Ya m’Bukhu la Luka 19:1-48
19 Patsogolo pace, Jezu adapita mu Jeriko tsono iye akhandogwata na mu mzindamo.
2 Mu mzindamo mukhana munthu munango wakucemeredwa Zakeu; iye akhali mkulu wa anyakukhomesa mtsonkho, ndipo akhadadala kwene-kwene.
3 Iye akhafunisisa kuwona Jezu, tsono akhakwanisa lini kumuwonako thangwe ra thimu la wanthu, pakuti iye akhali mfupi.
4 Tenepo, iye adathamanga kutsogolo ndipo adakakwira m’muti wa mkuyu kuti amuwone, thangwe Jezuyo angadapita na pamwepo.
5 Pomwe Jezu adafika pa mbuto imweyo, adanyang’anisa m’dzaulu ndipo adamuuza kuti: “Zakeu, buluka mwakamfulumize, pakuti lero nin’khala mulendo kumui kwako.”
6 Pomwe adabva bzimwebzi, iye adabuluka mwakamfulumize ndipo adamutambira mwakukondwa kumui kwace ninga mulendo.
7 Pomwe wanthuwo adawona bzimwebzi, wentse adayamba kung’ung’udzika kuti: “Iye wafikira kumui kwa munthu wa pikado.”
8 Tsono Zakeu adaima aciuza Mbuya kuti: “Mbuya, inepano nin’pereka kati na kati ya bzinthu bzangu kwa anyakusauka, ndipo nin’bwezera kanai kentse, bzentse bzomwe ndidatengera ali-wentse mwacinyengo.”
9 Na bzimwebzi, Jezu adamuuza kuti: “Lero cipulumuso cafika pa nyumba ino, thangwe umweyumbo ni mwana wa Abalahamu.
10 Pakuti Mwana wa munthu adabwera kudzalinga na kupulumusa wale omwe akhadataika.”
11 Pomwe anyakupfunza wace akhatetekera bzimwebzi, Jezu adawauza ciratizo cinango, thangwe akhali pafupi na ku Jeruzalemu, ndipo iwo akhakumbuka kuti Umambo bwa Mulungu bungadawonekera pa nthawe imweyireletu.
12 Tenepo iye adati: “Mwana wa mambo* adacita ulendo bwakuyenda ku dziko lakutali kuti akatambire umambo, acibwerera.
13 Tenepo, iye adacemera akapolo wace 10 ndipo adawapasa kobiri 10 za prata,* aciwauza kuti: ‘Citani malonda na kobiri zimwezi mpaka ndikadzabwerera.’
14 Tsono wanthu wa mu dziko lacero akhamuwenga, ndipopa iwo adatumiza aimikiri wawo kuti akamuuze kuti: ‘Ifepano tin’funa lini kuti iwepo ukhale mambo wathu.’
15 “Pambuyo pa kutambira umambobo, iye adabwerera ku dziko lace, ndipo adacemeresa akapolo omwe akhadawapasa kobiri za prata wale kuti adziwe kobiri zomwe iwo akhadaphata pa malondayo.
16 Tenepo, wakuyamba adabwera acidzalewa kuti: ‘Mbuya, na kobiri yanu ya prata ire, ndaphata pomwe kobiri 10 za prata.’
17 Iye adamuuza kuti: ‘Wacita bwino, ndiwe kapolo wabwino! Pakuti wakhala wakukhulupirika pa cinthu cing’ono, uti umbatonge mizinda 10.’
18 Tenepo, waciwiri adabwera acidzalewambo kuti: ‘Mbuya, na kobiri yanu ya prata ire, ndaphata pomwe kobiri zixanu za prata.’
19 Iye adatawirambo umweyu kuti: ‘Iwepombo uti umbatonge mizinda mixanu.’
20 Tsono munangoyo adafikambo aciti: ‘Mbuya, kobiri yanu ya prata ire iyi, ndikhadaibisa pa nguwo.
21 Kulewa cadidi, ndacita bzimwebzi thangwe ra kukugopani, pakuti ndimwe munthu wakunesa; mumbatenga pa bzomwe mulibe kuikha, ndipo mumbabvuna pomwe mulibe kubzala.’
22 Mbuyayo adamutawira kuti: ‘Na mafala yakoya ndikukuyeruza, iwe kapolo wakuipawe. Walewa kuti ndine munthu wakunesa; nimbatenga bzomwe ndiribe kuikha, ndipo nimbabvuna pomwe ndiribe kubzala.
23 Tsono wasayiranyi kukaikha kobiri* yanguyo ku thenthe* kuti ndikabwera ndidzaitambire na cimbadzo?’*
24 “Na tenepo, iye adauza wanthu omwe akhadaima pafupipo kuti: ‘Mutengereni kobiriyo mupase omwe ana kobiri khumi ule.’
