Jeremiya 51:1-64
51 Yahova walewa kuti:
“Nin’dzabweresa conzi camphanvuComwe cin’dzapfudza Babiloniya na anyakukhala ku Lebi-kamai.*
2 Nin’dzatumiza wanthu ku Babiloniya omwe an’dzawabalalisa,Iwo an’dzawabalalisa acisiya dzikolo lakusaya wanthu;Ndipo an’dzawazungulira m’mbali zentse pa ntsiku ya tsoka.
3 Nyakuphatisa basa uta aleke kubuphatisa basa.
Munthu aleke kulamuka uko adabvala bzakubvala bzace bza nkhondo.
Lekani kubvera ntsisi maswaka yawo.
Ndipo pfudzani anyankhondo wawo wentse.
4 Iwo an’dzaphedwa m’dziko la Akalideya,An’dzalasidwa m’miseu yawo.
5 Pakuti Ajirayeri na Adjuda ni amamsiwa lini kwa Mulungu wawo, Yahova wa anyankhondo.
Ndipo dziko lawo* ladzala na mulandu pamaso pa Nyakucena wa Jirayeri.
6 Thawani pakati pa BabiloniyaNdipo pulumusani moyo wanu,
Lekani kuphedwa thangwe ra bzakuphonya bzace.
Pakuti ino ni nthawe yakuti Yahova abwezere.
Iye an’dzamubwezera bzomwe iye adacita.
7 Babiloniya ali ninga kopo ya oro m’manja mwa Yahova;Iye waledzeresa dziko lentse.
Wanthu wa mitundu amwa vinyu yace;Ndipopa wanthu wa mitunduyo akucita bzinthu ninga anyamsala.
8 Mwadzidzidzi Babiloniya wagwa ndipo wapfudzidwa.
Lirani thangwe ra iye!
Bweresani balsamo kuti mupoze kuwawa kwace; pinango-pentse angapole.”
9 “Tayezera kupoza Babiloniya, tsono iye an’pozeka lini.
Musiyeni ndipo mbatiyendeni, ali-wentse ayende ku dziko lace.
Pakuti mulandu wace wafika mpaka kudzulu;Wakwira mpaka m’mitambo.
10 Yahova watibweresera cirungamo.
Mbatiyendeni tikadziwise ku Ziyoni mabasa ya Yahova Mulungu wathu.”
11 “Nozani misewe yanu; tengani bzakukhotcerera bzabololindo.
Yahova walimbikisa mtima wa amambo wa Amediya kuti akamenye nkhondo,Thangwe akufuna kupfudza Babiloniya.
Yahova akufuna kubwezera Babiloniya thangwe ra templo yace.
12 Ikhani cizindikiro kuti mumenyane na muro wa Babiloniya,
Thumizirani alindiri ndipo ikhani alindiri pa mbuto zawo.
Ikhani wanthu omwe aniwabisalira.
Pakuti Yahova wacita makonzedweNdipo iye an’dzakwanirisa bzomwe adapicira kucitira wanthu wa ku Babiloniya.”
13 “Iwe mkazi omwe umbakhala padzulu pa madzi mazinji,Omwe una cuma cizinji,Cimaliziro cako cafika ndipo nthawe ya phindu lako yamala.
14 Yahova wa anyankhondo walumbira m’dzina lace kuti:‘Nin’dzakudzazani na amuna azinji kwene-kwene ninga bziwala,Ndipo iwo an’dzakuwa thangwe an’dzakukundani.’
15 Iye ngule omwe adakonza dziko la pantsi na mphanvu zace,Omwe adakhazikisa dziko la pantsi lomwe limbabala bzinthu mwakuphatisa basa nzeru zaceNdipo adafuthula kudzulu mwakuphatisa basa luso lace.
16 Iye akacitisa kuti fala lace libveke,Madzi yakudzulu yambatekenyeka,Ndipo iye ambacitisa mitambo kukwira kucokera ku malire ya dziko la pantsi.
Ambacitisa mpheni kuti nvula ibvumbe,Ndipo ambacitisa mphepo kucoka ku mbuto yomwe ambaikoya.
17 Wanthu wentse ambacita bzinthu mwakusaya kukumbuka bwino na mwakusaya nzeru.
Amisiri wentse omwe ambaphata basa na simbi,* an’dzacita manyazi thangwe ra bzifanikiso bzawo bzakucita kugoba;Pakuti bzifanikiso bzawo bza simbi* mpsakusaya basa,Ndipo bziribe moyo.
