Jeremiya 50:1-46
50 Pakulewa bza Babiloniya na bza dziko la Akalideya, Yahova adauza mprofeta Jeremiya kuti:
2 “Lewani ndipo dziwisani pakati pa mitundu ya wanthu,
Lamusani cizindikiro* ndipo dziwisani.
Lekani kubisa cinthu!
Lewani kuti: ‘Babiloniya wakundidwa.
Beli wapasidwa manyazi.
Merodaki wacita mantha.
Bzifanikiso bzace bzapasidwa manyazi.
Ndipo bzifanikiso bzace bzakunyantsa* bzacita mantha.’
3 Pakuti mtundu wa wanthu wakucokera ku norte wabwera kudzamenyana naye,
Ndipo wacitisa dziko lace kukhala cinthu cakupasa mantha;Palibe munthu omwe ambakhala pomwe kumweko.
Wanthu na bzirombo kubodzi bzathawa;Bzentse bzathawira kutali.”
4 Yahova walewa kuti: “Mu ntsiku zimwezo na pa nthawe imweyo, Ajirayeri na Adjuda an’dzabwera pabodzi. An’dzalira pomwe akufamba ndipo wentse an’dzanyang’ana Yahova, Mulungu wawo.
5 Iwo an’dzabvunza njira yakuyenda ku Ziyoni, ndipo an’dzazungunukira mbali imweyo acilewa kuti: ‘Bwerani, mbatikhaleni pa mbverano na Yahova pa mpangano wakusaya kumala omwe un’dzayebweka lini.’
6 Wanthu wangu akhala thimu la mabira yakutaika. Amakabusa wawo caiwo acitisa kuti mabirayo yataike. Ayenda nayo m’mapiri, azunga-zunga nayo m’mapirimo na m’tumapiri tung’ono-tung’ono. Tenepo mabirayo yayebwa mbuto yawo yakupumira.
7 Wentse omwe akugumana nawo, akuwapha ndipo anyamadulanthaka wawo akulewa kuti: ‘Ifepano tiribe mulandu, thangwe iwo aphonyera Yahova, omwe ni mbuto yakulungama, aphonyera Yahova, omwe ni cidikhiro ca makolo yawo yakale.’”
8 “Thawani mu Babiloniya,Cokani mu dziko la Akalideya,Ndipo khalani ninga bvululume omwe ambatsogolera thimu la mabira.
9 Ine nin’dzacitisa kuti thimu likulu la wanthu wa ku dziko la ku norteLibwere kudzamenyana na Babiloniya,
Omwe akubwera wakukonzeka kuti adzamenye nkhondo.Iye an’dzakundidwira kumweko.
Misewe yawo iri ninga ya mcikunda,Ya wanthu wamphanvu omwe akupha wanaNdipo akubwerera lini ne kucita ciri-centse.
10 Akalideya an’dzapambidwa.
Ndipo wentse omwe an’dzawapambawo an’dzakomedwa,” walewa tenepo Yahova.
11 “Pakuti imwepo mukhakondwa na kukomedwaPomwe mukhanditengera utaka.
Mukhamoga-moga ninga kamphulu komwe kali m’mauswa yakupswipirira bwino,Mucimbalira ninga makavalo yacimuna.
12 Mai wako adapasidwa manyazi,
Ule omwe adakubereka adasunama.
Iye ngwakusaya kufunika pakati pa wanthu wa mitundu inango,Ndipo ni dambo lakuuma.
13 Thangwe ra kusaya kukomedwa kwa Yahova, iye an’dzakhalidwa lini na wanthu,Iye an’dzakhala matere.
Wentse omwe an’dzapita na mu mzinda wa Babiloniya an’dzamunyang’anisa na mantha,Ndipo an’dzaliza muluzi thangwe ra matsoka yace yentse.
14 Mwentse omwe mumbakonza mauta,Bwerani wakukonzeka kuti mudzamenyane na Babiloniya kucokera m’mbali zentse.
Muthusireni misewe ndipo lekani kuikoya,Thangwe iye waphonyera Yahova.
15 Mukuwireni ciwowo ca nkhondo kucokera m’mbali zentse.
Iye wabvuma kuti wakundidwa.*
Mapilare yace yagwa, ndipo mimuro yace yagumulidwa,Pakuti ni Yahova omwe akumubwezera.
Imwembo mubwezereni.
Mucitireni bzomwe iye adakucitirani.
16 Pfudzani mu Babiloniya nyakubzalaNa ule omwe akuphatisa basa djeko pa nthawe yakubvuna.
Thangwe akucita mantha na xipada yakugopswa, ali-wentse an’dzabwerera kuna wanthu wace,Ndipo ali-wentse an’dzathawira ku dziko lace.
