Zakariya 14:1-21
-
Kubwezeresedwa kwa kunamata kwacadidi (1-21)
14 “Tetekerani! Ntsiku ya Yahova ikubwera, ntsiku yomwe anyamadulanthaka wanu an’dzapamba bzinthu bzanu acigawana imwepo mukuwona.
2 Nin’dzatsonkhanisa mitundu yentse ya wanthu kuti imenye nkhondo na Jeruzalemu, mzindayo un’dzakundidwa, bzinthu bza m’nyumba bzin’dzakundidwa ndipo akazi an’dzapswithidwa. Kati na kati ya wanthu wa mu mzindamo an’dzayendesedwa ku ukapolo ndipo anyakusala an’dzapitiriza kukhala mu mzindamo.
3 “Yahova an’dzayenda kukamenyana na wanthu wa mitundu inangoyo ninga momwe adacitira pakumenyana na anyamadulanthaka wace m’mbuyomu.
4 Pa ntsiku imweyo, nzayo zace zin’dzaponda Phiri la Miolivera lomwe liri kutsogolo kwa Jeruzalemu, kumabvadzuwa ndipo Phiri la Mioliveralo lin’dzagawika pakati kucokera kumabvadzuwa mpaka kumadokero ndipo pakati pa mapiriyo pan’dzakhala na cigwa cikulu kwene-kwene. Mbali ibodzi ya phirilo in’dzayenda ku norte ndipo mbali inangoyo in’dzayenda ku suli.
5 Imwepo mun’dzathawira ku cigwa ca mapiri yangu pakuti cigwa ca mapirico cin’dzafika mpaka ku Azeli. Mun’dzathawa ninga momwe mudacitira pakuthawa citeketeke comwe cidacitika mu ntsiku za Uziya mambo wa Djuda, ndipo Yahova Mulungu wangu an’dzabwera ndipo anyakucena wentse an’dzakhala naye pabodzi.
6 “Pa ntsiku imweyo kun’dzakhala kulibe ceza cakupambulika, ndipo bzinthu bzin’dzauma thangwe ra kudjedjera kwene-kwene.
7 Ntsikuyo in’dzakhala yakusiyana na ntsiku zentse ndipo in’dzacemeredwa ntsiku ya Yahova. Kun’dzakhala kulibe masikati ne usiku thangwe usiku bun’dzakhala ninga masikati.
8 Pa ntsiku imweyo, madzi yamoyo yan’dzayerera kucokera ku Jeruzalemu ndipo kati na kati ya madziyo yan’dzayenda ku nyanza* ya kumabvadzuwa, ndipo kati na kati ya madzi manangoyo yan’dzayenda ku nyanza* ya kumadokero. Bzimwebzi bzin’dzacitika m’cirimo na mu nthawe ya mphepo.
9 Ndipo Yahova an’dzakhala mambo pa dziko lentse la pantsi. Pa ntsiku imweyo, Yahova an’dzakhala m’bodzi ndipo dzina lace lin’dzakhalambo libodzi.
10 “Dziko lentse lin’dzakhala ninga Araba, kuyambira ku Jeba mpaka ku Rimoni ku suli kwa Jeruzalemu, ndipo Jeruzalemu an’dzaikhidwa pa mbuto yapadzulu, acikhalidwa na wanthu pa mbuto yace kuyambira ku Cipata ca Benjamini mpaka ku Cipata Cakuyamba mpaka kukafika pa Cipata Capakhona, ndipo kucokerambo pa ntsanza ya Hananeli mpaka kufika pa mbuto yakupondera uva ya mambo.
11 Wanthu an’dzakhala m’mwemo ndipo mzindayo un’dzapasidwa lini pomwe mulandu wakuti upfudzidwe, ndipo wanthu mu Jeruzalemu an’dzakhala mwa mkhomeko.
12 “Cisi comwe Yahova an’dzabweresera wanthu wa mitundu inango omwe an’dzamenyana na Jeruzalemu n’cici: Thupi lawo lin’dzabvunda iwo akana moyo, maso yawo yan’dzabvundambo pomwe yali m’mbuto mwace ndipo lirime lawo lin’dzabvunda mkamwa mwawo.
13 “Pa ntsiku imweyo, Yahova an’dzacitisa phiringu pakati pawo ndipo ali-wentse an’dzaphata boko la mwanzace acimumenya.
14 Djuda an’dzamenyambo nkhondo mwakuthandizira Jeruzalemu ndipo an’dzatsonkhanisa cuma ca wanthu wa mitundu yentse yapafupi. An’dzatsonkhanisa oro, prata na bzakubvala bzizinji.
15 “Ndipo cisi cakundendemerana na cimweci cin’dzabwererambo makavalo, bzirombo bzakuwoneka ninga kavalo, ngamira, mabulu na bzirombo bzentse bzakugumanika m’misasa ya anyamadulanthaka wawo.
16 “Nyakusala ali-wentse wa mitundu yentse ya wanthu omwe adabwera kudzamenyana na Jeruzalemu, an’dzayenda kumweko gole liri-lentse kuti akagodame* pamaso pa mambo, omwe ni Yahova wa anyankhondo, acikacita Phwando la Misasa.
17 Tsono ali-wentse wa m’mabanja ya pa dziko lentse la pantsi akasaya kuyenda ku Jeruzalemu kukagodamira mambo omwe ni Yahova wa anyankhondo, nvula in’dzamubvumbira lini.
18 Ndipo wanthu wa ku Edjipito akasaya kubwera mu mzindayo, nvula in’dzawabvumbirambo lini, m’mbuto mwace, Yahova an’dzawabweresera cisi comwe adabweresera mitundu ya wanthu omwe alibe kuyenda kukacita Phwando la Misasa.
19 Cimweci ni cirango comwe cin’dzabwerera Edjipito pabodzi na mitundu yentse yomwe iribe kuyenda ku Phwando la Misasa, pakuti kucita bzimwebzi ni pikado.
20 “Pa ntsiku imweyo, mafala yakuti ‘Kucena n’kwa Yahova!’ yan’dzanembedwa m’masino yomwe yambakhala m’khosi mwa makavalo, ndipo mapoto* yakuphikira ya m’nyumba ya Yahova yan’dzakhala ninga matijela patsogolo pa guwa la ntsembe.
21 Poto iri-yentse yakuphikira ku Jeruzalemu na ku Djuda in’dzakhala yakucena ndipo in’dzakhalambo ya Yahova wa anyankhondo, ndipo wentse omwe an’dzapereka ntsembe an’dzabwera, acidzaphatisa basa manango mwa mapotoyo kuti aphikire ntsembezo. Pa ntsiku imweyo, m’nyumba ya Yahova wa anyankhondo mun’dzakhala mulibe pomwe Mkanani*.”
Mafala ya m'nyantsi
^ Yomwe ni Nyanza Yakufa.
^ Yomwe ni Nyanza ya Mediteraniyo.
^ Ayai, “akanamate.”
^ Ayai, “mikhate.”
^ Ayai pinango, “nyamalonda.”
