Marko 4:1-41
-
BZIRATIZO PAKULEWA BZA UMAMBO (1-34)
-
Nyakubzala mbeu (1-9)
-
Thangwe lomwe likhacitisa Jezu kuphatisa basa bziratizo (10-12)
-
Kufotokozedwa kwa ciratizo ca nyakubzala mbeu (13-20)
-
Kandiyero imbagwanankhiridwa lini pantsi pa citundu (21-23)
-
Mphimo yomwe imwepo mumbapimira (24, 25)
-
Nyakubzala mbeu omwe akugona (26-29)
-
Kanjere kang’ono-ng’ono (30-32)
-
Kuphatisa basa bziratizo (33, 34)
-
-
Jezu adaimisa conzi camphanvu (35-41)
4 Jezu adayamba pomwe kupfunzisa m’mphepete mwa nyanza, ndipo thimu likulu la wanthu lidatsonkhana pomwe pakhana iyepo. Tenepo, iye adapakira mwadiya acikhala, ndipo adaugwinyira m’madzi pang’ono, tsono thimu lentse la wanthulo likhadaima mphepete mwa nyanzamo.
2 Iye adayamba kuwapfunzisa bzinthu bzizinji mwakuphatisa basa bziratizo, ndipo pomwe akhawapfunzisapo, iye adawauza kuti:
3 “Tetekerani. Munthu munango adayenda kukabzala mbeu.
4 Pomwe iye akhabzala, mbeu zinango zidagwera m’mphepete mwa mseu, ndipo mbalame zidabwera zicidya mbeuzo.
5 Zinango zidagwera pa minyala pomwe pakhana mataka mang’ono-ng’ono ndipo zidamera mwakamfulumize thangwe matakayo yakhali lini mazinji.
6 Tsono pomwe dzuwa lidakwira, zidapsa, ndipo thangwe rakuti zikhalibe mizi, zidafota.
7 Mbeu zinango zidagwera pa minga, ndipo mingayo idakula icitazisa mbeuzo kukula, mwakuti ziribe kubala bzisapo.
8 Tsono zinango zidagwera pa mataka yabwino ndipo zidamera zicikula. Izo zidayamba kubala bzisapo; zinango zidabala bzisapo 30, zinango 60 ndipo zinango kupitirira 100.”
9 Ndipo iye adathumizira kuti: “Omwe ana makutu yakubva, abve.”
10 Pomwe iye akhadakhala payekha, omwe akhanaye pafupi, pabodzi na anyakupfunza wace 12 wale, adayamba kumubvunza bza bziratizo bzomwe akhadalewabzo.
11 Iye adawatawira kuti: “Imwepo mwapasidwa mwayi wakubvesesa cintsintsi cakupambulika ca Umambo bwa Mulungu, tsono kwa wale omwe ali kunja, bzinthu bzentse bzimbafotokozedwa na bziratizo,
12 kuti iwo ambanyang’anise, koma aleke kuwona, ndipo ambabve koma aleke kubvesesa thandauzo lace. Na tenepo iwo cipo acibwerera kwa Mulungu kuti alekereredwe.”
13 Ndipo adawauzambo kuti: “Imwepo mulibe kubvesesa ciratizoci, tsono kodi mungabvesesembo tani bziratizo bzinango bzentse?
14 “Munthu wakubzala mbeu ule, adabzala fala la Mulungu.
15 Wanthu winango ali ninga mbeu yomwe idagwera m’mphepete mwa mseu; iwo akandobva falalo, Sathani ambabwera acicosa fala lomwe likhadabzalidwa mu mtima mwawomo.
16 Winango ali ninga mbeu yomwe idabzalidwa pa minyala: iwo akandobva falalo, ambalibvuma mwakukondwa.
17 Iwo ambakhala alibe mizi mwa iwo okha, ndipo ambapitiriza mu kanthawe kakucepa. Tsono citsautso ayai cizunzo cikandoyamba thangwe ra falalo, iwo ambaluza cikhulupiro cawo.*
18 Ndipo pana mbeu zinango zomwe zidabzalidwa pa minga. Mbeu zimwezi ni wanthu omwe ambabva fala,
19 tsono thangwe ra thupo na bzinthu bza m’dziko lino* pabodzi na mphanvu yakupumpsa ya cuma na kufuna bzinthu bzentse, bzimbapita mu mtima mwawo, bziciphingiza falalo, ndipo ambabala lini bzisapo.
20 Pakumalizira pace, mbeu zomwe zidabzalidwa pa mataka yabwino, ni wale omwe ambabva falalo acilitambira na mtima wentse ndipo ambabala bzisapo, 30, 60 na 100.”
21 Iye adawauza pomwe kuti: “Palibe munthu omwe ambagasa kandiyero aciigwanankhira na citundu ayai aciibisa pantsi pa kama. Koma iye ambaiikha pa mbuto yakuikhira kandiyero.
22 Palibe cinthu cakubisika comwe cin’dzadziwika lini; ndipo palibe cinthu comwe cidabisidwa bwino-bwino comwe cin’dzawonekera lini padeca.
23 Ali-wentse omwe ana makutu yakubva, abve.”
24 Ndipo iye adawauza pomwe kuti: “Tetekerani mwatceru bzomwe mukubvabzi. Pakuti mphimo yomwe imwepo mumbapimira, ndiyo yomwe an’dzakupimiranimbo nayo, ndipo an’dzathumizira bzizinji kwa imwepo.
25 Pakuti omwe anabzo, an’dzathumiziridwa, tsono ule omwe alibe, napo bzomwe akukumbuka kuti anabzo an’dzatengeredwa.”
26 Tenepo, iye adathumizira pomwe kuti: “Mpsibodzi-bodzimbo na Umambo bwa Mulungu, ibo buli ninga munthu omwe ambawaza mbeu pa mataka.
27 Iye ambagona usiku acimuka ku macibese, ndipo mbeuyo imbamera icikula, koma iye ambadziwa lini kuti bzimwebzi bzimbacitika tani.
28 Pang’ono na pang’ono mataka yambabala bzisapo: cakuyamba m’mera umbacoka, patsogolo pace umbakula ucicosa ngala, ndipo pakumalizira pace ngalazo zimbakhuma ndipo tirigu imbawonekera.
29 Tiriguyo ikakhuma, iye ambaigwata na djeko, thangwe nthawe yakubvuna imbakhala yafika.”
30 Ndipo iye adathumizira pomwe kuti: “Kodi Umambo bwa Mulungu tingabundendemezere na ciyani, ayai tingabufotokoze na ciratizo ciponi?
31 Ibo buli ninga kanjere kang’ono-ng’ono.* Pa nthawe yomwe kambabzalidwa, kambakhala kanjere kang’ono kuposa njere zentse za pa dziko la pantsi.
32 Tsono kakabzalidwa, iko kambakula kacikhala cimuti cikulu kuposa miti yentse ya m’dimba ndipo umbakhala na mithambi mikulu-mikulu, mwakuti mbalame zimbakhala mu mthunzi wace.”
33 Na bziratizo ninga bzimwebzi, iye adawapfunzisa mafala ya Mulungu mpaka pomwe iwo adakwanisa kubvesesa.
34 Kulewa cadidi, iye alibe kuwauza cinthu ciri-centse mwakusaya kuphatisa basa ciratizo, koma iye akhakafotokozera anyakupfunza wace thandauzo la bziratizobzo kwa okha-okha.
35 Pa ntsiku imweyire kumaulo, iye adauza anyakupfunza wace kuti: “Mbatiyambukireni ku ng’ambu inango ire.”
36 Pomwe adamala kuuza thimu la wanthulo kuti liyende, anyakupfunza wace adamunyamula na mwadiya omwe iye akhali, ndipo pamwepo pakhana mimwadiya inango.
37 Ndipo kudayambika conzi camphanvu, ndipo mabimbi yakhambamenya mwadiyayo, mwakuti ukhadasala pang’ono kumira.
38 Tsono Jezu akhadagona m’mambuyo, m’mwadiyamo ndipo akhadatsamira mtsago. Tenepo iwo adamulamusa acilewa kuti: “Mpfunzisi, imwepo mukuwona lini kuti tikufa?”
39 Iye adamuka ndipo adatsimula conzico aciuza nyanzayo kuti: “Derekha! Khala zii!” Tenepo conzico cidalekeza, ndipo kudakhaladi zii.
40 Patsogolo pace, iye adawabvunza kuti: “Thangwe ranyi mukucita mantha tenepa? Kodi mukalibe cikhulupiro?”
41 Tsono iwo adabva mantha kwene-kwene, ndipo adayamba kumbabvunzana kuti: “Kodi umweyu ni mbani maka-maka? Napo conzi na nyanza bzimbamubvera.”
Mafala ya m'nyantsi
^ Mafala yace caiyo: “iwo ambakhukhumudwa.”
^ Ayai, “mu nthawe ino.” Onani Kafotokozedwe ka Mafala Manango.
^ Onani mafala ya m’nyantsi pa Mateu 13:31.
