Pa 23 Março, wanthu 12 midyau ayai kuposa ankudikhiridwa kudzagumamika pa Cikumbuso ninga alendo wathu. Wan’dzabva cadidi ca m’Bibliya pomwe mfotokozi wa nkhani an’dzalewa bza mphaso ya cakulombolera ya Yahova na bzisimbo bzinango bzomwe wanthu an’dzatambira. (Zai 11:6-9; 35:5, 6; 65:21-23; Ju 3:16) Tsono, si mfotokozi yekha omwe an’dzapereka umboni pa nthawe yakupambulikayi. Tensenefe tingadzacitembo mbali mwa kudzatambira na manja mawiri alendo wathu. (War 15:7) Mbatiwoneni njira zinango za momwe tingadzacitire.

• M’mbuto mwa kundoyenda kukakhala mucidikhirira kuti mtsonkhano uyambe, tambirani na manja mawiri alendo na Akristau wakudjedjera mwauzimu mwa kuwasekerera, mucimusana nawo mwa mtsangala

• Pomwe munkudikhirira kufika kwa axamwali ayai adzinza wanu womwe mudawacemera, khalanimbo tceru kwa wale womwe wabwera thangwe adatambira mcemo pa kampanya. Kumbirani alendo kuti mukhale nawo pabodzi. Onani nawo Bibliya na bukhu lanu la nyimbo

• Mtsonkhano ukamala, khalani wakukonzeka kutawira mibvunzo. Penu nthawe ingabvumize lini thangwe rakuti gwere linango linkufunambo kuphatisira basa Nyumba ya Umamboyo, citani makonzedwe ya kumuzungira munthuyo mu nsiku zing’ono-ng’ono. Penu mulibe mulewengo wace wa mtedwe, mungamuuze kuti: “Ndinkufunisisa kubva makumbukidwe yanu pa nkhaniyi. Kodi bzingakwanisike tani kuti tidzacezerane pomwe?”