Jeremiya 5:1-31
5 Fambani m’miseu ya Jeruzalemu.
Onani m’mbali mwace ndipo khalani tceru.
Nyang’anani m’misika yace kuti muwonePenu mungagumane munthu omwe akucita cirungamo,Omwe akufuna kukhala wakukhulupirika,Ndipo ine nin’dzalekerera mzindayo.
2 Napo iwo acilewa kuti: “Pana Yahova Mulungu wamoyo!”
Iwo an’dzapitiriza kulumbira mwakunama.
3 Imwe Yahova, kodi maso yanu yambakomedwa lini kuwona wanthu wakukhulupirika?
Imwepo mwawalanga koma iwo alibe kubva kuwawa.
Iwo adalamba kutambira cirango, napo kuti imwepo mudapfudza azinji wa iwo.
Adaumisa nkhope zawo kuposa mwala,Ndipo adalamba kubwerera m’mbuyo.
4 Tsono ine mu mtima mwangu ndidati: “Kulewa cadidi iwo ni wanthumbo basi.
Iwo ambacita bzinthu bzakupusa thangwe ambadziwa lini bzomwe Yahova ambafuna,*Mitemo ya Mulungu wawo.
5 Nin’nyang’ana amuna wakubvekera kuti ndilewelewe nawo,Pakuti iwo an’funika kudziwa bzomwe Yahova akufuna,Mitemo ya Mulungu wawo.
Pakuti wentse agwata djoki la MulunguNa kubwedza bzingwe.”
6 Na thangwe limweri mphondolo ya m’thengo imbawaluma,Mphumphi ya m’dambo imbawadzongaNyalugwe ambabisalika pafupi na mizinda yawo.
Wentse omwe ambacoka m’mwemo ambakhadzulidwa,
Thangwe bzakuphonya bzawo mpsizinjiNdipo kusaya kukhulupirika kwako n’kukulu.
7 Kodi ningakulekerere tani na bzinthu bzimwebzi?
Wana wako andisiya,Ndipo ambalumbirira cinthu comwe ni Mulungu lini.
Napo ndikhawapasa bzomwe iwo akhafunikira,Iwo akhapitiriza kucita upombo,Ndipo akhayenda ninga thimu pa nyumba ya puta.
8 Iwo ali ninga makavalo yomwe yadzalidwa na kalanga,Ali-wentse akusirira kwene-kwene mkazi wa mwenekaciro.
9 “Kodi ndikhafunika lini kuwalanga thangwe ra bzinthu bzimwebzi?
Kodi mtundu umweyu ndikhafunika lini kuubwezera?” walewa tenepo Yahova.
10 “Ndokoni ku minda ya uva ya ku Jeruzalemu kuti mukaipfudze,Tsono lekani kukaipfudza muciimaliziratu.
Katcoleni mthambi zomwe zikuphukira,Thangwe ni za Yahova lini.
11 Pakuti nyumba ya Jirayeri na nyumba ya DjudaIdandicitira bzinthu mwacinyengo kwene-kwene,” walewa tenepo Yahova.
12 “Iwo alamba Yahova ndipo akulewa kuti:‘Iye an’dzacita lini cinthu.*
Palibe tsoka lomwe lin’dzaticitikira;Tin’dzawona lini nkhondo ne njala.’
13 Ndipo aprofeta akulewa mafala yakusaya basa,Mu mtima mwawo mulibe mafala ya Mulungu.
Iwo an’dzakhalambo wakusaya basa ninga momwe mafala yawo yaliri.”
14 Na tenepo, Yahova Mulungu wa anyankhondo walewa kuti:
“Pakuti amunawa akulewa bzimwebzi,Nin’dzacitisa mafala yangu kukhala ninga moto pamulomo pako.*Wanthuwa an’dzakhala ninga nkhuni,Ndipo kulewa cadidi motoyo un’dzawatentha.”
15 Yahova walewa kuti: “Imwe wa m’nyumba ya Jirayeri, ndikukubwereserani mtundu wa wanthu kucokera kutali.
Ni mtundu wa wanthu omwe ulipo kale,
Mtundu omwe ulipo kuyambira kale-kale,Mtundu wa wanthu omwe cirewedwe cawo umbacidziwa liniNdipo mafala yawo ungayabvesese lini.
