Jeremiya 6:1-30
6 Imwe wana wa Benjamini, nyang’anani kwakuthawira, kutali na Jeruzalemu.
Lizani nyanga ku Tekowa;Gasani cizindikiro ca moto ku Beti-hakeremu!
Pakuti tsoka lakucokera ku norte likufendera, tsoka likulu.
2 Mwana wacikazi wa Ziyoni ali ninga mkazi wakudeka na wautumbe.
3 Amakabusa an’dzabwera pabodzi na bzifuwo bzawo.
An’dzamanga matendi yawo m’mbali mwace,Ndipo ali-wentse an’dzatenga bzifuwo bzace aciyenda kubusa.
4 “Konzekerani kuti mukamenye naye nkhondo!
Lamukani, mbatiyendeni tikamenyane naye masikati!”
“Tsoka kwa ife, pakuti nthawe ikumalaNdipo kukuyenda kucidoka!”
5 “Lamukani, mbatiyendeni tikamenyane naye usikuNdipo tikapfudze prediyo zace zakulimba.”
6 Pakuti Yahova wa anyankhondo walewa kuti:
“Gwatani miti ndipo konzani mtunthu wakumenyera nkhondo kuti mumenyane na Jeruzalemu.
Umweyu ni mzinda omwe un’funika kulangidwa;Pakuti wadzala na kupondererana.
7 Ninga mcera omwe umbacitisa kuti madzi yace yakhale yakudjedjera,Iyembo ambacitisa kuti uipi bwace bupitirize kukhala bwakudjedjera.
Ciwembo na kupfudzidwa bzimbamala lini m’mwemo;Matenda na cisi bziri patsogolo pangu nthawe zentse.
8 Iwe Jeruzalemu, bvera cenjezo kuti ndileke kunyantsidwa nawe ndicikusiya;Nin’dzakucitisa kukhala dziko la matere na lakusaya kukhalidwa na wanthu.”
9 Yahova wa anyankhondo walewa kuti:
“Iwo an’dzaphalasira mpaka kumala anyakusala wa Jirayeri, ninga momwe ambacitira na uva bwakumalizira bwa m’muti.
Ikha pomwe boko lako pa miti ya uva ninga momwe ambacitira anyakubvuna uva.”
10 “Kodi nin’lewalewa na mbani ndipo nin’cenjeza mbani?
Mbani an’dzabva?
Makutu yawo yadafunga! Ndipopa iwo an’kwanisa lini kutetekera.
Mafala ya Yahova yakhala yakunyantsa kwa iwo;Ndipo akukomedwa lini nayo.
11 Ndipopa ukali bwa Yahova bomwe buli mu mtima mwangu bukutaikira,Nin’kwanisa lini kububisa.”
“Khuthulira ukalibo kwa mwana omwe ali mu mseuNa kwa maswaka yomwe yatsonkhana,
Pakuti wentse an’dzaphatidwa, mwamuna na mkazace,Acikulire na nkhalamba.
12 Nyumba zawo zin’dzaperekedwa kwa winango,Na minda yawo pabodzi na azikazawo.
Pakuti nin’dzafuthulira boko langu anyakukhala m’dzikoli,” walewa tenepo Yahova.
13 “Kuyambira mng’ono mpaka mkulu, wentse ambagumana phindu mwacinyengo;Kuyambira mprofeta mpaka wantsembe, wentse ambacita bzinthu mwacinyengo.
14 Iwo ambawonesa ninga akupoza bzironda bza wanthu wangu mwakulewa kuti:‘Pana mtendere! Pana mtendere!’
Uko palibe mtendere.
15 Kodi iwo ambabva manyazi na bzinthu bzakunyantsa bzomwe adacita?
Iwo ambabva lini manyazi ne napang’onopo!
Ndipo ne ambadziwa lini kuti manyaziyo n’ciyani!
Ndipopa iwo an’dzagwa pakati pa wanthu omwe adagwa kale.
Ndipo an’dzakhukhumudwa ndikadzawabweresera cirango,” walewa tenepo Yahova.
