Jeremiya 48:1-47
-
Profesiya yakulewa bza kulangidwa kwa Mowabe (1-47)
48 Pakulewa bza Mowabe, Yahova wa anyankhondo, Mulungu wa Jirayeri walewa kuti:
“Tsoka mzinda wa Nebo pakuti wapfudzidwa,
Kiriyataimu wapasidwa manyazi ndipo wakundidwa.
Mbuto yakuthawira yakukhotcerereka* yapasidwa manyazi ndipo yagwatika-gwatika.
2 Iwo akutumbiza lini pomwe Mowabe.
Ku Hesiboni iwo apangana kuti apfudze Mowabe mwakulewa kuti:
‘Bwerani, mbatipfudzeni mtundu umweyu.’
Iwembo Madimeni, pitiriza kukhala udanyamala,Thangwe xipada ikukutewera.
3 Ku Horonaimu kukubveka kulira kwa wanthu thangwe mzindayo wapfudzidwa,Ndipo kupfudzidwako n’kukulu kwene-kwene.
4 Mowabe wamala kupfudzidwa
Ndipo wana wace akulira.
5 Wanthu akulira ne kunyamala pomwe akufamba mu mseu wakuyenda ku Luhiti.
Ndipo pa phompho la Horonaimu iwo akubva wanthu akulira thangwe ra kupfudzidwako.
6 Thawani, pulumusani moyo wanu!
Khalani ninga muti wa junípero* omwe uli m’dambo.
7 Pakuti wathemba mabasa yako na cuma cako,Iwepo un’dzapfudzidwambo.
Ndipo Kemosi an’dzayendesedwa ku ukapoloPabodzi na antsembe na nduna zace.
8 Nyakupfudza an’dzapita m’mizinda yentse,Ndipo palibe mzinda omwe un’dzapulumuka.
Cigwa cin’dzapfudzidwa,*Ndipo gowa lin’dzapfudzidwambo ninga momwe Yahova walewera.
9 Ikhani cizindikiro Mowabe,Thangwe iye akadzakhala matere, an’dzathawa,Mizinda yace in’dzakhala cinthu cakupasa mantha,Ndipo in’dzakhalidwa lini na wanthu.
10 Tsoka kwa ule omwe akucita lini basa lomwe Yahova adamupasa na nyongo!
Tsoka kwa ule omwe akuzeza kuphatisa basa xipada kuti aphe wanthu.
11 Wanthu wa ku Mowabe ali phee kucokera pa utswaka bwawo,Ninga vinyu yomwe iribe kubvundulidwa.
Iwo alibe kutsanulidwa kucokera mu combo cinango kuti aikhidwe m’combo cinango,Ndipo alibe kuyendesedwa ku ukapolo.
Ndipopa goso lawo likanati kumala,Ndipo mnuntci wawo ulibe kucinja.
12 “Yahova walewa kuti: ‘Zikufika ntsiku zomwe nin’dzawatumizira amuna omwe an’dzawakhuthula. Iwo an’dzawakhuthula, bzombo bzawo an’dzabzisiya bziribe bzinthu ndipo an’dzaswa mitsuko yawo mikulu-mikulu.
13 Ndipo wanthu wa ku Mowabe an’dzacita manyazi na mulungu wawo Kemosi, ninga momwe wanthu wa m’nyumba ya Jirayeri akucitira manyazi thangwe ra bzomwe iwo adacita ku Beteli, mbuto yomwe iwo akhaikhulupira.
14 Thangwe ranyi mukukhwimika mucilewa kuti: “Ndife acikunda wamphanvu, takonzeka kumenya nkhondo”?’
15 ‘Mowabe wamala kupfudzidwa,Mizinda yace yamalambo kupfudzidwa,Maswaka yace yabwino yamala kuphedwa,’
Walewa tenepo Mambo, omwe dzina lace ni Yahova wa anyankhondo.