17 “Wanthu wa Jirayeri ali ninga mabira yakutaika. Mphondolo ndizo zomwe zidawabalalisa. Pakuyamba mambo wa Asiriya adawapfudza, patsogolo pace Nabukadinazori* mambo wa Babiloniya, adawanyenyena mafupa.
18 Yahova wa anyankhondo, Mulungu wa Jirayeri walewa kuti: ‘Nin’dzalanga mambo wa Babiloniya pabodzi na dziko lace ninga momwe ndidalangira mambo wa Asiriya.
19 Ndipo nin’dzabweresa Jirayeri ku mbuto yace yakudyesera bzifuwo, iye an’dzausira bzifuwo bzace ku Karmelo na ku Basani. An’dzakhuta m’mapiri ya Efraimu na Jiliyadi.’”
20 Yahova walewa kuti: “Mu ntsiku zimwezo na pa nthawe imweyo,Bzakuphonya bza Jirayeri bzin’dzanyang’anidwa,Koma bzin’dzawoneka liniNdipo pikado za Djuda zin’dzagumanika lini,Pakuti nin’dzalekerera wale omwe ndawasiya na moyo.”
21 Yahova walewa kuti: “Ndoko ukamenyane na dziko la Merataimu na anyakukhala ku Pekodi.
Iwo aphedwe acipfudzidwiratu.
Cita bzentse bzomwe ndakuuza.
22 M’dziko limweri kukubveka ciwowo ca nkhondoNa kukundidwa kukulu.
23 Martelo omwe akhapfudza wanthu pa dziko lentse la pantsi wagwatidwa-gwatidwa na kutcoledwa.
Ndipo Babiloniya wakhala cinthu cakupasa mantha pakati pa mitundu ya wanthu.
24 Iwe Babiloniya, ndakuteyera msampha,Ndipo waphatidwa ne kudziwa.
Wagumanidwa uciphatidwa,Thangwe ukhanesana na Yahova.
25 Yahova wafungula mbuto yomwe ambakoyera bzifuzo bzace bza nkhondo,Ndipo akucosa kunja bzifuzo bza nkhondo bzomwe ambaphatisa basa pakulatiza ukali bwace.
Pakuti Yahova wa anyankhondo, Mbuya Mkululetu, ana basa lakuti aciteM’dziko la Akalideya.
26 Bwerani mudzamenyane naye kucokera ku mbuto zakutali.
Fungulani magwangwa yace.
Bzinthu bzace bzomwe akhadapamba bzigwezekeni ninga midu ya tirigu,
Mupfudzeniletu
Ndipo paleke kuwoneka munthu wakusala.
27 Phani wentse omwe ali ninga tumikono tung’ono-zing’ono;Iwo an’funika kuyenda kukaphedwa.
Tsoka kwa iwo pakuti ntsiku yawo yafika,Nthawe ya kulangidwa kwawo!
28 Kukubveka fala la wanthu omwe akuthawa,Omwe akupulumuka ku dziko la Babiloniya,Kuti adziwise ku Ziyoni bza kubwezera kwa Yahova Mulungu wathu,Akuwabwezera thangwe ra templo yace.
29 Cemerani anyakuthusa misewe na anyakukonza mautaKuti adzamenyane na Babiloniya.
Muzungulire mbali zentse kuti paleke kuwoneka munthu wakuthawa.
Mubwezereni mwakubverana na bzicito bzace,
Muciteni bzinthu ninga momwe iye adacitira.
Thangwe iye wacita bzinthu mwakubzikuza pamaso pa Yahova,Na kwa wakucena wa Jirayeri.
30 Ndipopa maswaka yace yan’dzaphedwa* m’misika,Ndipo acikunda wace an’dzaphedwa pa ntsiku imweyi,” walewa tenepo Yahova.
31 Yahova wa anyankhondo, Mbuya Mkululetu walewa kuti: “Ona! Ine ndine nyamadulanthaka wako, iwe nyakubzikuza,Pakuti ntsiku yako in’dzafika, nthawe yomwe nin’dzakulanga.
32 Iwe nyakubzikuza, un’dzakhukhumudwa ucigwa,Ndipo pan’dzawoneka lini munthu wakukumusa.
Nin’dzatentha na moto mizinda yako,Ndipo motoyo un’dzatentha bzentse m’mbali mwako.”
33 Yahova wa anyankhondo walewa kuti:
“Wanthu wa ku Jirayeri na wa ku Djuda akuponderedwa,Iwo akuikhidwa m’kawoko na wentse omwe ambawayendesa ku ukapolo.
