Pfunziro 1
Kodi Bzipsa Bzabwino N’ciyani?
1. Kodi bzipsa bzakucokera kwa Mulungu n’ciani?
Mulungu an’funa kuti wanthu wakondwe na moyo pa dziko la pansi. Iye adalenga dziko la pansi na bzense m’mwemo thangwe iye ambafuna wanthu. Tsapanopa iye an’dzacitisa kuti wanthu wakhale na tsogolo labwino pa dziko lense. Iye an’dzapulumusa wanthu pa bzinthu bzomwe bzimbayambisa mabvuto.—Werengani Jeremiya 29:11.
Palibe boma lidakwanisa kumalisa ciwembo, matenda ayai infa. Tsono pana bzipsa bzabwino. Mulungu an’dzacosa maboma yense ya wanthu aciikha boma lace. Anyakutongedwa na boma lace wan’dzapfatsa na mtendere na moyo wabwino.—Werengani Zaiya 25:8; 33:24; Danyeri 2:44.
2. Thangwe ranyi bzipsa bzabwino bzinkufunika mwakanfulumize?
Kubonera kun’dzamala pokha ipo Mulungu an’dzapfudza anyakuipa pa dziko la pansi. (Sofoniya 2:3) Kodi bzin’dzacitika lini bzimwebzi? Fala la Mulungu lidaleweratu bza mkhalidwe omwe unkuikha wanthu pa ngozi tsapano. Bzakucitika bza tsapano bzinkulatiza kuti nthawe ya Mulungu yakucita mabasa yace iri pafupi.—Werengani 2 Timotio 3:1-5.
3. N’ciani tin’funika kucita?
Tin’funika kupfunza bza Mulungu kucokera m’Fala lace, Bibliya. Iro liri ninga tsamba lomwe baba wa lufoyi watinembera. Iro limbatiuza momwe tingapfatsire na moyo wabwino tsapanopa na moyo wa muyaya pa dziko la pansi kutsogoloku. Cadidi n’cakuti, winango wangakomedwe lini kukuwonani mukuthandizidwa kulibvesesa Bibliya. Tsono mpata wakukhala na tsogolo labwino ngwabwino kwene-kwene ndipo mun’funika lini kuuluza.—Werengani Mimwani 29:25; Cibvumbulutso 14:6, 7.
Imwepo Mungakomedwembo na
BZA IFE
Thangwe Ranyi Tin’funika Kupfunza Bibliya?—Vidiyo Yense
Bibliya linkupereka mitawiro ya mibvunzo yakufunika kwene-kwene kwa wanthu bzulu na bzulu, kuzungulira dziko lense la pansi. Kodi mun’funa kukhalambo m’bodzi wa wanthu amwewo?