16 Yahova walewa kuti:
“Imani mu mphambano za m’miseu kuti muwone.
Bvunzani bza miseu yakale-kale,Bvunzani komwe kuna njira yabwino mucifamba m’mwemo,Ndipo imwepo mun’dzapuma.”
Tsono iwo akulewa kuti: “Ife tin’dzafamba lini mu njira imweyi.”
17 “Ndipo ine ndidaikha alindiri omwe adalewa kuti:‘Tetekerani kulira kwa nyanga!’”
Tsono iwo adati: “Tin’tetekera lini ife.”
18 “Na tenepo tetekerani, imwe mitundu ya wanthu!
Ndipo dziwani, imwe wanthumwe,Bzinthu bzomwe bziniwacitikira.
19 Tetekera iwe dziko!
Nin’bweresera tsoka wanthuwaThangwe ra makumbukidwe yawo yakuipa,Pakuti iwo alibe kutetekera mafala yanguNdipo alamba kubvera lamulo langu.”*
20 “Kodi bzina phindu lanyi kundibweresera ntsonono zakununtcira zakucokera ku XebaNa kalamo* yakucokera ku dziko lakutali?
Ntsembe zako zakutentha ni zakubvumizidwa liniNdipo ntsembe zomwe umbapereka zimbandidekera lini.”
21 Na tenepo Yahova walewa kuti:
“Ndiniikhira wanthuwa minyala yakukhukhumudwisa,Ndipo iwo an’dzakhukhumudwa nayo,Azibereki na wana,Azivizinyu na axamwali,Ndipo wentsenewo an’dzafa.”
22 Yahova walewa kuti:
“Onani! Akubwera wanthu wa ku dziko la ku norte,Mtundu ukulu wa wanthu ukubweresedwa kucokera ku mbali zakutali za dziko.
23 Iwo an’dzabweresa misewe na madipa.
Iwo mbakuipa mtima ndipo an’dzacita lini bzinthu na ntsisi.
Fala lawo lin’dzabveka ninga kuunga kwa nyanzaIwo akubwera adapakira makavalo.
Iwe mwana wacikazi wa Ziyoni, iwo akubwera ninga anyankhondo ndipo aima kale m’mbuto zawo kuti amenyane nawe.”
24 Tabva nkhani yakulewa bzimwebzi.
Manja yathu yatepa;Takundidwa na thupo,Tikubva kuwawa ninga kwa mkazi omwe akubereka.
25 Leka kuyenda kumunda,Ne kufamba m’miseu,Pakuti nyamadulanthaka ana xipada;Dziko lentse lina ciwembo.
26 Iwe mwana wacikazi wa wanthu wangu,Bvala magundiri ndipo bvunvulika pa dotha.
Sunama ndipo lira mwakuwawidwa mtima ninga kuti wafedwa mwana wako m’bodzi yekha.Pakuti nyakupfudza an’dzatibwerera mwadzidzidzi.
27 “Ndakucitisa* kukhala ninga nyakuwona-wona bza simbi pakati pa wanthu wangu,Munthu omwe ambadinga mwakukwana;Khala tceru ndipo uwonesese njira yako.
28 Iwo ni wanthu wakusaya kubva kuposa wentse,Ndipo nthawe zentse akumwaza nkhani zakuipisa mbiri ya anzawo.
Iwo ali ninga kobre* na simbi,*Ndipo wentse ambacita bzinthu bzakuipa.
29 Bzakugasira moto bzawawuka,
Pa moto wawo pambandobula mtobve.
Nyakuphata nabzo basa ambandophata basa papezi,Pakuti wanthu wakuipa alibe kupfudzidwa.
30 Mwakusaya kupenukira wanthu an’dzawacemera prata yakulambidwa,Thangwe Yahova wawalamba.”
Mafala ya m'nyantsi
^ Ayai, “malango yangu.”
^ Umweyu ni muti wakununtcira.
^ Omwe ni Jeremiya.
^ Ayai, “mkuwa.”
^ Ayai, “fero.”
