Ya m’Bukhu la Luka 14:1-35
-
Kupozedwa kwa munthu omwe akhana matenda yakugweresa thupi pa ntsiku ya Sabudu (1-6)
-
Kukhala mulendo wakubzicepesa (7-11)
-
Cemerani wale omwe angakwanise lini kukubwezerani (12-14)
-
Ciratizo ca wale omwe adalamba mcemo (15-24)
-
Bzakufunika kuti munthu akhale nyakupfunza (25-33)
-
Munyu ukamala mphanvu (34, 35)
14 Pa ntsiku inango, Jezu adayenda kukadya kumui kwa mtsogoleri munango wa Afarizeu pa Sabudu, ndipo iwo akhamunyang’anisisa kwene-kwene.
2 Ndipo patsogolo pace, pakhana mwamuna munango omwe akhaduwala matenda yakugweresa thupi.
3 Na bzimwebzi Jezu adabvunza adziwi wa Malamulo na Afarizeu kuti: “Kodi lamulo limbabvumiza kupoza munthu pa ntsiku ya Sabudu ayai ne?”
4 Tsono iwo alibe kumutawira. Na tenepo, iye adaikha manja yace pa munthuyo acimupoza, ndipo adamuuza kuti ayende.
5 Patsogolo pace Jezu adawauza kuti: “Mbani wa imwepo, omwe mwanace ayai ng’ombe yace icigwera mu mcera pa ntsiku ya Sabudu, angayende lini kukaicosa mwakamfulumize?”
6 Tsono iwo adasaya cakutawira.
7 Pomwe Jezu adawona momwe wanthu wakucemeredwa akhambasankhulira mbuto zakulemekezeka kuti akhale, iye adawauza ciratizo cakuti:
8 “Ukacemeredwa na munthu ku phwando la malowozi, leka kukakhala pa mbuto yakulemekezeka. Thangwe pinango iye wacemerambo munthu munango wakulemekezeka kwene-kwene kuposa iwepo.
9 Patsogolo pace, omwe wakucemerayo an’dzabwera acikuuza kuti: ‘Bula pamwepa kuti uyu akhale.’ Na tenepo, iwepo un’dzacoka na manyazi ucikakhala pa mbuto yakunyozeka.
10 Tsono ukacemeredwa ku phwando, ndoko ukakhale pa mbuto yakunyozeka, kuti munthu omwe wakucemerayo akabwera adzakuuze kuti: ‘Xamwali, kakhale pa mbuto yakulemekezeka ire.’ Na tenepo, iwepo un’dzalemekezedwa pamaso pa anyakucemeredwambo anzako.
11 Pakuti munthu ali-wentse omwe an’bzikuza an’dzacepesedwa, ndipo ule omwe an’bzicepesa an’dzakuzidwa.”
12 Patsogolo pace, Jezu adauzambo munthu omwe akhadamucemera ule kuti: “Ukakonza phwando, leka kucemera axamwali wako, abale wako, adzinza wako ayai wanthu wapafupi omwe mbakudala. Thangwe iwo angadzakucemerembo, ndipo bzimwebzi bzin’dzakhala ninga kuti akukubwezera.
13 Tsono ukakonza phwando, cemera anyakusauka, anyakupunduka na azimola;
14 ndipo iwepo un’dzakondwa, thangwe iwo alibe cinthu ciri-centse cakuti akubwezere. Thangwe ra bzimwebzi, Mulungu an’dzakubwezera pa kudzalamusidwa kwa wanthu wakulungama.”
15 Pakubva bzimwebzi, m’bodzi mwa alendo omwe akhali pamwepowo adati kwa iye: “An’kondwa ngule omwe anidya* mu Umambo bwa Mulungu.”
16 Jezu adamuuza kuti: “Munthu munango, adakonza phwando likulu ndipo adacemera wanthu azinji.
17 Pomwe nthawe ya phwandolo idakwana, iye adatuma kapolo wace kuti akauze wanthu omwe akhadacemeredwa kuti: ‘Bwerani, thangwe bzentse bzakonzedwa kale.’