16 Tsoka la wanthu wa ku Mowabe likufika,Ndipo kupfudzidwa kwawo kukufika mwakamfulumize.
17 Imwe wanthu wentse, azivizinyu wawo,Na wanthu wentse omwe mumbadziwa dzina lawo, abvereni ntsisi.
Auzeni kuti: ‘Kodi bzakwanisika tani kuti mtcamu wamphanvu na mpsimbo yakudeka igwatike?’
18 Buluka pa mbuto yako ya ulemerero,Ndipo khala pantsi uko una nyota,* iwe mwana wacikazi omwe umbakhala ku Diboni,Pakuti nyakupfudza wa Mowabe akubwerera iwepo,Ndipo an’dzapfudza mbuto zako zakukhotcerereka.
19 Ima m’mphepete mwa mseu kuti uwone anyakukhala ku Aroweri.
Bvunza mwamuna na mkazi omwe akuthawa kuti: ‘Kodi n’ciyani cacitika?’
20 Mowabe wapasidwa manyazi ndipo akugopa.
Lirani na kudandaula,
Dziwisani ku Arinoni kuti Mowabe wapfudzidwa.
21 “Kutongedwa kwafika ku cigwa,* ku Holoni, ku Jahazi na ku Mefata;
22 ku Diboni, ku Nebo na ku Beti-diblataimu;
23 ku Kiriyataimu, ku Beti-gamuli na ku Beti-meoni;
24 ku Keriyoti, ku Bozira na ku mizinda yentse ya ku dziko la Mowabe, yakutali na yapafupi.
25 ‘Mphanvu za* Mowabe zamala,Boko lace latcoka,’ walewa tenepo Yahova.
26 ‘Muledzereseni, pakuti iye wabzikuza yekha pamaso pa Yahova.
Mowabe akubvunvulika pa masanzi yace,Tenepo iye wakhala cinthu cakusinjiriridwa.
27 Kodi Jirayeri akhali lini cinthu cakuthemera kusinjiriridwa kwa imwepo?
Kodi iye wagumanidwa kale ninga mbava,Kuti mukwetedze msolo na kumulewa kuipa?
28 Imwe anyakukhala m’dziko la Mowabe, cokani m’mizinda mucikakhala m’mphako.Ndipo khalani ninga njiwa yomwe imbakonza citsa* cace m’mbali mwa mphako.’”
29 “Tabva bza kubzikuza kwa Mowabe, iye ngwakubzikuza kwene-kwene.Tabva bza kusamwa kwace, kubzikuza kwace, kubzitumbiza kwace na kusamwa kwace mu mtima.”
30 “Yahova walewa kuti: ‘Ine ndikudziwa ukali bwawo,Tsono mafala yawo yakusaya basa yan’dzathandiza lini.
Iwo an’dzacita lini cinthu.
31 Ndipopa nin’dzalira thangwe ra Mowabe,Nin’dzadandaula thangwe ra wanthu wentse wa ku Mowabe,Ndipo nin’dzalira thangwe ra wanthu wa ku Kiri-heresi.
32 Nin’dzakulira kuposa Jazeri,Iwe munda wa uva wa Sibima, nin’dzakulira,
Mthambi zako zakupswipirira bwino zamoga nyanza,
Zafuthuka mpaka ku nyanza, mpaka ku Jazeri.
Nyakupfudza wabwera kudzapfudza bzisapo bzako bza m’cirimo,Na uva bomwe wabvuna.
33 Kukondwa na kukuwa kwakukomedwa kwamala m’munda mwa bzisapoNa ku dziko la Mowabe.
Ndacitisa kuti vinyu iume mwakupondera uva.
Pan’dzawoneka lini munthu wakukomedwa pakuponda-ponda uva.
Kun’dzabveka kukuwa, koma sikuti kwakukomedwa.’”
34 “‘Kukubveka kukuwa kucokera ku Hesiboni mpaka ku Eleyale.
Iwo akukuwa mpaka kubveka ku Jahazi,Kucokera ku Zoari kukafika ku Horonaimu mpaka ku Eglati-selisiya.
Napo madzi ya mu Nimirimu yan’dzaphwa.
