Ya m’Bukhu la Luka 5:1-39
5 Pa nthawe inango, iye akhali mphepete mwa thawale la Jenezareti,* ndipo thimu la wanthu likhapsindizana m’mbali mwace kuti libve mafala ya Mulungu.
2 Ndipo iye adawona mimwadiya miwiri idatsamisa mphepete mwa thawalero, tsono akhombwe akhadabuluka kale ndipo akhafula bwazi bwawo.
3 Tenepo, iye adapakira mwadiya m’bodzi omwe ukhali wa Simau ndipo adakumbira kuti augwinyire m’madzi pang’ono. Patsogolo pace iye adakhala m’mwadiyamo aciyamba kupfunzisa wanthuwo.
4 Pomwe adamala kulewalewa, adauza Simau kuti: “Capa kuti tiyende pomwe pana madzi yakuzika, ndipo thusani bwazi bwanu kuti muphe ntsomba.”
5 Tsono Simau adalewa kuti: “Mpfunzisi, ifepano taphata basa usiku bwentse koma tiribe kuphata cinthu, tsono pakuti mwalewa ndimwe, nin’thusa bwazibu.”
6 Pomwe adacita bzimwebzo, iwo adaphata ntsomba zizinji. Ndipo bwazi bwawobo budayamba kung’ambika.
7 Tenepo iwo adapasa cizindikiro anzawo omwe akhali m’mwadiya unango kuti abwere kudzawathandiza. Ndipo iwo adabweradi acidzaza mimwadiya miwiriyo na ntsomba, mwakuti ikhafuna kulubzika.
8 Pakuwona bzimwebzi, Simau Pedru adagodama pamaso pa Jezu acimuuza kuti: “Ndine lini wakuthemera kukhala namwe pafupi Mbuya, thangwe ndine munthu wa pikado.”
9 Pakuti iye pabodzi na anzace adadabwa kwene-kwene thangwe ra kuwanda kwa ntsomba zomwe adaphazo,
10 ndipo Tiyago na Juwau wana wa Zebedeu omwe akhali anzace wa Simauyo, adadabwambo na bzimwebzo. Tsono Jezu adauza Simau kuti: “Leka kugopa. Thangwe kuyambira lero uti umbamedze wanthu.”*
11 Tenepo iwo adapfuwa mimwadiya yawoyo aciyenda nayo pa mcenga, ndipo adasiya bzentse acimutewera.
12 Pa nthawe inango pomwe iye akhali mu mzinda winango, padabwera munthu omwe akhana mapere thupi lentse. Pomwe munthuyo adawona Jezu, adagodama mpaka nkhope yace kukhuya pantsi acidandaulira Jezu kuti: “Mbuya, penu mun’funa, ndipozeni.”
13 Jezuyo adafuthula boko lace ndipo adamukhuya acilewa kuti: “Inde, nin’funa! Pozedwa matenda yako.” Pa nthawe imweyoletu, mapere yaceyo yadamala.
14 Patsogolo pace, Jezu adauza munthuyo kuti aleke kuuza munthu ali-wentse, ndipo adamuuza pomwe kuti: “Koma ndoko ukawonekere kwa antsembe ucikacita cakupereka ninga momwe Mozeji adalewera, kuti cikhale umboni kwa iwo.”
15 Tsono mbiri yace idapitiriza kubvekera ndipo wanthu akhambatsonkhana pabodzi kuti amutetekere acipozedwa matenda yawo.
16 Iye nthawe zizinji akhambayenda kwa yekha m’dambo kuti akapembe.
17 Pa ntsiku inango pomwe iye akhapfunzisa, Afarizeu pabodzi na apfunzisi wa Malamulo wakucokera m’midzi yentse ya Galileya, Djudeya na ku Jeruzalemu akhadakhalambo pamwepo; ndipo Yahova adamupasa mphanvu yakuti ambapoze wanthu.
18 Pamwepo padafikambo amuna omwe akhadanyamula munthu omwe akhadadjedjera bziwalo pa makha. Iwo adayezera kum’pitisa m’nyumbamo kuti akamutule patsogolo pa Jezu.
19 Pakuti alibe kugumana njira yakuti apite thangwe ra kuwanda kwa wanthu, iwo adakwira pa ntsodzi acibulusira makhayo na pakati pa ntsodzipo mpaka kufika pomwe pakhana Jezu.
