Ya m’Bukhu la Luka 13:1-35
-
Kukungula ayai kupfudzidwa (1-5)
-
Ciratizo ca muti wa mkuyu omwe ukhabala lini bzisapo (6-9)
-
Kupozedwa kwa mkazi omwe akhadagonyoka msana pa ntsiku ya Sabudu (10-17)
-
Ciratizo ca kanjere kang’ono-ng’ono na cakufufumisa (18-21)
-
Kufunika kwa kucita nyongo ya kupita pa msuwo wa kupapatiza (22-30)
-
Herode “nkhandwe ire” (31-33)
-
Jezu adasunama thangwe ra Jeruzalemu (34, 35)
13 Pa nthawe imweyire, wanthu winango omwe akhalipo pamwepo, adauza Jezu bza wanthu wa ku Galileya omwe Pirato akhadasanganiza mulopa wawo na mulopa wa bzirombo bzomwe iwo akhapereka ntsembe.
2 Pakuwatawira iye adati: “Kodi mukukumbuka kuti Agalileya amwewo, akhana pikado kwene-kwene kuposa Agalileya winango thangwe ra bzinthu bzomwe bzidawacitikirabzo?
3 Ne. Ndikukuuzani kuti: Mukasaya kukungula, mwentsenemwe mun’dzapfudzidwambo ninga iwo.
4 Ayai kodi mukukumbuka kuti wanthu 18 wale omwe cinyumba citali cidawagwera ku Silowe ciciwapha, akhana pikado kwene-kwene kuposa wanthu wentse omwe ambakhala ku Jeruzalemu?
5 Ne. Ndikukuuzani kuti: Imwepo mukasaya kukungula, mwentsenemwe mun’dzapfudzidwambo ninga momwe bzidacitikira wanthu amwewa.”
6 Patsogolo pace, Jezu adayamba kufotokoza ciratizo ici: “Munthu munango akhana muti wa mkuyu omwe ukhadabzalidwa m’munda wace wa uva. Ndipo iye adayenda kuti akatce bzisapo m’mutimo, tsono alibe kukagumana cinthu.
7 Tenepo, iye adauza nyakusamalira mundayo kuti: ‘Lino ni gole lacitatu lomwe ndikubwera kudzanyang’ana bzisapo m’muti wa mkuyuyu, koma nimbagumana lini cinthu. Ugwate! Thangwe ukundodzonga mbuto papezi.’
8 Pakutawira, nyakusamalira mundayo adati: ‘Mbuya, musiyeni pomwe gole libodzi lokha. Inepano nin’cera mphepete mwacemu, ndiciikha ndowe.
9 Ukadzabala bzisapo kutsogoloku, bziri bwino; koma ukasaya kubala, mungadzaugwate.’”
10 Pa ntsiku inango ya Sabudu, Jezu akhapfunzisa mu nyumba inango yakunamatira.*
11 Ndipo m’mwemo, mukhana mkazi munango omwe akhaduwalisidwa na mzimu wakuipa kwa magole 18; iye akhadagonyoka msana mwakuti akhakwanisa lini kuuthamula.
12 Pomwe Jezu adawona mkaziyo, adamuuza kuti: “Mkaziwe, wapozedwa matenda yako.”
13 Jezu adaikha manja yace pa mkaziyo ndipo pa nthawe imweyoletu, msana wace udathamuka aciyamba kutumbiza Mulungu.
14 Tsono mtsogoleri wa m’nyumba ya kunamatirayo, alibe kukomedwa thangwe rakuti Jezu adapoza munthu pa Sabudu. Tenepo, iye adauza thimu la wanthulo kuti: “Pana ntsiku 6 zakuphata basa; tenepo, mbabwerani ntsiku zimwezi kuti mudzapozedwe, sikuti pa ntsiku ya Sabudu.”
15 Na tenepo, Mbuya adatawira kuti: “Wanthu wacinyengo! Ali-wentse wa imwepo ambatsudzula lini mkono ayai bulu wace m’thanga pa ntsiku ya Sabudu aciyenda kukamumwesa madzi?”
16 Mkaziyu ni wa dzinza la Abalahamu, ndipo Sathani akhadamumanga kwa magole 18, kodi mpsakuthemera lini kuti iye apozedwe matenda yaceya pa ntsiku ya Sabudu?”
17 Pomwe iye adalewa bzimwebzi, anyakumutsutsa wace wentse adanyala, tsono thimu lentse la wanthu lidayamba kukomedwa thangwe ra bzakudabwisa bzomwe iye akhacita.
