ALATIZI Alatizi alipo kuti akuthandizeni. Bveranani nawo pa ciri-centse mwakuteweza bzomwe akuuzenibzo pa nkhani ya komwe mungaimise njinga, mota ayai karo yanu, mapitidwe ya wanthu m’mbuto ya mtsonkhanoyo, kakoyedwe ka mbuto na bzinango.

ATHANDIZI WAKUBZIPEREKA Mukafuna kubzipereka kuti muthandize mabasa ya pa mtsonkhanoyu, ndokoni ku cipinda cimweci mukawafotokozere bzimwebzo.

BZAKUPEREKA Padzongedwa kobiri zizinji kuti tikhale na mbuto yabwinoyi, mitcini yakukuzira mafala, mitcini yakuwonesa vidiyo na bzinango kuti tipfatse kukhala pa mtsonkhanoyu, ticithandizidwa kulimbisa uxamwali bwathu na Yahova. Bzakupereka bzanu bza ufulu, bzin’thandiza kupagali bzinthubzo na kuthandizambo basa la pa dziko lentse. Mbuto yentse ya mtsonkhano yaikhidwa makaxa ya bzakupereka. Mungacitembo bzakupereka mwakuphatisira basa donate.pr418.com. Bzakupereka bzentse mpsakufunika kwene-kwene ndipo Bungwe Lakutonga linkukutendani thangwe ra kuthandiza kwanu Umambo bwa Mulungu na mtima wentse.

CIPINDA CA BZAKUTAIKA Cinthu ciri-centse cakulokotedwa, cin’funika kukasiyidwa ku Cipinda ca Bzakutaika. Mukataya cinthu, ndokoni kumweko kuti mukanyang’ane cinthu canuco. Wana omwe asaya abereki wawo, an’dzayendesedwembo ku cipinda cimweci.Tsono, cipindaci cireke kuwonedwa ninga mbuto yakukoyera wana. Taphata minyendo, asamalireni wana wanu, mucikhala nawo pabodzi.

MBUTO YAKUKHALA Taphata minyendo, kumbukirani anzanu. Dziwani kuti mungakoyere mbuto wanthu wa m’banja mwanu okha ayai omwe mumbapfunza nawo Bibliya na ali-wentse omwe mwabwera naye m’karo ibodzi. Lekani kuikha bzinthu pa mbuto zomwe munkukoyera lini munthu.

THANDIZO LA ULAPI Dziwani kuti thandizolo nda matenda yakugwa mwadzidzidzi yokha.

UBATIZO Mipando ya anyakuyenda ku batismo in’dzakoyedwa kutsogolo, kupambula penu palatidwa mbuto inango. Anyakuyenda kukabatizidwa, an’funika kudzakhala m’mipandoyo, ku macibese ya ntsiku ya Sabudu, pomwe nkhani ya ubatizo ikanati kuyamba. Ali-wentse adzabwerese tuwadya na bzakubvala bzakulongosoka kuti adzapite nabzo m’madzi.