16 Budu* lawo liri ninga thenje lakufunguka;Wentsenewo ni acikunda.
17 An’dzadya cakudya cako na bzinthu bzomwe un’dzabvuna,
An’dzapha wana wako wacimuna na wana wako wacikazi.
An’dzapha ng’ombe zako na mabira yako.
An’dzagwata miti yako ya uva na miti yako ya nkhuyu.
An’dzapha na xipada wanthu wa mizinda yako yakuzunguliridwa na mimuro yakulimba yomwe iwepo umbaithemba.”
18 Yahova walewa kuti: “Napo pa nthawe imweyo, nin’dzakupfudzaniretu lini mwentse.
19 Ndipo akadzabvunza kuti: ‘Thangwe ranyi Yahova Mulungu wathu waticitira bzentsenebzi?’ Udzawatawire kuti: ‘Ninga momwe mwandisiira kuti mutumikire mulungu wacirendo m’dziko lanu cairo, mun’dzatumikirambo wanthu wacirendo m’dziko lomwe ndanu lini.’”
20 Uzani nyumba ya DjakoboNdipo dziwisani bzimwebzi mu Djuda kuti:
21 “Tetekerani ibzi, imwe wanthu wakupusa na wakusaya nzeru:
Iwo ana maso koma ambawona lini;Ndipo ana makutu koma ambabva lini.
22 Yahova walewa kuti: ‘Kodi imwepo mukundigopa lini?Kodi mukhafunika lini kutetemera pamaso pangu?
Ndine omwe ndidaikha mcenga kuti ukhale malire ya nyanza,Lamulo lomwe lin’dzakhala mpaka kale-kale lomwe nyanzayo in’funika lini kulipitirira.
Napo mabimbi yawande, iyo yan’kwanisa lini kumoga malireyo;Napo iyo yacilirima yan’kwanisa lini basi kumoga malireyo.
23 Tsono wanthuwa aumisa mtima wawo acindipandukira;Iwo andipandukira acitewera njira yawo.
24 Iwo ambalewa lini mu mtima mwawo kuti:
“Mbatigopeni Yahova Mulungu wathu,Ule omwe ambabvumbisa nvula pa nthawe yace,Mvula ya mainza na cirimo,Ule omwe ambawonesesa kuti tikhale na nthawe yakubvuna.”
25 Bzakuphonya bzanu caibzo bzacitisa kuti bzimwebzi bzitazike;Pikado zanu caizo zakumanisani bzinthu bzabwino.
26 Pakuti pakati pa wanthu wangu pana wanthu wakuipa.
Iwo ambapitiriza kubisalika ninga momwe asodzi wa mbalame ambacitira.
Ambakonza misampha yakupha.
Iwo ambaphata wanthu.
27 Ninga gayola yakudzala na mbalameNyumba zawo zidadzala na cinyengo.
Ndipopa iwo akhala wamphanvu na wakudala.
28 Iwo anenepa ndipo khanda lawo lanyalala;Adzala acitaikira na uipi.
Kuti bzinthu bziwafambire bwino,Iwo ambakhotcerera lini nkhungwa,Ndipo ambalamba kucitira cirungamo anyakusauka.’”
29 Yahova walewa kuti: “Kodi ndikhafunika lini kuwalanga thangwe ra bzinthu bzimwebzi?
Kodi mtundu umweyu ndikhafunika lini kuubwezera?
30 M’dzikoli mukucitika cinthu cakudabwisa na cakugopswa:
31 Aprofeta akulewa maprofesiya yakunama,Antsembe akuboneresa wanthu na udindo bwawo.
Ndipo wanthu wangu caiwo akukomedwa na bzimwebzi.
Tsono n’ciyani comwe imwepo mun’dzacita cimaliziro cikadzafika?”
Mafala ya m'nyantsi
^ Mafala yace caiyo: “ambadziwa lini njira za Yahova.”
^ Ayai pinango, “Iye kulibe.”
^ Omwe ni mulomo wa Jeremiya.
^ Limweri ni budu lakunyamulira misewe.
