Ya m’Bukhu la Luka 6:1-49
-
Jezu, “Mbuya wa Sabudu” (1-5)
-
Kupozedwa kwa munthu wakupunduka boko (6-11)
-
Apostolo 12 (12-16)
-
Jezu adapfunzisa wanthu na kuwapoza (17-19)
-
Cikondweso na matsoka (20-26)
-
Kufuna anyamadulanthaka (27-36)
-
Lekani kutonga anzanu (37-42)
-
Kuzindikiridwa thangwe ra bzisapo bzawo (43-45)
-
Nyumba yakumangidwa bwino; nyumba yakusaya aliserse yakulimba (46-49)
6 Ntsiku inango pa Sabudu, Jezu akhapita na m’minda ya tirigu, ndipo anyakupfunza wace akhapulula ngala za tiriguzo acimbapukuta na manja yawo acimbadya.
2 Pomwe Afarizeu winango adawona bzimwebzi adabvunza kuti: “Thangwe ranyi mukucita bzinthu bzomwe mpsakubvumizidwa lini pa ntsiku ya Sabudu?”
3 Tsono pakuwatawira Jezu adalewa kuti: “Kodi mulibe kuwerenga bzomwe Davide na anzace adacita pomwe iwo akhana njala?
4 Kodi iye alibe kupita m’nyumba ya Mulungu, acidya pau zakuperekedwa ntsembe acipasambo amuna omwe akhanawo pabodzi pau zomwe iwo akhafunikira lini kudya koma antsembe okha?”
5 Ndipo iye adathumizira pomwe kuti: “Mwana wa munthu ni Mbuya wa Sabudu.”
6 Pa ntsiku inango pomwe ya Sabudu, iye adapita m’nyumba yakunamatira aciyamba kupfunzisa. Ndipo mu nyumba yakunamatiramo mukhana munthu omwe akhadapunduka boko* lamadidi.
7 Anembi na Afarizeu akhanyang’anisisa kwene-kwene Jezu kuti awone penu angadapoza munthu pa ntsiku ya Sabudu, na cakulinga cakuti agumane mathangwe yakumupasira mulandu.
8 Tsono iye adadziwa bzomwe iwo akhakumbuka; tenepo iye adauza munthu wakupunduka boko ule kuti: “Lamuka ndipo kaime pakati pale.” Munthuyo adalamukadi acikaima pamwepo.
9 Patsogolo pace Jezu adawabvunza kuti: “Kodi lamulo limbabvumiza kucita ciyani pa ntsiku ya Sabudu? Kucita bzabwino ayai bzakuipa? Kupulumusa moyo ayai kupha?”
10 Pambuyo pakunyang’anisa wentse omwe akhali pamwepowo, iye adauza munthuyo kuti: “Futhula boko lako.” Iye adafuthuladi, ndipo bokolo lidalimbiratu.
11 Tsono anembi na Afarizeu adakalipa kwene-kwene, ndipo adayamba kucezerana bzomwe angadacita na Jezu.
12 Pa ntsiku inango, iye adayenda ku phiri kukapemba ndipo adaphuphudza kumweko akupemba kwa Mulungu.
13 Pomwe kudacena, iye adacemera anyakupfunza wace, acisankhula wanthu 12 pakati pawo, omwe iye adawacemera kuti apostolo:
14 Simau, omwe iye adamupasa dzina lakuti Pedru, m’bale wace Andereya, Tiyago, Juwau, Filipi, Bartolomeu,
15 Mateu, Thomasi, Tiyago mwana wa Alufeu, Simau omwe akhacemeredwa “wanyongo,”
16 Djuda mwana wa Tiyago na Djuda Sikaliyoti omwe adadzamupereka.
17 Ndipo Jezu adapolika nawo acikaima pa mbuto ya cigwa, pamwepo pakhana thimu la anyakupfunza wace azinji pabodzi na thimu la wanthu wakucokera ku Djudeya kwentse na ku Jeruzalemu na mphepete mwa nyanza ya ku Tiro na Sidoni. Wentsenewa adabwera kudzamutetekera na kudzapozedwa matenda yawo.
18 Napo wale omwe akhaboneresedwa na mizimu yakuipa akhapozedwa.
19 Ndipo thimu lentse la wanthu likhafunisisa kumukhuya, thangwe mphanvu zikhacoka mwa iye zicipoza wentsewo.
20 Ndipo Jezu adanyang’anisa anyakupfunza wace aciyamba kulewa kuti:
“Wakukondwa ndimwe anyakusauka, thangwe Umambo bwa Mulungu ni bwanu.
21 “Wakukondwa ndimwe omwe muna njala, thangwe mun’dzakhuta.
“Wakukondwa ndimwe omwe mukulira, thangwe mun’dzaseka.
22 “Ndimwe wakukondwa imwe omwe nthawe zentse mumbawengedwa, mumbapambulidwa na wanthu, mumbatukwanidwa acimbalewa kuipa dzina lanu thangwe ra Mwana wa munthu.
23 Kondwani pa ntsiku imweyi ndipo mogamogani na cikondweso, thangwe mabaibai yanu ni makulu kudzulu, pakuti bzimwebzi ni bzomwe makolo yawo yakale yadacitirambo apolofeta.
24 “Koma tsoka kwa imwe anyakudala, thangwe mukutsangalazidwa kale.
25 “Tsoka kwa imwe omwe tsapano mudakhuta, thangwe mun’dzakhala na njala.
“Tsoka kwa imwe omwe tsapano mukuseka, thangwe mun’dzasunama ndipo mun’dzalira.
26 “Tsoka kwa imwe omwe wanthu wentse ambakulewani bzabwino nthawe zentse, thangwe bzimwebzi ni bzomwe makolo yawo yadacitira apolofeta wakunama.
