Zakariya 1:1-21
1 Mu gole laciwiri la utongi bwa mambo Dariyo, pa mwezi wacisere, mpolofeta Zakariya,* mwana wa Berekiya, mzukulu wa Ido, adatambira fala kucokera kwa Yahova lakuti:
2 “Yahova adakalipa kwene-kwene na abareki wanu.
3 “Auze kuti: ‘Yahova wa anyankhondo walewa kuti: “‘Bwererani kwa ine,’ walewa tenepo Yahova wa anyankhondo, ‘ndipo inepano nin’dzabwererambo kwa imwepo,’ walewa tenepo Yahova wa anyankhondo.”’
4 “‘Lekani kukhala ninga abereki wanu omwe apolofeta adawauza kuti: “Yahova wa anyankhondo walewa kuti: ‘Ndaphata minyendo, siyani* njira zanu zakuipa na bzicito bzanu bzakuipa.’”’
“‘Tsono iwo alibe kutetekera ndipo alibe kundibvera,’ walewa tenepo Yahova.
5 “‘Kodi abereki wanu ali kuponi tsapano? Kodi apolofeta adakhala na moyo mpaka kale-kale?
6 Kodi bzomwe ndidauza atumiki wangu, apolofeta, mafala yangu na mitemo yangu bziribe kucitikira abereki wanu?’ Tenepo, iwo adabwerera kwa ine aciti: ‘Yahova wa anyankhondo wacita bzomwe akhafuna kuticitira ndipo wacita mwakubverana na njira zathu na bzicito bzathu.’”
7 Pa ntsiku 24 ya mwezi wacikhumi na ubodzi, omwe ni mwezi wa Sebati,* mu gole laciwiri la utongi bwa mambo Dariyo, Yahova adacitisa inepano, mpolofeta Zakariya mwana wa Berekiya mzukulu wa Ido kuwona masomphenya.
8 “Bukhali usiku, ndipo ndidawona munthu omwe akhadapakira kavalo mfuira, iye akhadaima pakati pa miti ya djambalau yomwe ikhali m’cigwa ndipo m’mbuyo mwace mukhana makavalo mafuira, yakastanyo na macena.”
9 Tenepo, ine ndidabvunza kuti: “Kodi amwewa ni mbani mbuya wangu?”
Anjo omwe akhalewalewa nandeyo adanditawira kuti: “Nin’kuuza kuti amwewa ni mbani.”
10 Munthu omwe akhadaima pakati pa miti ya djambalau ule adati: “Amwewa ni omwe Yahova awatuma kuti afambe-fambe pa dziko la pantsi.”
11 Ndipo iwo adauza anjo wa Yahova omwe akhadaima pakati pa miti ya djambalau ule kuti: “Tafamba-famba m’dziko, tawona kuti dzikolo lidaderekha ndipo palibe cakunesa.”
12 Tenepo anjo wa Yahova adati: “Imwe Yahova wa anyankhondo, kodi mpaka lini mun’pitiriza kuleka kubvera ntsisi Jeruzalemu na mizinda ya Djuda yomwe imwepo mudakalipa nayo kwa magole 70?”
13 Tenepo Yahova adatawira anjo omwe akhalewalewa nandeyo na mafala yabwino na yakutsangalaza.
14 Anjo omwe akhalewalewa nandeyo adandiuza kuti: “Kuwa kuti: ‘Yahova wa anyankhondo walewa kuti: “Nin’dzakhotcerera Jeruzalemu na Ziyoni, inde, nin’dzawakhotcerera na mtima wangu wentse.
15 Ndidakalipa kwene-kwene na wanthu wa mitundu inango omwe ali pa mtendere, thangwe ndikhadakalipa pang’ono basi na wanthu wangu, tsono iwo athumizira tsoka la wanthu wanguwo.”’
16 “Tenepo Yahova walewa kuti: ‘“Nin’dzabvera pomwe ntsisi Jeruzalemu ndipo nyumba yangu in’dzamangidwa pomwe m’mwemo,” walewa tenepo Yahova wa anyankhondo, “ndipo Jeruzalemu an’dzapimidwa na cingwe cakupimira.”’
17 “Kuwa pomwe kuti: ‘Yahova wa anyankhondo walewa kuti: “Mizinda yangu in’dzadzala na bzinthu bzabwino mpaka kutaikira, ndipo Yahova an’dzatsangalaza pomwe Ziyoni ndipo an’dzasankhula pomwe Jeruzalemu.”’”
18 Patsogolo pace ndidawona nyanga zinai m’masomphenya.
19 Tenepo, ndidabvunza anjo omwe akhalewalewa nandeyo kuti: “Kodi nyanga zimwezi zikuimira ciyani?” Iye adanditawira kuti: “Zimwezi ni nyanga zomwe zidabalalisa Djuda, Jirayeri na Jeruzalemu.”
20 Patsogolo pace, Yahova adandiwonesa amisiri anai.
21 Ine ndidabvunza kuti: “Kodi amisiriwa akubwera kudzacita ciyani?”
Iye adanditawira kuti: “Zimwezi ni nyanga zomwe zidabalalisa Djuda, mwakuti palibe omwe adakwanisa kulamusa msolo wace. Amisiriwo an’dzabwera kuti adzagopswe na kupfudza nyanga za mitundu inango yomwe idaphatisa basa nyanga zace kuti ibalalise Djuda.”
Mafala ya m'nyantsi
^ Lomwe limbathandauza “Yahova Wakumbukira.”
^ Ayai, “bwererani ku.”
^ Onani Mafala Yakuphampha B15.
