Mika 1:1-16
1 Mu ntsiku za Jotamu, Ahazi na Ezekiya amambo wa Djuda, Yahova adalewalewa na Mika* wa ku Moreseti mwakuphatisa basa masomphenya acimuuza bza Samariya na Jeruzalemu kuti:
2 “Bvani, wanthu mwentsenemwe!
Tetekera iwe dziko na bzentse bzomwe bziri m’mwemo,Ndipo Yahova Mbuya Mkululetu akutongeni pa bzomwe mukucita,Yahova acite bzimwebzi pomwe ali mu templo yace yakucena.
3 Onani! Yahova akucoka pambuto yace;Iye an’dzabuluka acifamba m’mapiri ya pa dziko la pantsi.
4 Mapiri yan’dzasungunuka pantsi pa minyendo yace,Ndipo mbuto za cigwa* zin’dzagawika pakati,Ninga phula lomwe laikhidwa* pamoto,Ninga madzi yomwe yakuthululidwa pa mbuto yakupolika.
5 Bzentsenebzi bzin’dzacitika thangwe ra kupanduka kwa Djakobo,Thangwe ra pikado za nyumba ya Jirayeri.
Kodi ni mbani wacitisa Djakobo kupanduka?
Ni Samariya lini?
Ndipo kodi ni mbani wacitisa kuti Djuda akhale na mbuto za padzulu?
Ni Jeruzalemu lini?
6 Nin’dzacitisa Samariya kukhala mudu wa matere,Mbuto yakubzala miti ya uva;Minyala yace nin’dzaithusa* mu cigwa,Ndipo aliserse zace nin’dzazisiya padeca.
7 Bzifanikiso bzace bzentse bzakugoba bzin’dzaphwanyidwa-phwanyidwa,Ndipo mphaso zace zentse zomwe adatambira ninga kupagalidwi zin’dzatenthedwa pa moto.
Nin’dzapfudza bzifanikiso bzace bzentse,
Pakuti iye adagumana bzinthu bzentsenebzi na kobiri ya uputa,Ndipo ibzo bzin’dzakhala bzakupagaliri pomwe maputa ku mbuto inango.”
8 Thangwe ra bzimwebzi nin’dzadandaula na kulira;Nin’dzafamba na cithatha ndipo nin’dzakhala pezi.
Nin’dzalira ninga mphumphi,Ndipo nin’dzadandaula ninga nthiwatiwa.
9 Pakuti cironda cace cingapozedwe lini;Napo Djuda watokonyedwambo.
Cirangoco camwazika mpaka kufika pa cipata ca wanthu wangu ku Jeruzalemu.
10 “Lekani kudziwisa bzimwebzi ku Gati;Ndipo lekani kulira na pang’onopo.
Bvunvulikani pa pfumbi ku Beti-afra.*
11 Imwe wanthu* wakukhala ku Safiri, fambani muli pezi na mwakucitisa manyazi.
Wanthu* wa ku Zaanani alibe kubula.
Kun’dzabveka kulira ku Beti-ezeli ndipo iye an’dzakuthandizani lini pomwe.
12 Pakuti wanthu* wa ku Maroti akhadikhira bzabwino,Tsono bzakuipa bzakucokera kwa Yahova bzafika pa cipata ca Jeruzalemu.
13 Imwe wanthu* wa ku Lakisi, mangirirani ngolo ku thimu la makavalo.
Iwepo ndiwe omwe udayambisa pikado ya mwana wacikazi wa Ziyoni,Pakuti kupanduka kwa Jirayeri kwagumanika mwa iwepo.
14 Ndipopa iwepo un’dzapereka mphaso zakugonekana kwa Moreseti-gati.
Nyumba za ku Akizibi zikhali cinthu cakupumpswa kwa amambo wa Jirayeri.
15 Imwe wanthu* wa ku Marexa, nin’dzakubwereserani nyakukunda.*
Ulemerero bwa Jirayeri bun’dzafika mpaka kwa Adulamu.
16 Sengani tsisi lanu na kumeta mpala thangwe ra wana wanu omwe mumbawafuna kwene-kwene.
Khalani na mphanza ninga ya mphungu,Pakuti iwo ayendesedwa ku ukapolo kutali na imwepo.”
Mafala ya m'nyantsi
^ Limweri ni dzina lacigwatira la Migeli ayai Mikaya, lomwe limbathandauza “Mbani Omwe Ngwakundendemerana na Yahova?”
^ Ayai, “mbuto za gowa.”
^ Ayai, “sera yomwe yaikhidwa.”
^ Mafala yace caiyo: “nin’dzaithululira.”
^ Ayai, “pa nyumba ya Afra.”
^ Mafala yace caiyo: “mkazi.”
^ Mafala yace caiyo: “mkazi.”
^ Mafala yace caiyo: “mkazi.”
^ Mafala yace caiyo: “mkazi.”
^ Mafala yace caiyo: “mkazi.”
^ Ayai, “nyakupamba.”