18 Ibzo mpsapezi-pezi, mabasa yakuthemera kusinjiriridwa.
Ikadzafika ntsiku yakuti bzilangidwe, ibzo bzin’dzapfudzidwa.
19 Mulungu wa Djakobo ngwakusiyana na bzinthu bzimwebzi,Pakuti iye ndiye omwe adakonza bzentse,Ni mpsimbo ya utaka bwace.
Dzina lace ni Yahova wa anyankhondo.”
20 “Iwe ndiwe mtcamu wangu na cifuzo cakumenyera nkhondo,Pakuti nin’dzakuphatisa basa pakupfudza mitundu ya wanthu.
Ndipo nin’dzakuphatisa basa pakupfudza maumambo.
21 Nin’dzakuphatisa basa kuti ndigwate-gwate kavalo na nyakupakira pakavaloyo.
Nin’dzakuphatisa basa kuti ndigwate-gwate ngolo na nyakufambisa wace.
22 Nin’dzakuphatisa basa kuti ndigwate-gwate amuna na akazi.
Nin’dzakuphatisa basa kuti ndigwate-gwate nkhalamba na wana.
Ndipo nin’dzakuphatisa basa kuti ndigwate-gwate alumbwana na atsikana.
23 Nin’dzakuphatisa basa kuti ndigwate-gwate makabusa na bzifuwo bzace.
Nin’dzakuphatisa basa kuti ndigwate-gwate mulimi na bzifuwo bzace bzakulimira.
Nin’dzakuphatisa basa kuti ndigwate-gwate magovernadori na wakuimikira magovernadoriyo.
24 Nin’dzabwezera Babiloniya na wanthu wentse wakukhala ku Kalideya,Nin’dzawabwezera bzakuipa bzentse bzomwe adacita ku Ziyoni pamaso panu,” walewa tenepo Yahova.
25 “Inepano nin’kulanga iwe phiri lakupfudza,Nyakupfudza dziko lentse.
Nin’kufuthulira boko langu, ndicikucitisa kukunkhulika kucokera pa mwala mpaka pantsi.Ndipo nin’kucitisa kukhala phiri lomwe lamala kupsa,” walewa tenepo Yahova.
26 “An’dzakucosera lini mwala uli-wentse wa pakhona* ayai wa aliserse,Pakuti un’dzakhala matere mpaka kale-kale,” walewa tenepo Yahova.
27 “Lamusani cizindikiro pa dziko.
Lizani nyanga pakati pa mitundu ya wanthu.
Sankhulani mitundu ya wanthu kuti imenyane naye.
Cemeresani maumambo ya Ararati, Mini na Axikenaji kuti yadzamenyane naye.
Sankhulani mkulu wa acikunda omwe ambapitisa basa wanthu kuti adzamenyane naye.
Bweresani makavalo ninga bziwala bzing’ono-bzing’ono.
28 Sankhulani* mitundu ya wanthu kuti idzamenyane naye,Amambo wa Mediya, magovernadori yawo na aimikiri wentse wa magovernadori yawoPabodzi na madziko yentse yomwe iwo ambatonga.
29 Dziko lin’dzatekenyeka licitetemera,Pakuti bzomwe Yahova an’funa kucitira Babiloniya bzin’dzacitika,Kuti acitise dziko la Babiloniya kukhala cinthu cakupasa mantha, licisala liribe wanthu.
30 Anyankhondo wa Babiloniya aleka kumenya nkhondo.
Iwo adakhala m’mbuto zawo zakukhotcerereka.
Mphanvu zawo zamala.
Iwo akhala ninga akazi.
Nyumba zawo zatenthedwa.
Ndipo mipiringidzo yawo yatcoledwa.
31 Nyakutumidwa akuthamanga kuti akagumane na nyakutumidwa mwanzace,Mtumiki akuthamanga kuti akagumane na mtumiki mwanzace,Kuti akauze mambo wa ku Babiloniya kuti mzinda wace wakundidwa ku mbali zentse.
32 Kuti mbuto zakuyambukira mikulo zatengedwa,Kuti mabarko yakukonzedwa na nzire yatenthedwa na motoNakuti acikunda ana mantha.”