18 Tsono wentse pabodzi adayamba kunyang’ana mathangwe yakulambira. Wakuyamba adalewa kuti: ‘Ndagula munda ndipo nin’funa kuti ndikauwone; na tenepo ndikukumbira kuti mundilekerere.’
19 Ndipo munango adati: ‘Ndagula bzipani bzixanu bza ng’ombe* ndipo nin’funa ndikawone momwe bzingaphatire basa; na tenepo ndikukumbira kuti mundilekerere.’
20 Ndipo munango pomwe adati: ‘Inepano nin’kwanisa lini kuyenda, thangwe ndalowola tsapanopa.’
21 Tenepo kapoloyo adabwerera, acikauza mbuya wace bzentsenebzi. Tsono mbuyayo adakalipa kwene-kwene ndipo adauza kapolo waceyo kuti: ‘Ndoko mwakamfulumize m’miseu na m’tunjira twa mu mzinda ndipo bweresa anyakusauka, azimola na anyakupunduka.’
22 Pomwe kapoloyo adabwerera adati: ‘Mbuya, ndacita bzomwe mwandiuza, tsono mbuto ikalipo basi.’
23 Tenepo, mbuyayo adauza kapolo kuti: ‘Ndoko pomwe m’miseu inango kunja kwa mzinda ndipo ngingimiza wanthu kuti adzapite, kuti nyumba yanguyi idzale.
24 Ine ndikukutsimikizirani kuti: Palibe ne na m’bodzi mwa wanthu omwe akhadacemeredwa wale, omwe an’dzadya pa phwando langu lomwe ndakonzali.’”
25 Thimu likulu la wanthu likhali pa ulendo pabodzi na Jezu, ndipo iye adazungunuka aciwauza kuti:
26 “Munthu ali-wentse omwe an’funa kukhala nyakupfunza wangu, an’funika kundifuna kwene-kwene* kuposa pai wace, mai wace, mkazace, wana wace, abale wace na mpfumakazi zace, inde, napo moyo wace caiwo.
27 Ali-wentse omwe an’nyamula lini muti wace wakuzunzidwira* acinditewera, angakhale lini nyakupfunza wangu.
28 Mwa ciratizo, mbani wa imwepo akafuna kumanga nyumba* ambayamba lini wakhala pantsi na kulewenga kobiri zomwe adzonge, kuti awone penu anazo kobiri zakukwanira zakumalizira nyumbayo?
29 Akasaya kucita bzimwebzo, iye an’dzakonza aliserse, acitazira kumaliza nyumbayo ndipo wentse omwe adamuwona, an’dzamuseka,
30 acimbati: ‘Munthuyu adayamba kumanga, koma watazira kumaliza.’
31 Ayai, kodi ni mambo uponi omwe akanati kukamenya nkhondo na mambo* munango ambayamba lini wakhala pantsi, kuti awone penu na acikunda 10 000 angakwanise kulimbana na mambo omwe akubwera kudzamenyana naye na acikunda 20 000?
32 Tsono iye akawona kuti an’kwanisa lini kumenyana nawo, iye ambatumiza anyakuimikira kuti akamukumbirire mpangano wa mtendere pomwe mwanzaceyo akali kutali.
33 Mwa njira ibodzi-bodziyi, palibe omwe angakhale nyakupfunza wangu, penu an’tazira kusiya bzinthu bzace bzentse.
34 “Kulewa cadidi, munyu ngwabwino. Tsono munyuyo ukamala mphanvu, kodi goso lace lingabwezeresedwe tani?
35 Ungaphate lini pomwe basa ne ungacitise lini mataka kukhala na ndovolo. Ndipo wanthu ambandoutaya kunja. Omwe ana makutu yakubva, abve.”
Mafala ya m'nyantsi
^ Mafala yace caiyo: “anidya pau.”
^ Bzipani bzixanu bza ng’ombe, ni midzombe 10 ya ng’ombe zomwe zimbaphatisidwa basa pa kugaula.
^ Mafala yace caiyo: “kuwenga, kuthandauza kufuna pang’ono.”
^ Onani Kafotokozedwe ka Mafala Manango.
^ Mafala yace caiyo: “prediyo.”
^ Ayai, “mpfumu.”
