Obadiya 1:1-21
1 Masomphenya ya Obadiya:*
Pakulewa bza Edomu Yahova Mbuya Mkululetu walewa kuti:
“Tabva mafala yakucokera kwa Yahova,Watumidwa munthu kuti akauze mitundu ya wanthu kuti:
‘Lamukani, mbatikonzekereni kuti tikamenyane naye.’”
2 “Ona! Ndakucitisa kukhala wapezi-pezi pakati pa mitundu ya wanthu;Iwepo ndiwe wakunyozeka kwene-kwene.
3 Kubzikuza kwa mtima wako kwakupumpsa,Iwepo omwe umbakhala m’mbuto zakubisika za minyala mikulu-mikulu,Omwe umbakhala padzaulu pa mapiri, ucilewa mu mtima mwako kuti:‘Mbani angandibuluse pantsi?’
4 Napo ucikonza mbuto yako yakukhala padzulu* kwene-kwene ninga mphungu,Ayai uciikha citsa cako pakati pa nyenyezi,Inepano nin’dzakugwesa kucokera pamwepo,” walewa tenepo Yahova.
5 “Mbava ayai anyakupamba acikubwerera usiku,Kodi angadatenga lini kokha bzomwe akufuna?
Ayai anyakubvuna uva acikubwerera
Kodi angadakusiira lini uva bunango kuti uphalasire?Tsono iwepo un’dzapfudzidwiratu na anyamadulanthaka wako!*
6 Mbadwa za Esau zikunyang’anidwa!
Ndipo cuma cawo cakubisika cikunyang’anidwambo!
7 Wanthu wentse omwe udacita nawo mpangano akupumpsa,
Ndipo akuthamangisira kunja kwa madziko yawo.
Wanthu omwe ukhakhala nawo pa mtendere adakukunda.
Wanthu omwe akudya nawe pabodzi an’dzakuteyera diwa* kuti akuphate,Tsono iwepo un’dzazindikira lini bzimwebzo.
8 Yahova walewa kuti: Pa ntsiku imweyo,”“Kodi nin’dzapfunza lini wanthu wanzeru wa mu Edomu?Kodi nin’dzapfunzambo lini wanthu wakuzindikira wa mphimpha ya mapiri ya Esau?
9 Iwe Temani, anyankhondo wako an’dzacita mantha,Thangwe ali-wentse wa mphimpha za mapiri ya Esau an’dzaphedwa.
10 Thangwe ra ciwembo comwe wacitira m’bale wako Djakobo,Manyazi yan’kubwerera,Ndipo un’dzanyembereka mpaka kale-kale.
11 Pa ntsiku yomwe udandoima ucinyang’anisa,Pa ntsiku yomwe anyamadulanthaka adatenga acikunda wa Djakobo aciyenda nawo ku ukapolo,Pomwe anyamadulanthaka adapita na pa msuwo wace acicitira vima-vima Jeruzalemu,Iwepo udacita bzinthu ninga m’bodzi wawo.
12 Iwepo ukhafunika lini kukomedwa pa ntsiku ya kutsautsika kwa m’bale wako,Ukhafunika lini kukomedwa pa ntsiku ya kupfudzidwa kwa Adjuda,Ndipo ukhafunika lini kulewalewa mwakubzikuza kwene-kwene pa ntsiku ya kubonera kwawo.
13 Iwepo ukhafunika lini kupita na pa msuwo pa wanthu wangu pa ntsiku ya kubonera kwawo,Ukhafunika lini kukondwa na kutsautsika kwa wanthu wangu pa ntsiku ya kubonera kwawo,Ndipo ukhafunika lini kupamba cuma cawo pa ntsiku yomwe tsoka lidawabwerera.
14 Iwepo ukhafunika lini kukhala pa mphambano za m’miseu kuti uphe anyakuthawa,Ndipo ukhafunika lini kupereka wanthu omwe akhadapulumuka pa ntsiku ya tsoka.
15 Pakuti ntsiku yomwe Yahova an’dzapfudza mitundu yentse ya wanthu iri pafupi.
Bzomwe wacitira m’bale wako, bzin’dzakucitikirambo.
Bzomwe iwepo wacitira winango, bzin’dzakucitikirambo.
16 Pakuti ninga momwe imwepo mudamwera vinyu pa phiri langu lakucena,Wanthu wa mitundu yentse an’dzapitiriza kumwambo ukali bwangu ninga vinyu.
Kulewa cadidi iwo an’dzamwa acikhudyula ukali bwangubo.Ndipo bzin’dzakhala ninga kuti iwo kukhalibe.
17 Tsono wale omwe an’dzapulumuka, an’dzakhala m’Phiri la Ziyoni,Iro lin’dzakhala lakucena,Ndipo nyumba ya Djakobo in’dzatenga pomwe bzinthu bzace bzomwe ikhadatengeredwa.
18 Nyumba ya Djakobo in’dzakhala moto,Nyumba ya Zuze in‘dzakhalambo moto,Ndipo nyumba ya Esau in’dzakhala mauswa,Iwo an’dzaitentha mpaka yentse kukhala dotha,Ndipo palibe omwe an’dzapulumuka pa nyumba ya EsauPakuti Yahova caiyeyo walewa bzimwebzo.
19 Iwo an’dzatenga Negebe na mphimpha ya mapiri ya Esau,Ya Sefela na dziko la Afilisteu.
Iwo an’dzatengambo mphimpha ya Efraimu na mphimpha ya Samariya,Ndipo Benjamini an’dzatenga Jiliyadi.
20 Dziko la Kanani mpaka ku Zarefati lin’dzakhala la wanthu omwe adatengedwa ku ukapolo, omwe ni wana wa Jirayeri,Ndipo wanthu wa ku Jeruzalemu omwe adatengedwa ku ukapolo omwe akhali ku Sefaradi, an’dzatenga mizinda ya Negebe.
21 Ndipo anyakupulumusa an’dzakwira pa phiri la Ziyoni,Kuti atonge mphimpha ya mapiri ya Esau,
Ndipo utongi bun’dzakhala bwa Yahova.”
Mafala ya m'nyantsi
^ Kuthandauza “Mtumiki wa Yahova.”
^ Ayai pinango, “ucimbuluka m’dzaulu.”
^ Ayai pinango, “Momwe iwepo un’dzapfudzidwira.”
^ Ayai, “msampha.”