33 Yahova wa anyankhondo, Mulungu wa Jirayeri, walewa kuti:
“Mwana wacikazi wa Babiloniya ali ninga mbuwa.
Ikufika nthawe yakuti apondedwe-pondedwe mwamphanvu.
Tsapanopapa nthawe yakubvuna inimufikira.”
34 “Nabukadinazori* mambo wa ku Babiloniya wandipfudza;Iye wandiboneresa.
Wandicitisa kukhala combo cakusaya cinthu.
Ninga cinyoka cikulu iye wandikhudyula.Wadzaza mimba yace na bzinthu bzangu bzabwino.
Iye wanditaya kunja.
35 Anyakukhala ku Ziyoni alewa kuti: ‘Ciwembo comwe cidandicitikira cigwerembo Babiloniya,
Ndipo mulandu wa mulopa wangu ubwezeredwe kwa wanthu omwe ambakhala ku Kalideya, walewa tenepo Jeruzalemu.”
36 Yahova walewa kuti:
“Nin’dzakhotcerera mulandu wako,Ndipo nin’dzalanga anyamadulanthaka wako.
Nin’dzaumisa nyanza yawo na micera yawo.
37 Babiloniya an’dzakhala mudu wa minyala,Mbuto yakuthawira mphumphi,Cinthu cakupasa mantha na cakuthemera kuliziridwa muluzi,Ndipo m’mwemo mun’dzakhala lini wanthu.
38 Wentse an’dzalira ninga mphondolo,*
An’dzalira ninga wana wa mphondolo.”
39 “Akabzikuza nin’dzawakonzera phwando ndiciwaledzeresaKuti akondwe,Ndipo an’dzagona tulo mpaka kale-kale,Tulo tomwe an’dzamuka lini pomwe,” walewa tenepo Yahova.
40 “Nin’dzawapha ninga wana wa mabira omwe akuyenda kukaphedwa,Ninga mabvululume na mbuzi.”
41 “Onani! Sesaki* wakundidwa,Ule omwe akhatumbizidwa na wanthu wentse wakundidwa!
Ninga Babiloniya, wakhala cinthu cakupasa mantha pakati pa mitundu ya wanthu!
42 Nyanza yadzala icimiza Babiloniya.
Mzinda wa Babiloniya wamizidwa na mabimbi mazinji.
43 Mizinda yace yakhala cinthu cakupasa mantha, dziko lakusaya madzi na lakuuma,
Dziko lomwe palibe omwe an’dzakhala ndipo palibe munthu omwe an’dzapita na m’mwemo.
44 Nin’dzalanga Beli ku Babiloniya,Ndipo nin’dzamucosa m’mkamwa mwace comwe adakhudyula.
Mitundu ya wanthu in’dzayenda lini pomwe kwa iye,Ndipo muro wa Babiloniya un’dzagwa.
45 Cokani pakati pace wanthu wangu!
Pulumusani moyo wanu ku ukali bwakugaka moto bwa Yahova!
46 Lekani kusunama ne kucita mantha mukadzabva mafala m’dzikolo.
Mu gole libodzi mun’dzabva mafala,Ndipo mu gole linango mun’dzabva pomwe mafala manango,Yakulewa bza ciwembo pa dziko la pantsi na yakulewa bza mtongi na mtongi mwanzace.
47 Na tenepo zikufika ntsikuZomwe nin’dzapfudza bzifanikiso bzakugoba bza Babiloniya.
Dziko lentse lin’dzapasidwa manyazi,Ndipo anyakufa wace wentse an’dzagwa m’mwemo.
48 Kudzulu, dziko la pantsi na bzentse bzomwe bziri m’mwemoBzin’dzakuwa mwakukondwa thangwe ra kupfudzidwa kwa Babiloniya,Pakuti anyakumupfudza an’dzabwera kwa iye kucokera ku norte,” walewa tenepo Yahova.
49 “Babiloniya alibe kupha Ajirayeri okha,Koma wanthu wa madziko manango adaphedwambo mu Babiloniyamo.
50 Imwe omwe mwapulumuka ku xipada, pitirizani kufamba, lekani kuima!
Imwe omwe muli kutali, kumbukirani Yahova,Ndipo kumbukiranimbo Jeruzalemu mu mtima mwanu.”