Ndipo iwo akulamba kuwatsudzula.
34 Tsono mpulumusi wawo ngwamphanvu.
Dzina lace ni Yahova wa anyankhondo.
Iye an’dzawonesesa kuti akuwacitira cirungamo,Kuti awabweresere mtendere m’dziko lawoNa kudzonga mtendere wa wanthu omwe ambakhala ku Babiloniya.”
35 Yahova walewa kuti: “Xipada in’dzapha Akalideya,Anyakukhala ku Babiloniya, nduna zawo na adziwi wawo.
36 Xipada in’dzapha aprofeta wakunama,* ndipo iwo an’dzacita bzinthu ninga wanthu wakusaya nzeru.
Xipada in’dzapha acikunda wawo, ndipo iwo an’dzacita mantha.
37 Xipada in’dzapha makavalo yawo na kudzonga ngolo zawo za nkhondo,Ndipo in’dzaphambo wanthu wentse wakusiyana-siyana omwe ali pakati pawo,Ndipo iwo an’dzakhala ninga akazi.
Xipada in’dzapfudza cuma cawo ndipo wanthu winango an’dzacipamba.
38 Madzi yawo yadzongeka ndipo yauma.
Pakuti ni dziko la bzifanikiso bzakunyantsa,Iwo ambacita bzinthu ninga wanthu wa misala, thangwe ra masomphenya yawo yakupasa mantha.
39 Ndipopa bzirombo bza m’thengo bzin’dzakhala m’dziko limweri pabodzi na mphumphi,Ndipo nthiwatiwa zin’dzakhalambo m’mwemo.
Mun’dzakhalidwa lini pomwe na wanthu,Ndipo palibe munthu omwe an’dzakhala m’mwemo mpaka kale-kale.”
40 “Ninga momwe bzidacitikira pomwe Mulungu adapfudza Sodoma na Gomora pabodzi na mizinda yace yapafupi,” walewa tenepo Yahova, “palibe omwe an’dzakhala m’mwemo ndipo palibe munthu ali-wentse omwe an’dzakhala pomwe kumweko.
41 Onani! Wanthu akubwera kucokera ku norte;Thimu likulu la wanthu na amambo wamphanvu omwe akonzekera kumenya nkhondoKucokera ku mbuto zakutali za pa dziko la pantsi.
42 Iwo ambadziwa kuphatisa basa mauta na madipa.
Mbakuuma mtima ndipo an’dzawabvera lini ntsisi.
Baludya lawo liri ninga kuunga kwa nyanza,Akakhala akubwera adapakira pa makavalo yawo.
Iwo mbakukonzeka kumenyana nawe, iwe mwana wacikazi wa Babiloniya.
43 Mambo wa ku Babiloniya wabva mafala pakulewa bza iwo,Ndipo manja yace yatepa.
Iye wabva mantha,Ndipo akubva kuwawa ninga mkazi omwe akubereka.
44 “Onani! Kun’dzabwera munthu m’mbuto zakudyesera bzifuwo zakukhotcerereka, ninga mphondolo yomwe ikucoka m’thengo m’mphepete mwa Jordano, tsono mwadzidzidzi nin’dzacitisa kuti iye athawe aciyenda kutali na mbutoyo, ndipo nin’dzaikha pa mbutoyo mtsogoleri omwe ndamusankhula. Mbani omwe ngwakundendemerana na ine? Mbani omwe an’dzanesana nande? Kodi alipo makabusa omwe angalambe kucita bzomwe ine ndikufuna?
45 Tenepo wanthumwe, bvani bzomwe Yahova an’funa kucitira Babiloniya na bzomwe iye an’funa kucitira dziko la Akalideya.
Mwakusaya kupenukira, wana wa mabira an’dzakwekwetedwa aciyendesedwa kutali.
Iye an’dzapfudza mbuto zawo zakudyesera bzifuwo* thangwe ra iwo.
46 Dziko la pantsi lin’dzatetemera thangwe ra baludya pakukundidwa kwa Babiloniya,Ndipo pakati pa mitundu ya wanthu pan’dzabveka kulira.”
Mafala ya m'nyantsi
^ Ayai, “posto ya cizindikiro.”
^ Mu Cihebereu falali pinango lingakhale likulewa bza “ndowe” ndipo limbaphatisidwa basa ninga fala lakunyoza.
^ Mafala yace caiyo: “Iye wapereka boko lace.”
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Mafala yace caiyo: “yan’dzanyamalisidwa.”
^ Ayai, “omwe ambalewa bzinthu bzakusaya basa.”
^ Ayai, “mbuto zakukhala.”
