ndipo akugwa.’
7 Kodi mbani omwe akubwera ninga mkulo wa Nilo,Ninga mikulo yomwe ina madzi yamphanvu?
8 Edjipito ndiye omwe akubwera ninga mkulo wa Nilo,Ninga mikulo yomwe ina madzi yamphanvu,Ndipo akulewa kuti: ‘Ndiniyenda ndipo nin’kamiza dziko lentse.
Nin’kapfudza mzinda na wanthu omwe akukhala m’mwemo.’
9 Imwe makavalo, ndokoni!
Imwe ngolo za nkhondo, thamangani kwene-kwene!
Acikunda mbaathamange,Wanthu wa ku Kuxe na Puti omwe ambaphatisa basa bzakukhotcera,Na Ludimu omwe ambakonza uta ndipo ambaphatisambo basa misewe.
10 “Ntsikuyi nja Yahova wa anyankhondo Mbuya Mkululetu, ni ntsiku yace yakubwezera anyamadulanthaka wace. Xipada in’dzapha icikhuta na kumalisa nyota na mulopa wawo, pakuti Yahova wa anyankhondo, Mbuya Mkululetu, wakonzekera ntsembe* ku dziko la ku norte, pafupi na mkulo wa Eufrate.
11 Iwe dende la ku Edjipito,Ndoko ku Jiliyadi ndipo ukanyang’ane balsamo.
Mankhwala yako yentse yan’phata lini basa,Pakuti iwepo un’limba lini.
12 Wanthu wa mitundu inango abva bza kunyozedwa kwako,Ndipo kudandaula kwako kwadzala m’dziko.
Pakuti nyankhondo akukhukhumudwisa nyankhondo mwanzace,Ndipo wentse akugwa.”
13 Pakulewa bza kubwera kwa Nabukadinazori* mambo wa ku Babiloniya kuti adzamenyane na dziko la Edjipito, Yahova adauza mprofeta Jeremiya kuti:
14 “Dziwisani ku Edjipito ndipo dziwisanimbo ku Migidoli.
Dziwisani ku Nofi* na ku Tapanesi.
Auzeni kuti: ‘Khalani m’mbuto zanu ndipo konzekerani,Pakuti xipada in’dzapfudza wanthu wentse omwe ali m’mbali mwanu.
15 Thangwe ranyi wanthu wanu wamphanvu apfudzidwa?
Iwo alibe kukhala wakulimba,Thangwe Yahova awakunda.
16 Iwo akukhukhumudwa ndipo akugwa azinji kwene-kwene.
Akuuzana kuti:
“Mbatiyendeni, mbatibwerereni tsapanopapa kuna wanthu wathu na ku dziko lathuThangwe iye akuphatisa basa xipada yomwe ikupha wanthu azinji.”’
17 Kumweko iwo ambalewa kuti:‘Farawo mambo wa ku Edjipito akulewalewa kwene-kwene, koma akucita lini cinthu.Iye waluza mwayi.’*
18 Mambo omwe dzina lace ni Yahova wa anyankhondo, walewa kuti: ‘Pana Mulungu wamoyo,Iye* an’dzabwera ninga Tabori omwe ambakhala pakati pa mapiriNinga Karmelo omwe ambakhala pafupi na nyanza.
19 Konzekera mitolo yako kuti uyende ku ukapolo,Iwe mwana wacikazi omwe umbakhala ku Edjipito;
Pakuti Nofi* an’dzakhala cinthu cakupasa mantha,An’dzatenthedwa na moto* acisiidwa wakusaya munthu ali-wentse.
20 Edjipito ali ninga ng’ombe ikazi yakudeka,Koma mbudu zakucokera ku norte zin’dzabwera kudzamuluma.
21 Anyankhondo wace omwe akucita ganya, ali ninga mphulu zakunenepa pakati pawo,Tsono iwo azungunuka acithawambo.
Iwo alibe kupitiriza kukhala wakulimba,Pakuti yafika ntsiku ya tsoka lawo,Nthawe ya kulangidwa kwawo.’
22 ‘Muwira wace uli ninga wa nyoka yomwe ikuthawa,Pakuti iwo akubwera kwa iye na mphanvu na mbadzo,Ninga wanthu omwe akugwesa miti.*
23 Iwo an’dzagwesa miti yace yentse ya m’thengo, napo iciwoneka kuti njakugudira,’ walewa tenepo Yahova.
‘Pakuti iwo mbaazinji kwene-kwene kuposa bziwala ndipo mbakusaya kulewengeka.
24 Mwana wacikazi wa ku Edjipito an’dzapasidwa manyazi.
Iye an’dzaperekedwa m’manja mwa wanthu wa ku norte.’
25 “Yahova wa anyankhondo, Mulungu wa Jirayeri walewa kuti: ‘Tsapano ndiniikha makumbukidwe yangu kwa Amoni wa ku No,* kwa Farawo, kwa Edjipito, kwa mirungu yace na kwa amambo wace, inde kwa Farawo na kwa wanthu wentse omwe ambamuthemba.’
26 “‘Nin’dzawapereka m’manja mwa wale omwe akuwanyang’ana kuti awaphe, kwa Nabukadinazori* mambo wa ku Babiloniya na kwa acikunda wace. Patsogolo pace, dziko la Edjipito lin’dzakhalidwa pomwe na wanthu ninga momwe bzikhaliri pakuyamba,’ walewa tenepo Yahova.
27 ‘Tsono iwe mtumiki wangu Djakobo, leka kugopa,Ndipo leka kucita mantha, iwe Jirayeri.
Pakuti ine nin’dzakupulumusa kucokera kutaliNdipo dzinza lako nin’dzalipulumusa kucokera ku dziko la ukapolo.
Djakobo an’dzabwerera ndipo an’dzakhala mwakukhotcerereka na mwa mtendere,Ndipo palibe omwe an’dzamugopswa.
28 Yahova walewa kuti: ‘Leka kucita mantha iwe mtumiki wangu Djakobo, pakuti ine ndinawe.
Nin’dzapfudza mitundu yentse ya wanthu ya komwe ndidakubalalisira,Tsono iwepo nin’dzakupfudza lini.
Nin’dzakulanga* mwakuthemera,Ndipo nin’dzakusiya lini tenepo ne kukulanga.’”
Mafala ya m'nyantsi
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Bzimwebzi ni bzakukhotcera bzing’ono-bzing’ono bzomwe kawiri-kawiri bzikhanyamulidwa na anyakuthusa uta.
^ Ayai, “kupha.”
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Ayai, “Mefi.”
^ Mafala yace caiyo: “nthawe.”
^ Omwe ni nyakukunda wa Edjipito.
^ Ayai, “Mefi.”
^ Ayai pinango, “an’dzakhala matere.”
^ Ayai, “akunyang’ana nkhuni.”
^ Omwe ni Tebe.
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Ayai, “nin’dzakulungamiza.”