25 Tsono iwo adalewa kuti: ‘Mbuya, iye ana kale kobiri khumi za prata!’
26 Iye adawatawira kuti: ‘Ine ndikukuuzani kuti: Ule omwe anabzo, an’dzathumiziridwa acikhala na bzizinji; tsono ule omwe alibe, an’dzatengeredwa napo bzomwe anabzo.
27 Kuthumizira bzimwebzi, abwereseni kuno anyamadulanthaka wangu omwe akhafuna lini kuti ndikhale mambo wawo, ndipo muwaphe pamaso pangu.’”
28 Pomwe adamala kulewa bzimwebzi, iye adapitiriza ulendo bwace bwakuyenda ku Jeruzalemu.
29 Pomwe adafika pafupi na ku Betifaje na Betaniya, pa phiri lomwe likhacemeredwa Phiri la Miolivera, iye adatuma anyakupfunza wace awiri,
30 ndipo adawauza kuti: “Ndokoni m’mudzi omwe mukuuwonayu, ndipo mukapita m’mwemo, munkagumana mwana wa bulu wacimuna omwe akanati kupakiridwa na munthu, adamangiriridwa pa muti. Kamutsudzuleni mucibwera naye kuno.
31 Tsono munthu akakubvunzani kuti: ‘Thangwe ranyi mukutsudzula buluyu?’ Mutawireni kuti: ‘Mbuya akumufuna.’”
32 Tenepo, anyakupfunza awiriwo adayendadi ndipo adagumana mwana wa buluyo ninga momwe akhadauzidwira.
33 Tsono pomwe iwo akhatsudzula buluyo, wenekaciro adabvunza kuti: “Thangwe ranyi mukutsudzula buluyu?”
34 Iwo adatawira kuti: “Mbuya akumufuna.”
35 Iwo adabweresa mwana wa buluyo kuna Jezu, acitandika bzakubvala bzawo bza kunja pa msana pa buluyo ndipo Jezuyo adamupakira.
36 Pomwe iye akhayenda, wanthu akhatandika bzakubvala bzawo bzakunja mu mseu.
37 Pomwe adafika pafupi na mseu omwe ukhacokera ku Phiri la Miolivera, thimu lentse la anyakupfunza lidayamba kukondwa licitumbiza Mulungu mwakukuwa, thangwe iwo akhadawona mabasa ya mphanvu yomwe iye akhadacita.
38 Iwo adati: “Wakusimbidwa ngule omwe akubwera ninga Mambo mu dzina la Yahova! Mtendere kudzulu, ndipo ulemerero kwa imwe omwe muli kudzulu!”
39 Na bzimwebzi, Afarizeu winango omwe akhali pa thimulo adamuuza kuti: “Mpfunzisi, auzeni anyakupfunza wanuwa kuti anyamale.”
40 Tsono iye adawatawira kuti: “Ndikukuuzani kuti, iwo angadanyamala, minyala ndiyo ingadakuwa.”
41 Pomwe adafika pafupi na Jeruzalemu, iye adanyang’anisa mzindayo aciulirira.
42 Iye adati: “Ndikhafuna kuti uzindikire bzinthu bzomwe bzingadakupasa mtendere, tsono bzinthu bzimwebzo bzabisidwa kwa iwepo kuti uleke kubziwona.
43 Thangwe zin’dzafika ntsiku zomwe anyamadulanthaka wako, an’dzamanga litsito la miti yakusongoka, ndipo iwo an’dzakuzungulira acikuboneresa mu mbali zentse.
44 Iwo an’dzakupfudza pabodzi na wana omwe unawo, ndipo an’dzasiya lini mwala padzaulu pa mwala unzace, thangwe ulibe kuzindikira kuti nthawe yakutongedwa* kwako ikhadafika.”
45 Patsogolo pace, iye adapita mu templo ndipo adayamba kuthotha wentse omwe akhagulisira m’mwemo.
46 Ndipo iye adawauza kuti: “Bzidanembedwa kuti: ‘Nyumba yangu in’dzacemeredwa nyumba yakucitira mipembo,’ tsono imwepo mukuisandusa mbuto yakubisalikira mbava.”
47 Iye adapitiriza kumbapfunzisa ku templo ntsiku zentse. Tsono atsogoleri wa antsembe, anembi na akulu-akulu wa mbumba akhanyang’ana njira ya momwe angamuphere;
48 tsono iwo akhagumana lini mpata wakucitira bzimwebzi, thangwe wanthu akhapitiriza kukhala naye kuti abvesere bzomwe iye akhapfunzisa.
Mafala ya m'nyantsi
^ Ayai, “mpfumu.”
^ Mafala yace caiyo: “mina.” Mina ibodzi yacigerego ni kobiri zakukwana madrakima 100.
^ Mafala yace caiyo: “prata.”
^ Ayai, “banko.”
^ Ayai, “juro.”
^ Mafala yace caiyo: “kuzonderedwa.”
