Mika 2:1-13
2 “Tsoka kwa wale omwe ambakumbuka bza kupweteka anzawo,Omwe ambakonzekera ali pa kama pawo kuti acite bzakuipa!
Kukacena iwo ambakacita bzimwebzo,Thangwe ana mphanvu zakucitira bzimwebzo.
2 Iwo ambakhumba minda ya anzawo ndipo ambawatengera;Ambakhumbambo nyumba za anzawo, aciwatengera.Iwo ambapamba nyumba ya munthu mwacinyengo,Ndipo ambatengera munthu utaka bwace.
3 Tenepo Yahova walewa kuti:
‘Ndikukonzekera kubweresera tsoka banjali ndipo imwepo mun’dzalithawa lini.*
Mun’dzafamba lini pomwe mwakubzikuza thangwe in’dzakhala nthawe ya tsoka.
4 Pa ntsikuyo wanthu an’dzalewa mwani munango pakulewa bza iwepo,Iwo an’dzalira mwakuwawidwa kwene-kwene thangwe ra iwepo.
Iwo an’dzalewa kuti: “Ifepano tatengeredwa bzinthu bzathu bzentse!
Iye watengera bzinthu wanthu wathu acipasa winango!
Wapereka minda yathu kwa wanthu wakusaya kukhulupirika.”
5 Na tenepo, un’dzakhala lini na munthu wakufuthula cingwe cakupimira,Kuti agawe dziko mu gwere la Yahova.
6 Iwo akupalizira kuti “siyani kupalizira!”“Iwo an’funika lini kupalizira bzinthu bzimwebzi;Ndipo tin’dzacitisidwa lini manyazi!”
7 Imwe wanthu wa nyumba ya Djakobo, imwepo mukulewa kuti:
“Kodi mzimu wa Yahova waneta kupirira?
Kodi bzimwebzi ndibzo bzomwe umbacita?”
Kodi mafala yangu yambacitisa lini kuti bzinthu bzidekere wale omwe ambandibvera?
8 Tsono tsapanopapa wanthu wangu caiwo andiphindukira ninga nyamadulanthaka.
Mwakusaya kubisa, imwepo mumbacosa cakudekesera pa cakubvalaCa wale omwe akufamba mwakubzithemba ninga wanthu omwe akubwerera ku nkhondo.
9 Imwepo mumbathamangisa akazi pakati pa wanthu wangu m’nyumba zawo zakudeka;Mumbacosera wana wawo ulemerero bwangu mpaka kale-kale.
10 Lamukani muyende, pakuti ino ni mbuto lini yakuti mupume.
Thangwe ra bzinthu bzakupswipa, pan’dzawoneka kupfudzidwa, kupfudzidwa kukulu.
11 Munthu akacita bzinthu bzapezi-pezi na bzacinyengo acinama kuti:
“Nin’dzapalizira kwa imwepo pakulewa bza vinyu na bzakumwa bzakuledzeresa,”
Iye ni mpalizi wakuthemera omwe ambalewa mafala yakudekera wanthuwa!
12 Iwe Djakobo, kulewa cadidi, nin’dzatsonkhanisa wanthu wako wentse;Kulewa cadidi, nin’dzatsonkhanisa pabodzi omwe an’dzasala mu Jirayeri,
Nin’dzawaikha pa mbuto ibodzi ninga mabira yomwe yali m’thanga,Ninga thimu la mabira lomwe liri kubusa.Ndipo kun’dzabveka baludya la wanthu azinji.’
13 Ule omwe ambabowola muro ndiye omwe an’dzakhala patsogolo pawo;Iwo an’dzapakuza pamwepo, acikabula na pacipata.
Mambo wawo an’dzakhala patsogolo pawo,Ndipo Yahova an’dzawatsogolera.”
Mafala ya m'nyantsi
^ Mafala yace caiyo: “mun’dzakwanisa lini kucosa makhosi yanu.”
