Mika 6:1-16
6 Ndaphata minyendo, tetekerani bzomwe Yahova akulewa.
Lamukani mulewe nkhani yanu patsogolo pa mapiri,Ndipo mapiri mang’ono-mang’ono yabve fala lanu.
2 Imwe mapiri, bvani mafala ya Yahova,Na imwembo aliserse zakulimba za dziko,Thangwe pana mulandu omwe Yahova an’funa kutonga wanthu wace;Inde, ni mulandu wa Ajirayeri omwe iye an’funa kutonga kuti:
3 “Imwe wanthu wangu, kodi inepano ndakuphonyerani ciyani?
Kodi n’ciyani comwe ndacita kuti munete?
Ndigazeni penu munabo umboni.
4 Pakuti inepano ndidakucosani mu dziko la Edjipito,Ndipo ndidakupulumusani m’dziko la ukapolo;*Ndidatumiza kwa imwepo Mozeji, Aroni na Miriyamu kuti akutsogolereni.
5 Imwe wanthu wangu, ndaphata minyendo, kumbukirani bzomwe Balaki mambo wa Mowabe adacita,Na bzomwe Balamu mwana wa Bewori adamutawiraNa bzomwe bzidacitika kuyambira ku Sitimu mpaka ku GiligaliKuti mudziwe kuti bzomwe Yahova ambacita mpsakulungama.”
6 Kodi nin’dzayenda na ciyani pakukawonekera kwa Yahova?
Kodi nin’dzatenga ciyani pakukagodama pamaso pa Mulungu omwe ambakhala kudzulu?
Kodi ndidzayende na ntsembe zakucita kutentha,Ayai na ng’ombe ya gole libodzi?
7 Kodi Yahova an’dzakomedwa na bzulu bzizinji bza mabira,Ayai na kuwanda kwa mafuta?
Kodi ndipereke mwana wangu wakuyamba kubadwa wacimuna thangwe ra bzakuphonya bzangu,Omwe ni cisapo ca thupi langu thangwe ra pikado yangu?*
8 Munthuwe, iye adakuuza bzomwe mpsabwino.
Kodi n’ciyani comwe Yahova an’funa* kuti ucite?
Iye an’funa kokha kuti umbacite cirungamo* nakuti umbafune kukhala wakukhulupirika,*Nakuti umbafambe mwakubzicepesa na Mulungu wako!
9 Fala la Yahova likucemera mu mzinda;Wale omwe ana nzeru an’dzagopa dzina lanu.
Tetekera cirango* pabodzi na ule omwe watonga kuti ciperekedwe.
10 Kodi cikalipo cuma cakusaya kulungama m’nyumba ya munthu wakuipaNa mphimo* ya efa yakusaya kudzala yomwe njakunyantsa?
11 Kodi ningakhale wakucena* na balantsa yacinyengo,Na cikhwama ca minyala yakupimira yacinyengo?
12 Pakuti wanthu wace wakudala mbakudzala na ciwembo,Ndipo wanthu omwe ambakhala m’mwemo ambanama;Lirime lawo ndacinyengo.
13 “Na tenepo, inepano nin’dzakumenya ndicikupweteka,Ndipo nin’dzakusiya ulibe cinthu thangwe ra pikado zako.
14 Iwepo un’dzadya, tsono un’dzakhuta lini;M’mimba mwako mun’dzakhala mulibe cinthu.
Iwepo un’dzaikha bzinthu pa mbuto yakukhotcerereka, tsono un’dzakwanisa lini kupulumusa bzinthubzo.Bzomwe iwepo un’dzakwanisa kutenga, inepano nin’dzacitisa kuti bzipfudzidwe na anyamadulanthaka wako.
15 Un’dzabzala, tsono un’dzabvuna lini.
Un’dzaponda-ponda maolivera koma un’dzaphatisa lini basa mafuta yaceyo;Ndipo un’dzaponda-ponda uva tsono un’dzamwa lini vinyu yace.
16 Pakuti imwepo mumbateweza malamulo ya Omiri na bzicito bzentse bza nyumba ya Akabe,Ndipo mumbafamba mwakubverana na malango yawo.
Ndipopa nin’dzacitisa kuti ukhale cinthu cakugopswa,Ndipo nin’dzacitisambo wanthu wakukhala m’mwemo kukhala cinthu cakuthemera kuliziridwa muluzi;*Ndipo imwepo mun’dzanyozedwa na wanthu.”
Mafala ya m'nyantsi
^ Mafala yace caiyo: “nyumba ya ukapolo.”
^ Ayai, “thangwe ra pikado ya moyo wangu.”
^ Ayai, “akukumbira.”
^ Ayai, “kuti ukhale wakulungama.”
^ Ayai, “na kuti umbakhale wakudeka mtima na wakukhulupirika pa lufoyi lako.” Mafala yace caiyo: “umbafune lufoyi lacadidi.”
^ Mafala yace caiyo: “mtcamu; mpsimbo.”
^ Onani Mafala Yakuphampha B14.
^ Ayai, “wakusaya mulandu.”
^ Ayai, “cakuthemera kunyazidwa.”
