Jeremiya 8:1-22
8 Yahova walewa kuti: “Pa nthaweyo, mafupa ya amambo wa ku Djuda, mafupa ya nduna zawo, mafupa ya antsembe, mafupa ya aprofeta na mafupa ya wanthu wakukhala mu Jeruzalemu yan’dzacosedwa m’mathenje.
2 Yan’dzabalalisidwa pantsi pa dzuwa, mwezi na bzinthu bzentse bza kudzulu bzomwe iwo akhabzifuna kwene-kwene, akhabzitumikira, akhabzitewera, kubzilinga na kubzigodamira. Iwo an’dzalokotedwa lini ne kufuciridwa, an’dzakhala ninga ndowe pa mataka.”
3 “Ndipo kuli-kwentse komwe nin’dzawabalalisira anyakusala omwe an’dzapulumuka pakati pa mtundu wakuipayu, an’dzasankhula kufa sikuti kukhala na moyo,” walewa tenepo Yahova wa anyankhondo.
4 “Uwauze kuti: ‘Yahova walewa kuti:
“Kodi iwo an’dzagwa ndipo an’dzalamuka lini pomwe?
M’bodzi akabwerera m’mbuyo kodi munangoyo an’dzabwerambo lini?
5 Thangwe ranyi wanthu wa ku Jeruzalemu akupitiriza kukhala wakusaya kukhulupirika?
Iwo aphatisisa cinyengo;Ndipo akulamba kubwerera.
6 Inepano ndidakhala tceru ndipo ndikhawatetekera, tsono kalewelewedwe kawo kakhali lini kabwino.
Palibe omwe adakhumbula na uipi bwace ne kubvunza kuti: ‘N’ciyani comwe ndacita?’
Nthawe zentse, wentse akucita bzinthu ninga momwe azinji ambacitira, ninga makavalo yomwe yakuthamangira ku nkhondo.
7 Napo segonya* ambadziwa nthawe yace;Njiwa, kandirinyu na ntsocinyo zimbadziwa nthawe yawo yakubwerera.
Tsono wanthu wangu caiwo ambabvesesa lini katongedwe ka Yahova.”’
8 ‘Kodi angalewe tani kuti: “Ifepano ndife wanzeru ndipo tina lamulo la* Yahova”?
Kulewa cadidi cakunembera ca munembi cimbandophatisidwa basa* pakunembera bzinthu bza cinyengo.
9 Adziwi acitisidwa manyazi.
Acita mantha ndipo an’dzaphatidwa.
Alamba fala la Yahova,Kodi ni nzeru zanyi zomwe anazo?
10 Ndipopa nin’dzapereka azikazi wawo kwa amuna winango,Na minda yawo kwa wanthu winango;Pakuti kuyambira mng’ono mpaka mkulu, wentsenewo ambagumana phindu mwacinyengo;Kuyambira mprofeta mpaka wantsembe, wentse ambacita bzinthu mwacinyengo.
11 Iwo ambawonesa ninga akupoza bzironda bza mwana wacikazi wa wanthu wangu mwakulewa kuti:“Pana mtendere! Pana mtendere!”
Uko mtendere palibe.
12 Kodi iwo ambabva manyazi na bzinthu bzakunyantsa bzomwe adacita?
Iwo ambabva lini manyazi ne napang’onopo!
Ndipo ne ambadziwa lini kuti manyaziyo n’ciyani!
Ndipopa iwo an’dzagwa pakati pa wanthu omwe adagwa kale.
Ndipo an’dzakhukhumudwa ndikadzawabweresera cirango,’ walewa tenepo Yahova
13 ‘Ndikadzawatsonkhanisa, inepano nin’dzawapfuza.’
‘Mun’dzasala lini uva m’muti mwa uva, ne nkhuyu m’muti wa mkuyu, ndipo masamba yace yan’dzafota.
Iwo an’dzaluza bzentse bzomwe ndidawapasa,’ walewa tenepo Yahova.”
14 “Thangwe ranyi tikundokhala pano?
Mbatitsonkhaneni kuti tikapite m’mizinda yakukhotcerereka kuti tikafere m’mwemo.
Pakuti Yahova Mulungu wathu an’tipha,Yahova akutipasa madzi ya veneno kuti timwe,Thangwe tamuphonyera.
15 Tikhadikhirira mtendere, tsono palibe kubwera bzinthu bzabwino,Tikhadikhirira nthawe yakupozedwa, koma tikuwona bzinthu bzakugopswa bzokha-bzokha!
16 Kucokera ku Dani yakubveka makavalo kupuma weko-weko.
Thangwe ra kulira kwa makavalo yawo,Dziko lentse likutetemera.
Anyamadulanthaka akupita acipfudza dzikolo na bzentse bzomwe bziri m’mwemo,Mzinda pabodzi na anyakukhala m’mwemo.”
17 “Nin’kutumizirani nyoka pakati panuNyoka za veneno zomwe zingapumpsidwe lini kuti muzisenzekese,Ndipo kulewa cadidi izo zin’dzakulumani,” walewa tenepo Yahova.
18 Kusunama kwangu n’kwakusaya kupozeka;Mtima wangu ukuduwala.
19 Kukubveka kulira kwa kukumbira thandizo kucokera ku dziko lakutaliKucokera kwa mwana wacikazi wa wanthu wangu kuti:
“Kodi Yahova ali lini mu Ziyoni?
Kodi mambo wace ali lini m’mwemo?”
“Thangwe ranyi iwo akundisunamisa na bzifanikiso bzawo bzakucita kugoba,Pabodzi na mirungu yawo yacirendo yakusaya basa?”
20 “Nthawe yakubvuna yapita, ndipo nthawe ya cirimo yamalambo,Tsono ifepano tikanati kupulumusidwa!”
21 Ndikuwawidwa thangwe ra bzironda bza mwana wacikazi wa wana wangu;Inepano ndidasunama.
Ndipo ndikubva mantha kwene-kwene.
22 Kodi ku Jiliyadi kulibe mafuta ya balsamo?
Kodi kumweko kulibe dotolo?*
Thangwe ranyi mwana wacikazi wa wanthu wangu alibe kupola?
Mafala ya m'nyantsi
^ Ayai, “nyantcengwe; Mulenga-conzi.”
^ Ayai, “malango ya.”
^ Ayai, “lapi ya munembi imbandophatisidwa basa”
^ Ayai, “mulapi.”