18 Tenepo iye adathumizira kulewa kuti: “Kodi Umambo bwa Mulungu buli ninga ciyani, ndipo ningabundendemezere na ciyani?
19 Buli ninga kanjere kang’ono-ng’ono* komwe munthu adakatenga acikabzala m’munda mwace. Iko kadamera kacikhala cimuti cikulu, ndipo mbalame zidakonza bzitsa mu mthambi zace.”
20 Ndipo iye adalewa pomwe kuti: “Kodi Umambo bwa Mulungu ningabundendemezere na ciyani?
21 Buli ninga cakufufumisa* comwe mkazi munango adacitenga acicisanganiza na mphimo zitatu zikulu-zikulu za ufa,* ndipo ufa bwentsebo budafufuma.”
22 Pomwe Jezu akhayenda ku Jeruzalemu, iye adapita mu mzinda na mzinda, mudzi na mudzi acimbapfunzisa wanthu.
23 Tenepo, mwamuna munango adamubvunza kuti: “Mbuya, kodi n’cadidi kuti ni wanthu ang’ono-ng’ono omwe an’dzapulumusidwa? Jezu adamutawira kuti:
24 “Citani nyongo yakupita na pa msuwo wakupapatiza, thangwe ine ndikukuuzani kuti azinji an’dzayezera kupita, koma an’dzakwanisa lini.
25 Mwenekaciro nyumba akadzalamuka acifunga msuwo, imwepo mun’dzaima panja ndipo mun’dzagogodza msuwoyo mucimbalewa kuti: ‘Mbuya, tifungulirenimbo.’ Tsono iye an’dzakutawirani kuti: ‘Nin’dziwa lini komwe mwacokera.’
26 Ndipo imwepo mun’dzayamba kulewa kuti: ‘Ifepano tikhadya, ticimwa pamaso panu, ndipo imwepo mukhapfunzisa m’miseu mikulu-mikulu ya m’mizinda yathu.’
27 Tsono iye an’dzakuuzani kuti: ‘Nin’dziwa lini komwe mwacokera. Cokani pamaso pangu, mwentse omwe mumbacita mabasa yakusaya kulungama!’
28 Ndipo mukadzawona Abalahamu, Izaki, Djakobo na apolofeta wentse mu Umambo bwa Mulungu, imwepo mun’dzathusidwa kunja ndipo kumweko mun’dzalira mucikeketa mano.
29 Kuthumizira bzimwebzi, wanthu an’dzabwera kucokera kumabvadzuwa na kumadokero, ndipo winango an’dzacokera ku norte* na ku suli,* ndipo iwo an’dzakhala pa meza acidya mu Umambo bwa Mulungu.
30 Tetekerani! Alipo wakumalizira omwe an’dzakhala wakuyamba, ndipo wakuyamba an’dzakhala wakumalizira.”
31 Pa nthawe imweyo, Afarizeu winango adabwera acimuuza kuti: “Coka pano! Thangwe Herode an’funa kukupha.”
32 Tsono Jezu adawatawira kuti: “Ndokoni ndipo kauzeni nkhandwe ire kuti: ‘Ndikucosa madimonyo na kupoza wanthu lero na mangwana, ndipo pa ntsiku yacitatu nin’dzamaliza.’
33 Tenepo, nin’funika kupitiriza lero, mangwana na mkuca, thangwe mpsakubvumizika lini* kuti mpolofeta aphedwe kunja kwa Jeruzalemu.
34 Jeruzalemu, Jeruzalemu, wakupha apolofeta na wakuboma wale omwe adatumizidwa kwa iwe. Kazinji-kentse ndidafuna kutsonkhanisa wana wako ninga momwe nkhuku imbatsonkhanisira tuwana twace m’maphaphidwe mwace! Tsono iwepo ulibe kufuna.
35 Mulungu an’dzasiya nyumba yako. Ndikukuuzani kuti, kuyambira tsapano, imwepo mun’dzandiwona lini pomwe, mpaka pomwe mudzalewe kuti: ‘Wakusimbidwa ngule omwe ambabwera mu dzina la Yahova!’”
Mafala ya m'nyantsi
^ Mafala yace caiyo: “Sinagoga.”
^ Onani mafala ya m’nyantsi pa Mateu 13:31.
^ Ayai, “fermento.”
^ Mphimo zikulu-zikulu zitatu zomwe zikasanganizidwa pabodzi, zimbafika pafupi-fupi makilu 10.
^ Ayai, “kudzaulu.”
^ Ayai, “kunyantsi.”
^ Ayai, “mpsakuthemera lini.”
