Pfunziro 15
Thangwe Ranyi Imwepo Mun’funika Kupitiriza Kupfunza bza Yahova?
1. Phindu liponi mun’dzagumana mukapitiriza kupfunza Bibliya?
Mwakusaya kupenukira, mapfunziso yakulu-yakulu ya Bibliya yomwe mwawonaya yakhwimisa lufoyi lanu kuna Yahova. Lufoyi limweri lin’funika kukuzidwa nthawe zense. (1 Pedru 2:2) Cidikhiro canu ca moyo wa kusaya kumala cin’bvera imwepo kufenderera Mulungu mwa kupfunza Fala lace.—Werengani Juwau 17:3; Juda 21.
Mukathumizira cidziwiso canu cakudziwa Mulungu, cikhulupiro canu cin’dzalimba. Cikhulupiro cin’dzakuthandizani kukondwesa Mulungu. (Wahebereu 11:1, 6) Bzimwebzi bzin’dzakucitisani kuti mukungule na kucita macinjidwe ya phindu m’mkhalidwe wanu wa moyo.—Werengani Mabasa 3:19.
2. Kodi cidziwiso canu ca Mulungu cin’dzapasa phindu liponi wanthu winango?
Imwepo mungakhale pa uxamwali wakupambulika na Yahova
Mwacibadwa, imwepo mun’dzafuna kuuza wanthu winango bzomwe mwapfunza—ifepano tense timbapfatsa kufokotoza bzipsa bzabwino. Pakupitiriza kupfunza Bibliya, mun’dzapfunza momwe mungaphatisire basa Bibliya kuti mufokotoze kukhulupira kwanu Yahova na bzipsa bzabwino.—Werengani Waroma 10:13,15.
Wanthu wazinji wadayamba kulewa bza bzipsa bzabwino kuna axamwali wawo na wadzinza. Wafokotozereni mwa njira yabwino. Kusiya kuwauza kuti cipembedzo cawo n’cakunama, wauzeni bza mapiciro ya Mulungu. Ndipombo, kumbukirani kuti wanthu kawiri-kawiri wambadabwa na macitidwe yathu yabwino kuposa bzomwe timbalewa.—Werengani 2 Timotio 2:24, 25.
3. