Jeremiya 52:1-34
52 Zedekiya akhana magole 21 pomwe adakhala mambo, ndipo adatonga magole 11 mu Jeruzalemu. Mai wace akhacemeredwa Amutali, omwe akhali mwana wa Jeremiya wa ku Libina.
2 Iye akhacita bzinthu bzakuipa pamaso pa Yahova, ninga bzakuipa bzentse bzomwe Jewoyakimu akhadacita.
3 Thangwe ra ukali bwa Yahova, bzimwebzi bzidacitikira Jeruzalemu na Djuda, mpaka iye adawathamangisa pamaso pace, ndipo Zedekiya adapandukira mambo wa ku Babiloniya.
4 Mu gole laci 9 la utongi bwa Zedekiya, m’mwezi waci 10 pa ntsiku yaci 10 ya mweziyo, Nabukadinazori* mambo wa ku Babiloniya pabodzi na acikunda wace wentse adabwera kudzamenyana na Jeruzalemu. Iwo adamanga misasa kuti amenyane na mzindayo ndipo adakonzambo muro kuzungulira mzinda wentseneyo.
5 Ndipo mzindayo udazunguliridwa mpaka mu gole laci 11 la mambo Zedekiya.
6 M’mwezi wacinai, pa ntsiku yaci 9 ya mweziyo, mu mzindamo mudagwa njala ndipo m’dzikomo mukhalibe cakudya kuti wanthu adye.
7 Pakumalizira pace, muro wa mzindayo udabowoledwa ndipo usiku acikunda wentse adathawa mu mzindamo na pacipata comwe cikhali pakati pa mimuro miwiri, yomwe ikhali pafupi na zunde la mambo pomwe Akalideya akhadazungulira mzindayo ndipo iwo adayendera ku njira ya ku Araba.
8 Tsono anyankhondo wa Akalideya adathamangisa mambo Zedekiya acikam’phata mu dambo la Jeriko, ndipo acikunda wace adathawa acimusiya yekha.
9 Patsogolo pace adatenga mamboyo aciyenda naye kuna mambo wa ku Babiloniya ku Ribla mu dziko la Hamate, ndipo mambo wa ku Babiloniyayo adalewa nyathwa yomwe angadamupasa.
10 Mambo wa ku Babiloniya adapha wana wa Zedekiya, Zedekiyayo akuwona, ndipo adaphambo nduna zentse za ku Djuda zomwe zikhali ku Riblako.
11 Patsogolo pace mambo wa ku Babiloniya adabowola maso Zedekiya ndipo adamumanga na makorenti ya kobre* aciyenda naye ku Babiloniya ndipo kumweko adakamufungira m’kawoko mpaka kufa kwace.
12 M’mwezi wacixanu, pa ntsiku yaci 10 ya mweziyo, lomwe likhali gole laci 19 la Nabukadinazori* mambo wa ku Babiloniya, Nebuzaradani, mtsogoleri wa alindiri omwe akhali mtumiki wa mambo wa ku Babiloniya adabwera ku Jeruzalemu.
13 Iye adatentha nyumba ya Yahova, nyumba ya mambo na nyumba zentse za ku Jeruzalemu, ndipo adatenthambo nyumba zentse zikulu-zikulu.
14 Ndipo mimuro yomwe ikhazungulira Jeruzalemu idagumulidwa na acikunda wentse wa Akalideya omwe akhali pabodzi na mtsogoleri wa alindiri.
15 Nebuzaradani mkulu wa alindiri adatenga wanthu winango wakusauka na winango omwe akhadasiidwa mu mzindamo aciyenda nawo ku ukapolo. Iye adatengambo wanthu omwe akhadathawa acikhala ku mbali ya mambo wa ku Babiloniya kuphatanidzambo amisiri waluso omwe akhadasala.
16 Nebuzaradani mkulu wa alindiri adasiya wanthu winango m’dzikolo omwe akhadasauka kwene-kwene, kuti ambalime m’minda ya uva nakuti ambaphate mabasa yakukakamizidwa.
17 Akalideya adagwesa mapilare ya kobre* pa nyumba ya Yahova, adapfudza ngolo, tanki ya madzi yomwe ikhadakonzedwa na kobre yomwe ikhali pa nyumba ya Yahova, ndipo adatengambo kobre yentse aciyenda nayo ku Babiloniya.
18 Adatengambo bzombo, mafoxolo, bzakuthimisira kandiyero, matijela, makopo na bzombo bzentse bzakukonzedwa na kobre bzomwe bzikhaphatisidwa basa mu templo.
19 Mtsogoleri wa alindiriyo adatengambo mabasiya, bzakupalira moto, matijela, bzakucosera dotha, bzakuikhira kandiyero, makopo na matijela yakukonzedwa na oro na prata yabwino.
20 Pakulewa bza mapilare mawiri, tanki ya madzi, ng’ombe 12 za kobre zomwe zikhali pantsi pa tanki ya madzi na ngolo zomwe mambo Salomau akhadazikonza pa nyumba ya Yahova, bzikhali lini bzakukwanisika kupima kobre ya bzinthu bzentsenebzi.
21 Pakulewa bza mapilare, pilare iri-yentse ikhadatalimpha makovado 18,* ndipo cingwe ca makovado 12 cikhakwana kuizungulira. Ntcinya ya pilare yakuyamba ikhali ya bzala bzinai* ndipo ikhana mphako.
22 Cakudekesera comwe cikhali pa pilare yakuyamba cikhali ca kobre. Ico cikhadatalimpha makovado maxanu, ndipo gredya na muti wace wa romaa* bzikhali bza kobre. Pilare yaciwiri ikhadandendemerana na pilare yakuyamba, bzibodzi-bodzimbo na muti wa romaa.
23 M’mphepete mukhana bzakudekesera bza miti ya romaa bzakukwana 96 ndipo magredya yentse yakhana bzakudekesera bza miti ya romaa bzakukwana 100.
24 Mtsogoleri wa alindiri adatengambo Seraiya, omwe akhali mkulu wa antsembe, Zefaniya omwe akhali wantsembe waciwiri na anyakunyang’anira pa msuwo atatu.
25 Mu mzindamo adatengambo mkulu m’bodzi wa pa nyumba ya mambo omwe akhali mtsogoleri wa acikunda, wanthu 7 wa mu mzindamo omwe akhali ayeruzi wa* mambo, munembi wa mtsogoleri wa anyankhondo omwe akhanemba wanthu m’dzikolo kuti akhale anyankhondo na wanthu 60 wa m’dzikolo omwe akhanati kucoka mu mzindamo.
26 Nebuzaradani mtsogoleri wa alindiri adawatenga aciyenda nawo kwa mambo wa ku Babiloniya ku Ribla.
27 Mambo wa ku Babiloniya adawamenya aciwapha ku Ribla, m’dziko la Hamate. Tenepo Adjuda adatengedwa ku dziko lawo aciyendesedwa ku ukapolo.
28 Iyi ni mbongo ya wanthu omwe Nabukadinazori* adawatenga aciwayendesa ku ukapolo mu gole laci 7: Akhalipo Adjuda 3023.
29 Mu gole laci 18 la Nabukadinazori,* wanthu wakukwana 832 adatengedwa kucokera ku Jeruzalemu.
30 Mu gole laci 23 la Nabukadinazori,* Nebuzaradani mtsogoleri wa alindiri adatenga Adjuda wakukwana 745 aciyenda nawo ku ukapolo.
Wanthu wentse omwe adayendesedwa ku ukapolo akhalipo 4600.
31 Tsono mu gole laci 37 la ukapolo bwa Jewoyakini mambo wa Djuda, m’mwezi waci 12, pa ntsiku yaci 25 ya mweziyo, mu gole lomwe Evili-merodaki adakhala mambo ku Babiloniya, adatsudzula Jewoyakini mambo wa Djuda acimucosa m’kawoko.
32 Iye adalewalewa naye mwakudeka mtima ndipo adamuikha pa mbuto yakulemekezeka* kuposa amambo winango omwe akhanaye pabodzi ku dziko la Babiloniya.
33 Tenepo Jewoyakini adacosa bzakubvala bzace bza m’kawoko ndipo akhambadya pa meza ya mambo ntsiku zentse za moyo wace.
34 Iye akhambapasidwa nthawe zentse cakudya kucokera kwa mambo wa ku Babiloniya, ntsiku na ntsiku mpaka ntsiku yakufa kwace, ntsiku zentse za moyo wace.
Mafala ya m'nyantsi
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Ayai, “mkuwa.”
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Ayai, “mkuwa.”
^ Kovado ibodzi ni masentimetro 44 na meya. Onani Mafala Yakuphampha B14.
^ Cala cibodzi ni masentimetro 1,85. Onani Mafala Yakuphampha B14.
^ Muti umweyu umbabala bzisapo bzomwe mkati mwace muna tubzinthu tomwe tumbakhala ninga cimanga.
^ Ayai, “anyakupereka malango kuna mambo.”
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Ayai, “adaikha mpando wace wa umambo padzulu kwene-kwene kuposa mipando ya umambo inango.”