51 “Tapasidwa manyazi thangwe tatukwanidwa.
Manyazi yampsinkha nkhope zathu,Pakuti wanthu wacirendo abwera kudzapfudza mbuto zakucena za nyumba ya Yahova.”
52 Yahova walewa kuti: “Zikufika ntsikuZomwe nin’dzapfudza bzifanikiso bzace bzentse bzakucita kugoba,Ndipo m’dziko lace lentse anyakupwetekeka an’dzabuula.”
53 “Napo Babiloniya acikwira mpaka kudzulu,Napo acilimbisa nyumba zace zikulu-zikulu zakulimba,Anyakupfudza omwe nin’dzawatuma an’dzafika kumweko basi,” walewa tenepo Yahova.
54 “Tetekerani! Ku Babiloniya kukubveka baludya,Ku dziko la Kalideya kukubveka baludya thangwe ra kuphedwa kwa wanthu azinji,
55 Pakuti Yahova akupfudza Babiloniya,Iye an’dzanyamalisa fala lace lamphanvu,Anyamadulanthaka wace an’dzabveka ninga kuunga kwa madzi mazinji.
Ndipo wanthu an’dzabva mafala yawo.
56 Nyakupfudza an’dzayenda ku Babiloniya;Anyankhondo wace an’dzaphatidwa,Mauta yawo yan’dzagwatidwa,Pakuti Yahova ni Mulungu wakubwezera.
Mwakusaya kupenukira iye an’dzabwezera.
57 Nin’dzaledzeresa nduna zace na adziwi wace,Magovernadori yace na wakuimikira magovernadori yace pabodzi na anyankhondo wace,Iwo an’dzagona tulo mpaka kale-kale,Tulo tomwe an’dzamuka lini pomwe,” walewa tenepo Mambo omwe dzina lace ni Yahova wa anyankhondo.
58 Yahova wa anyankhondo walewa kuti:
“Napo kuti muro wa Babiloniya ngukulu kwene-kwene un’dzagumulidwa,Ndipo bzipata bzace napo ni bzitali-bzitali bzin’dzatenthedwa na moto.
Wanthu an’dzaphata basa kwene-kwene papezi;Mitundu ya wanthu in’dzaneta kuphata basa, koma basa lawolo lin’dzatenthedwa na moto.”
59 Aya ni mafala yomwe mprofeta Jeremiya adauza Seraiya mwana wa Neriya, mzukulu wa Maseiya pomwe iye adayenda ku Babiloniya pabodzi na Zedekiya mambo wa Djuda, mu gole lacinai la utongi bwace. Seraiya akhali nduna ya mambo.
60 Jeremiya adanemba m’bukhu matsoka yentse yomwe yangadagwera Babiloniya, mafala yentseneya adanembera Babiloniya.
61 Kuthumizira bzimwebzi, Jeremiya adauza Seraiya kuti: “Ukakhala kuti ukufika ku Babiloniya uciwona mzindayo, ukawerenge mafala yentseneya mwakukuwa.
62 Ndipo ukalewembo kuti: ‘Imwe Yahova, imwepo mudalewa kuti mbutoyi in’dzapfudziwa ndipo in’dzakhalidwa lini pomwe na wanthu ne na bzirombo, nakuti ingadakhala matere mpaka kale-kale.’
63 Ndipo ukakamala kuwerenga bukhuli, ukalimangirire ku mwala ucilithusa mu mkulo wa Eufrate.
64 Patsogolo pace ukalewe kuti: ‘Umu ni momwe Babiloniya an’dzamirira ndipo iye an’dzalamuka lini pomwe thangwe ra tsoka lomwe nin’dzamubweresera, ndipo wanthu wakukhala mu mzindamo an’dzaneta.’”
Mafala ya Jeremiya yamalira pano.
Mafala ya m'nyantsi
^ Limweri likuwoneka kuti ni dzina linango la Akalideya.
^ Lomwe ni dziko la Akalideya.
^ Ayai, “bzakucita kusungunusa.”
^ Ayai, “bzifanikiso bzakucita kusungunusa.”
^ Ayai, “wa paponta.”
^ Mafala yace caiyo: “Cenesani.”
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Ayai, “wana wa mphondolo.”
^ Bzikuwoneka kuti limweri ni dzina linango la Babeli (Babiloniya).