35 Yahova walewa kuti: ‘Nin’dzacitisa kuti wanthu anyembereke ku Mowabe,Wale omwe ambapereka ntsembe pa mbuto zapadzulu,Na wale omwe ambapereka ntsembe kwa mulungu wawo.
36 Ndipopa mtima wangu un’dzalira ninga citoliro* thangwe ra Mowabe,Ndipo mtima wangu un’dzalira ninga citoliro* thangwe ra wanthu wa ku Kiri-heresi.
Pakuti cuma cawo comwe adagumana cin’dzamala.
37 Misolo yentse yasengedwa mipala,Ndipo ndebvu zentse zamala kugwatidwa.
M’manja mwentse mwacekeka-cekeka,Ndipo abvala magundiri m’ciuno mwawo!’”
38 “‘Pa ntsodzi zentse za ku MowabeNa m’misika yace yentseMukundobveka kudandaula,
Pakuti ndagwata-gwata MowabeNinga mtsuko omwe umbataidwa kunja,’ walewa tenepo Yahova.
39 ‘Iye akucita mantha kwene-kwene! Lirani!
Mowabe walinza ngoto thangwe ra manyazi!
Mowabe wakhala cinthu cakuthemera kusinjiriridwa,Cinthu cakupasa mantha kwa wanthu wentse omwe ali m’mbali mwace.’”
40 “Yahova walewa kuti:
‘Onani! Ninga momwe mphungu imbapolikira kuti iphate nyama,Nyamadulanthaka an’dzafuthulira Mowabe maphaphidwe yace.
41 Mizinda in’dzakundidwa,Ndipo mbuto zawo zakukhotcerereka zin’dzatengedwa.
Pa ntsikuyo mtima wa anyankhondo wa MowabeUn’dzakhala ninga mtima wa mkazi omwe akubereka.’”
42 “‘Mowabe an’dzapfudzidwa ndipo an’dzawoneka lini pomwe ninga mtundu wa wanthu,Pakuti iye waphonyera Yahova thangwe ra kubzikuza kwace.
43 Mantha, dindi na msampha bzikukudikhirirani,Imwe wanthu wa mu mzinda wa Mowabe,’ walewa tenepo Yahova.
44 ‘Omwe an’dzathawa thangwe ra mantha, an’dzagwera m’dindi,Ndipo omwe an’dzacoka m’dindi an’dzaphatidwa na msampha.’
‘Pakuti nin’dzabweresera Mowabe gole la kulangidwa kwace,’ walewa tenepo Yahova.
45 ‘Anyakuthawa an’dzaneta, aciima pa mthunzi wa Hesiboni.
Ku Hesiboni kun’dzacoka moto,Ndipo pakati pa Sihoni pan’dzacokambo moto,
Omwe un’dzatentha mikuma ya wanthu wa ku MowabeNdipo un’dzatenthambo misolo ya anyankhondo waciwembo.’
46 ‘Tsoka iwe Mowabe!
Wanthu wa ku Kemosi apfudzidwa.
Pakuti wana wako wacimuna atengedwa aciyendesedwa ku ukapolo,Ndipo wana wako wacikazi ayenda ku ukapolo.
47 Tsono mu ntsiku zakumalizira nin’dzatsonkhanisa wanthu wa ku Mowabe omwe adayendesedwa ku ukapolo,’ walewa tenepo Yahova.
‘Kutongedwa kwa Mowabe kwamalira pano.’”
Mafala ya m'nyantsi
^ Ayai, “mbuto yakuthawira yapadzulu.”
^ Umweyu ni muti omwe udatengana na muti wa mkungudza.
^ Ayai, “Gowa lin’dzapfudzidwa.”
^ Ayai pinango, “khala pa mbuto yakuuma.”
^ Ayai, “gowa.”
^ Mafala yace caiyo: “nyanga.”
^ Ayai, “cisasira.”
^ Cimweci ni citoliro comwe cikhaimbidwa ninga cizindikiro cakulira nkhawa.
^ Cimweci ni citoliro comwe cikhaimbidwa ninga cizindikiro cakulira nkhawa.
