Ozeya 1:1-11

  • Mkazi wa Ozeya na wana omwe adabereka (1-9)

    • Jezireli (4), Lo-ruhama (6) na Lo-ami (9)

  • Cidikhiro ca kutsudzulidwa ku ukapolo na ciphatano (10, 11)

1  Yahova adalewalewa na Ozeya* mwana wa Beeri mu ntsiku za Uziya, Jotamu, Ahazi na Ezekiya amambo wa Djuda na mu ntsiku za Jerobowamu mwana wa Jowasi mambo wa Jirayeri. 2  Pomwe Yahova adayamba kuuza wanthu mafala yace mwakuphatisa basa Ozeya, Yahova adati kwa Ozeyayo: “Lowola mkazi omwe an’dzakhala puta ndipo udzakhale na wana thangwe ra uputa bwacebo, pakuti thangwe ra uputa dzikoli lasiiratu kutewera Yahova.” 3  Tenepo, Ozeya adayenda kukalowola Gomeri, mwana wa Diblaimu ndipo Gomeriyo adamuberekera mwana wacimuna. 4  Ndipo Yahova adauza Ozeya kuti: “Mwanayo um’pase dzina lakuti Jezireli,* thangwe tsapanopapa nin’langa wana wa Jewu thangwe adapha Jezireli ndipo nin’dzapfudza umambo bwa Jirayeri. 5  Pa nthawe imweyo, nin’dzatcola uta bwa Jirayeri m’cigwa ca Jezireli.” 6  Patsogolo pace, Gomeri adakhala pomwe na pathupi acibereka mwana wacikazi ndipo Mulungu adauza Ozeya kuti: “Mwanayu um’pase dzina lakuti Lo-ruhama,* pakuti nin’dzabvera lini pomwe ntsisi nyumba ya Jirayeri, kulewa cadidi nin’dzawathotha. 7  Koma nin’dzabvera ntsisi nyumba ya Djuda ndipo nin’dzawapulumusa mwakuphatisa basa mphanvu za Yahova Mulungu wawo, ndipo nin’dzawapulumusa lini mwakuphatisa basa uta, xipada, nkhondo, makavalo ayai anyakupakira pa makavaloyo.” 8  Pomwe Gomeri adaletsa Lo-ruhama kumama, adakhala pomwe na pathupi acibereka mwana wacimuna. 9  Ndipo Mulungu adalewa kuti: “Um’pase dzina lakuti Lo-ami,* thangwe imwepo ndimwe lini wanthu wangu ndipo ine nin’dzakhala lini Mulungu wanu. 10  “Ndipo Ajirayeri* an’dzawanda ninga mcenga wa m’nyanza, omwe palibe munthu omwe angakwanise kuupima ne kuulewenga. Ndipo ku mbuto komwe akhauzidwa kuti, ‘Imwepo ndimwe lini wanthu wangu,’ an’dzauzidwa kuti, ‘Imwepo ndimwe wana wa Mulungu wamoyo.’ 11  Ndipo Adjuda na Ajirayeri an’dzatsonkhanisidwa pabodzi acikhala wakuphatana, ndipo iwo an’dzasankhula mtsogoleri m’bodzi acicoka m’dzikolo, pakuti ntsikuyi in’dzakhala yakufunika kwene-kwene kwa Jezireli.

Mafala ya m'nyantsi

^ Dzinali ni cigwathwo ca dzina lakuti Ozaiya, lomwe limbathandauza kuti “wakupulumusidwa na Yahova; Yahova wapulumusa.”
^ Kuthandauza kuti “Mulungu an’dzabzala mbeu.”
^ Kuthandauza kuti “kusaya kubvera ntsisi.”
^ Kuthandauza kuti “ni wanthu lini wangu.”
^ Mafala yace caiyo: “wana wa Jirayeri.”
BIBLIYA LAKUSANDULIZIRIDWA LA DZIKO LIPSA
Ozeya 1
Cinyungwe
Werengani Bibliya pa Internet
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt