MBALI 4
Momwe Mungaphatisire Basa Kobiri
“Bzakulinga bzimbalimbisidwa wanthu wakambacezerana.”—Mimwani 20:18
Tensenefe timbafunika kobiri kuti tikwanise kusamalira mabanja yathu na kugumana bzinthu bzomwe ife timbafunikira. (Mimwani 30:8) Kuposa bzense, “kobiri zimbakhotcerera.” (Mpalizi 7:12) Ninga banja, pinango pense bzingakuneseni kucezerana pa nkhani ya kobiri, tsono lekani kulekerera kuti kobiri zibwerese mabvuto pa malowozi yanu. (Wayefezo 4:32) Wanthu wa pabanja an’funika kukhulupirana winango na mwanzace na kucitira bzinthu pabodzi pomwe akufuna kuphatisa basa kobiri.
1 KONZEKERANI MWAKUSAMALA
BIBLIYA LIMBATI: “Mbani wa imwepo akafuna kumanga nsanza ambayamba lini wakhala pansi na kulewenga kobiri zomwe adzonge, kuti awone penu anazo kobiri zakukwanira za kumalizira nsanzayo?” (Luka 14:28) N’psakufunika kwene-kwene kubverana momwe mukufuna kuphatisira basa kobiri. (Amosi 3:3) Onani bzomwe mukufuna kugula muciwona kuti mungadzonge kobiri zingasi. (Mimwani 31:16) Napo munazo kobiri zakugulira cinthu comwe mungafune, tsono bzikuthandauza lini kuti mungandogule ciri-cense. Yezani kutcenkha mangawa. Phatisani basa kokha kobiri yomwe munayo.—Mimwani 21:5; 22:7.
BZOMWE MUNGACITE:
-
Penu muna kobiri ya pambali pa kumala kwa mwezi, onani pabodzi bzomwe mungacite nazo
-
Penu bzimbakunesani kusamala kobiri, citani ciri-cense kuti mumbaleke kudzonga kobiri zizinji. Mwa ciratizo, mungaphike mwekha cakudya, mbuto mwa kuyenda kukagula cakudya cakuphika kale
2 KHALANI WAKUTSUDZUKA NA KUWONA MOMWE BZINTHU BZIRIRI
BIBLIYA LIMBATI: “Timbasamala bzinthu bzense mwakukhulupirika si pamaso pa Yahova pokha, koma na pamaso pa wanthu.” (2 Wakolinto 8:21) Khalani wakukhulupirika kwa mwanzanu wa m’banja pakulewa cadidi pa kobiri zomwe mumbaphata na kudzonga.
Nthawe zense cezeranani na mwanzanuyo mukafuna kucita cakusankhula cikulu comwe cikufuna kobiri. (Mimwani 13:10) Mukambacezerana pa nkhani ya kobiri bzindzathandiza kuti malowozi yanu yapitirize kukhala na mtendere. Onani kobiri yomwe mumbaphata, sikuti ninga kobiri yanu mwekha koma ya banja lense.—1 Timotio 5:8.
BZOMWE MUNGACITE:
-
Mubverane kobiri yomwe ali-wense angadzonge mwa kusaya kubvunza mwanzace
-
Lekani kudikhira mpaka mabvuto yabwere mukanati kucezerana nkhani ya kobiri
Imwepo Mungakomedwembo na
MITAWIRO YA MIBVUNZO YAKULEWA BZA BIBLIYA
Kodi Bibliya Lingathandize pa Nkhani za Mabvuto ya Cuma na Mangawa?
Kukhala na kobiri kungabweresere lini munthu cikondweso. Tsono nfundo zinai za m’Bibliya zingakuthandizeni kulimbana na mabvuto ya cuma.