20 Pomwe iye adawona cikhulupiro cawo adati: “Mwamunawe, pikado zako zalekereredwa.”
21 Tenepo anembi na Afarizeu adayamba kukumbuka m’mitima mwawo kuti: “Mbani umweyu kuti alewe mwakunyoza tenepa? Mbani munango omwe angalekerere pikado kupambula Mulungu?”
22 Tsono Jezu pakuzindikira bzomwe iwo akhakumbuka, adawabvunza kuti: “Thangwe ranyi mukukumbuka bzimwebzi m’mitima mwanu?
23 N’ciyani cidapusa kulewa: ‘Pikado zako zalekereredwa’ ayai ‘Lamuka ufambe’?
24 Tsono, kuti mudziwe kuti Mwana wa munthu ana mphanvu zakulekerera pikado pa dziko la pantsi . . .” iye adauza wakudjedjera bziwaloyo kuti: “Inepano ndikukuuza kuti: Lamuka, tenga makha yako uyende kumui kwako.”
25 Na bzimwebzi, iye adalamuka wentse akuwona, acinyamula makha yomwe akhadagonerayo ndipo adayenda kumui kwace akutumbiza Mulungu.
26 Tenepo wanthu wentse adadabwa, ndipo thangwe ra mantha, adayamba kutumbiza Mulungu acimbati: “Tawona bzinthu bzakudabwisa lero!”
27 Pomwe bzimwebzi bzidamala, iye adacoka pamwepo. Patsogolo pace, iye adawona nyakukhomesa mtsonkho, dzina lace Levi omwe akhadakhala m’cipinda cakukhomesera mtsonkho, ndipo iye adamuuza kuti: “Khala mteweri wangu.”
28 Iye adasiya bzinthu bzentse acilamuka ndipo adayamba kumutewera.
29 Patsogolo pace, Levi adakonza phwando likulu kumui kwace ndipo kumweko kukhana thimu likulu la anyakukhomesa mtsonkho na wanthu winango azinji omwe akhadya nawo* pabodzi.
30 Pakuwona bzimwebzi, Afarizeu na anembi wawo adayamba kung’ung’udzira anyakupfunza wace, acimbalewa kuti: “Thangwe ranyi imwepo mumbadya na kumwa pabodzi na anyakukhomesa mtsonkho na anyakucita pikado?”
31 Pakuwatawira, Jezu adalewa kuti: “Wale omwe ana thanzi labwino ambafunikira lini dotolo, koma wale omwe akuduwala ndiwo ambafunikira.
32 Pakuti ndiribe kubwerera anyakulungama, koma anyakucita pikado kuti akungule.”
33 Iwo adamuuza kuti: “Anyakupfunza wa Juwau na anyakupfunza wa Afarizeu ambabzimana kudya* ndipo ambapembe kawiri-kawiri, tsono anyakupfunza wanuwa ambandodya na kumwa.”
34 Jezu adawatawira kuti: “Kodi imwepo mungacitise kuti axamwali wa namwali wacimuna ambabzimane kudya pomwe namwaliyo anaye pabodzi?
35 Tsono zin’dzafika ntsiku zomwe namwali wacimunayo an’dzacosedwa pakati pawo, mu ntsiku zimwezo, iwo an’dzabzimana kudya.”
36 Ndipo iye adawauza pomwe ciratizo cakuti: “Palibe munthu omwe ambasonerera cigamba cipsa pa cakubvala cakale-kale. Pakuti iye akacita bzimwebzo, cigamba cipsaco cin’dzalekerana na cakubvala cakale-kaleco ndipo cigambaco cin’dzathemerana lini na cakubvalaco.
37 Ndipo palibe omwe angaikhe vinyu ipsa mu nthawa* zakale. Pakuti akacita bzimwebzo, vinyuyo ingang’ambe nthawazo ndipo patsogolo pace, vinyuyo ingataike nthawazo zicidzongeka.
38 Tsono vinyu ipsa, in’funika kuikhidwa mu nthawa zipsa.
39 Palibe munthu omwe akamwa vinyu yakale-kale, ambafuna vinyu ipsa, thangwe ambalewa kuti: ‘Vinyu yakale-kale ire iri bwino kwene-kwene.’”
Mafala ya m'nyantsi
^ Limweri ni dzina linango la nyanza ya Galileya.
^ Mafala yace caiyo: “wanthu wamoyo.”
^ Ayai, “akhadya nawo pameza.”
^ Ayai, “ambacita jejum.”
^ Ayai, “budu la khanda.”
