Tikagumana mwana pa mui pomwe tinkupalizira, timbamukumbire kuti tilewelewe na abereki wace. Kucita bzimwebzo, kumbalatiza kuti timbalemekeza udindo bwa aberekiwo. (Mim 6:20) Mwanayo akatiuza kuti tipite nyumba, tin’funika kulamba. Penu abereki wace palibe, tin’funika kudzabwera pomwe pa nthawe inango.

Penu mwanayo ni mkulu pang’ono, pinango na magole yakuthamangira ku ma 15, bzingakhale bwino kukumbira kuti tilewelewe na abereki wace basi. Penu palibe, tingamubvunze penu abereki wace ambamubvumiza kuwerenga mabukhu yakufuna kwace. Akati inde, tingamusiyire marevista yathu, ticimulatizambo saite yathu ya jw.org.

Tikakhala kuti tinkukacita ulendo bwakubwereza kwa tswaka lomwe lidalatiza kuti lin’funisisa kudziwa bzizinji, tingakumbire kudziwana na abereki wace. Kucita bzimwebzo kun’dzatithandiza kuwafotokozera thangwe lomwe tayendera pa muipo ndipo tingawalatize malango yakuthandiza yomwe yambagumanika m’Bibliya kwa mabanja. (Psal 119:86, 138) Kulatiza kwathu ulemu kwa aberekiwo, kun’dzapereka umboni bwabwino ndipo kungatipasembo mpata wakudzapalizira bzipsa bzabwino kwa banja lenselo.—1Pe 2:12.