BIBLIYA limbalewa lini nsiku yomwe Jezu adabadwa. Tenepo, iro limbatipasa mathangwe yakubveka bwino kuti iye alibe kubadwa mu Dezembro.

Kumbukirani momwe nyengo ikhaliri mu Dezembro ku Beremu komwe Jezu adabadwira. Mwezi Wacijuda wa Kisilevi (omwe ukhayambira pakati pa mwezi wa Novembro na kumayambiriro kwa mwezi wa Dezembro) ukhali mwezi wakudjedjera ndipo kukhagwa nvula. Mwezi wakutewera ukhali mwezi wa Tebeti (omwe ukhayambira pakati pa mwezi wa Dezembro mpaka kumayambiriro kwa mwezi wa Janeiro). Nyengo imweyi ikhali ya kudjedjera kwene-kwene pa gole, ndipo kukhakhala na madzi yakuuma na ya kudjedjera mu mbuto za kulunduka. Bwerani tiwone bzomwe Bibliya limbatiuza pakulewa bza momwe nyengo ikhaliri ku mbuto imweyi.

Munembi wa Bibliya Ezara adalatiza kuti mwezi wa Kisilevi ukhadziwika kuti ukhali wakudjedjera na wa nvula. Atafotokoza kuti thimu la wanthu likhadatsonkhana ku Jeruzalemu ‘mu mwezi wacipfemba [Kisilevi], pa nsiku ya 20 ya mweziyo,’  Ezara adalewa kuti wanthuwo ‘wakhatetemera . . . thangwe ra nvula yamphanvu yomwe ikhagwa.’ Pakulewa bza momwe nyengo ikhaliri pa nthawe imweyi ya pagole, wanthu womwe akhadatsonkhana adalewa kuti: ‘Tiri mu nyengo ya nvula. Mpsakukwanisika lini kuima panja.’ (Ezara 10:9, 13; Jeremiya 36:22) Mpsakudabwisa lini kuti nthawe ninga imweyi amakabusa wa mbali imweyi ya dziko la pansi akhasiya lini mabira yawo kunja usiku mu mwezi wa Dezembro.

Bibliya limbalewa kuti amakabusa akhali kuthengo kukausa mabira yawo usiku bomwe Jezu adabadwa. Ndipo munembi wa Bibliya Luka adalewa kuti pa nthawe imweyi, amakabusa ‘akhali kuthengo kuusa mabira yawo usiku bwense’ pafupi na Beremu. (Luka 2:8-12) Onani kuti amakabusawo akhacita kugonera kuthengo kumweko, sikuti akhambayenda acimbabwerera nsiku iri-yense. Iwo akhakhala na mabira yawo usiku bwense. Kodi amakabusawo akhakhaladi kuthengo usiku bwense tikakumbukira momwe nyengo ikhaliri ku Beremu mu mwezi wa Dezembro? Ne, bzimwebzi bzingakwanisike lini. Tenepo, bzomwe bzidacitika pa nthawe yomwe Jezu adabadwa bzinkulatiza kuti iye alibe kubadwa mu mwezi wa Dezembro. *

Fala la Mulungu limbatiuza bza nthawe caiyo yomwe Jezu adafa, koma limbalewa lini bzizinji bza nthawe yomwe iye adabadwa. Bzimwebzi bzimbatikumbusa mafala ya Mambo Salomau yakuti: ‘Dzina labwino limbaposa mafuta yabwino, ndipo nsiku yakufa imbaposa nsiku yakubadwa.’ (Mpalizi 7:1) Na tenepo, mpsakudabwisa lini kuti Bibliya limbafotokoza kwene-kwene bza utumiki bwa Jezu na kufa kwace, koma limbalewa lini bzizinji pakulewa bza nthawe yomwe iye adabadwa.