Jeremiya 9:1-26
9 Bzingadakhala bwino msolo wangu ungadakhala mcera wa madzi,Ndipo maso yangu ninga mcera wa misozi,
Bzingadakhala tenepoyo, inepano ningadalira usiku na masikatiThangwe ra anyakufa wa mbumba yangu.
2 Bzingadakhala bwino ningadakhala na mbuto yakufikira wanthu omwe ali paulendo m’dambo!
Inepano ningadasiya wanthu wangu ndiciyenda kutali,Pakuti wentsenewo ni mphombo na maputa,Thimu la wanthu wacinyengo.
3 Afunya lirime lawo ninga uta,Ndipo kunama kwawo kwadzala m’dzikoli, sikuti kukhulupirika.
“Iwo ambandocita bzakuipa bzokha-bzokha,Ndipo ambanditetekera lini,” walewa tenepo Yahova.
4 “Mwentsenemwe citani mphole na anzanu,Ndipo napo m’bale wanu lekani kumukhulupira.
Pakuti azibale wentse mbanyakupumpsa,Ndipo anzanu wentse mbanyakuipisa mbiri ya anzawo.
5 Ali-wentse wa iwo ambanyengeza mwanzace,Ndipo palibe omwe ambalewa cadidi.
Apfunzisa lirime lawo kunama,
Ndipo ambabzinetesa na kucita bzinthu bzakuipa.
6 Iwepo umbakhala pakati pa anyakunama.
Thangwe rakuti mbanyakunama, iwo ambafuna lini kundidziwa,” walewa tenepo Yahova.
7 Tenepo Yahova wa anyankhondo walewa kuti:
“Inepano nin’dzawacenesa* ndiciwayeza,Kodi ningacite pomwe ciyani na mwana wacikazi wa wanthu wangu?
8 Lirime lawo ni msewe wakupha, lomwe limbalewa bzinthu bzakunama,
Ambauza anzawo na mulomo wawo bza mtendere,Tsono mu mtima mwawo ambawakonzera ciwembo.”
9 “Kodi ndikhafunika lini kuwalanga thangwe ra bzinthu bzimwebzi?
Kodi mtundu umweyu ndikhafunika lini kuubwezera?” walewa tenepo Yahova.
10 Nin’dzalira na kudandaula thangwe ra mapiri,Ndipo nin’dzaimba nyimbo yakulira thangwe ra mbuto yakudyesera bzifuwo m’dambo,Pakuti yatenthedwa mwakuti palibe omwe akupita pomwe na kumwekoNdipo ne kukubveka lini pomwe kulira kwa cifuwo.
Mbalame na bzirombo bza m’thengo bzathawa; bzamala kuyenda.
11 Jeruzalemu nin’dzamucitisa kukhala mapiri ya minyala, mbuto zakubisalira mphumphi,Ndipo nin’dzacitisa kuti mizinda ya mu Djuda ikhale matere, isaye kukhalidwa na wanthu.
12 Mbani omwe ana nzeru zizinji kuti abvesese bzimwebzi?
Kodi Yahova walewalewa na yani kuti akadziwisembo winango?
Thangwe ranyi dzikoli lapfudzidwa?
Thangwe ranyi lauma ninga dambo,Mwakuti palibe omwe akupita na m’mwemo?”
13 Yahova adatawira kuti: “Ni thangwe rakuti alamba lamulo langu* lomwe ndidawapasa na kusaya kuteweza ne kubvera fala langu.
14 M’mbuto mwace, thangwe ra mtimbo, adatewera mtima wawo na bzipfunziso bza Baala ninga momwe abereki wawo akhadawapfunzisira.
15 Na tenepo Yahova wa anyankhondo, Mulungu wa Jirayeri, walewa kuti: ‘Nin’citisa kuti wanthuwa adye msapani* nakuti amwe madzi ya veneno.
16 Ndiniwabalalisira ku mitundu yomwe iwo ne abereki wawo akhaidziwa lini, ndipo ndiniwatumizira xipada m’mambuyo mwawo yomwe in’dzawapfudza mpaka kuwamaliza.’
17 Yahova wa anyankhondo walewa kuti:‘Khalani wakubvesesa.
Cemerani akazi omwe ambaimba nyimbo zakulira,Cemeresani wale omwe ana luso kwene-kwene,
18 Kuti abwere mwakamfulumize kuti adzatiimbire nyimbo zakulira,Kuti misozi icoke m’maso mwathu,Ndipo bzikope bzathu bziyerere madzi.
19 Pakuti mu Ziyoni mwabveka wanthu akulira kuti:
“Ifepano tamala kupfudzidwa!
Manyazi yathu ni makulu kwene-kwene!
Pakuti tasiya dziko lathu, ndipo iwo atigwesera nyumba zathu.”
20 Imwe akazimwe, tetekerani fala la Yahova.
Makutu yanu yabvume fala lakucoka pamulomo pace.
Pfunzisani wana wanu wacikazi nyimbo yakulirayi,Ndipo pfunzisanani mwekha-mwekha nyimbo yakulirayi.
21 Pakuti infa yabwera na m’majanera mwathu;Yapita m’prediyo zathu zakulimbaKuti ipfudze wana m’miseuNa alumbwana m’misika.’
22 Ulewe kuti: ‘Yahova walewa kuti:
“Wanthu wakufa an’dzakhala ninga ndowe pa mataka,Ninga misumbu* ya tirigu yomwe yamala tsapanopa kugwatidwa,Yomwe nyakubvuna waisiya m’mambuyo,Yomwe palibe omwe angaikonkhobze.”’”
23 Yahova walewa kuti:
“Munthu wanzeru aleke kusamwa thangwe ra nzeru zace,Munthu wamphanvu aleke kusamwa thangwe ra mphanvu zace;Ndipo nyakudala aleke kusamwa thangwe ra kudala kwace.”
24 “Tsono omwe an’samwa, asamwe thangwe ra ibzi:
Kukhala wakuzindikira na kundidziwa,Kuti ine ndine Yahova, Ule omwe ambalatiza lufoyi lacadidi, cirungamo na kucita bzinthu bzakulungama pa dziko.Pakuti bzinthu bzimwebzi bzimbandidekera,” walewa tenepo Yahova.
25 Yahova walewa kuti: “Onani, zikufika ntsiku zomwe nin’dzalanga wentse wakucitidwa mgwatidwe,* omwe kulewa cadidi akanati kucitidwa mgwatidwe,
26 omwe ni Aedjipito, Adjuda, Aedomu, Aamoni, Amowabe na wentse omwe adagwata makungundebvu, omwe ambakhala m’dambo; pakuti mitundu yentse ya wanthu njakusaya kucitidwa mgwatidwe, ndipo nyumba yentse ya Jirayeri njakusaya kucitidwambo mgwatidwe mu mtima.”*
Mafala ya m'nyantsi
^ Bzimwebzi bzikuthandauza kusungunusa simbi mwakuphatisa basa moto pakufuna kucosa bzinthu bzakupswipa.
^ Ayai, “malango yangu.”
^ Umweyu ni muliwo omwe umbawawa ninga luni.
^ Ayai, “miphuthu.”
^ Ayai, “sirkumsizau.”
^ Ayai, “njakusaya kubvera.”