27 “Tsono ndikuuza mwentse omwe mukundibvamwe kuti: Pitirizani kufuna anyamadulanthaka wanu, mbacitirani bzabwino wale omwe ambakuwengani,
28 mbasimbani wale omwe an’kulewani kuipa na kupempherera omwe akukutukwanani.
29 Munthu akakumenyani ku phutu libodzi, perekerani linangolo; ndipo akakutengerani cakubvala canu cakunja, lekani kumuletsa kukutengerani pomwe cakubvala ca mkati.
30 Munthu ali-wentse akakukumbirani cinthu, mupaseni; ndipo munthu akakutengerani cinthu lekani kumukumbira kuti akubwezereni.
31 “Kuthumizira bzimwebzi, bzomwe mukufuna kuti wanthu akucitireni, imwepo muwacitirembo bzibodzi-bodzibzo.
32 “Penu mumbafuna wanthu okha omwe ambakufunani, kodi pana phindu lanyi? Pakuti napo anyakucita pikado, ambafunambo wale omwe ambawafuna.
33 Ndipo mukambacitira bzabwino wale omwe ambakucitiranimbo bzabwino, kodi pana phindu lanyi? Napo anyakucita pikado ambacitambo bzibodzi-bodzibzi.
34 Ndipo mukambafiyalisi wale omwe mukudikhira kuti an’dzakubwezerani, kodi pana phindu lanyi? Napo anyakucita pikado ambafiyalisimbo anyakucita pikado anzawo kuti adzawabwezerembo.
35 Mwakusiyana na bzimwebzi, pitirizani kufuna anyamadulanthaka wanu na kumbawacitira bzabwino ndipo mbafiyalisini mwakusaya kudikhira kubwezeredwa cinthu; pakuti mabaibai yanu yan’dzakhala makulu, ndipo imwepo mun’dzakhala wana wa Mulungu wakudzulu, thangwe iye ambadekera mtima anyakusaya kutenda na anyakuipa.
36 Pitirizani kukhala wa ntsisi ninga momwe Baba wanu aliri wa ntsisi.
37 “Kuthumizira bzimwebzi, lekani kutonga anzanu kuti muleke kudzatongedwambo; ndipo lekani kupasa mulandu anzanu kuti muleke kudzapasidwambo mulandu. Pitirizani kulekerera anzanu, ndipo imwepo mun’dzalekereredwambo.
38 Khalani wakupasa, ndipo wanthu an’dzakupasanimbo. Iwo an’dzakukhuthulirani pa khanza lanu na mphimo yabwino, yakutsindira bwino, yakusukusidwa na yakutaikira na mpololo. Thangwe mphimo yomwe mun’pimira nayo winango, ndiyo yomwe iwo an’dzakupimiranimbo nayo.”
39 Patsogolo pace iye adawauzambo ciratizo cakuti: “Kodi zimola angatsogolere zimola mwanzace? Ne. Thangwe wentsewo angagwere m’dindi.
40 Nyakupfunza angapose lini mpfunzisi wace, koma ali-wentse omwe an’pfunzisidwa bwino, an’dzandendemerana na mpfunzisi waceyo.
41 Thangwe ranyi iwepo ukunyang’anisa kacitsotso komwe kali m’diso la m’bale wako, pomwe iwepo ukuzindikira lini cimuti comwe ciri m’diso lako?
42 Kodi iwepo ungauze tani m’bale wako kuti: ‘M’balewe, leka ndikucose kacitsotso m’diso lako,’ pomwe iwepo ukuwona lini cimuti comwe ciri m’diso lako? Wacinyengowe! Yamba wacosa cimuti comwe ciri m’diso lako, ndipo ukamala un’dzawona bwino momwe ungacosere kacitsotso komwe kali m’diso la m’bale wako.
43 “Palibe muti wabwino omwe umbabala bzisapo bzakuipa, ndipo palibe muti wakuipa omwe umbabala bzisapo bzabwino.
44 Pakuti muti uli-wentse umbadziwika thangwe ra bzisapo bzace. Mwa ciratizo, wanthu ambatca lini nkhuyu pa muti wa minga, ayai uva pa muti wa minga.
45 Munthu wabwino, ambalewa bzinthu bzabwino thangwe mu mtima mwace mudadzala bzinthu bzabwino. Tsono munthu wakuipa, ambalewa bzinthu bzakuipa thangwe mu mtima mwace mudadzalambo na bzinthu bzakuipa; pakuti pamulomo pambacoka bzomwe bzidadzala mu mtima.
46 “Thangwe ranyi imwepo mumbandicemera kuti ‘Mbuya, Mbuya!’ koma mumbacita lini bzomwe nimbalewa?
47 Ali-wentse omwe anibwera kwa ine acibva mafala yangu na kuyateweza, nin’kuuzani kuti iye ali ninga yani:
48 Iye ali ninga munthu wakumanga nyumba omwe adacera mwakuzika acimanga aliserse pa mwala. Ndipo pomwe madzi yadadzala mu mkulo, madziyo yadamenya na mphamvu nyumbayo, tsono yalibe kukwanisa ne na kuitekenyesako, thangwe ikhadamangidwa bwino.
49 Mwakusiyana na bzimwebzi, ule omwe ambabva mafala yangu acisaya kuyateweza, ali ninga munthu omwe adamanga nyumba yakusaya aliserse pa mataka. Ndipo madzi ya mu mkulo yadadzala yacimenya nyumbayo ndipo iyo idagwa pa nthawe ibodzi-bodziyo, icipfudzikiratu yentse.”
Mafala ya m'nyantsi
^ Ayai, “akhadadjedjera boko.”
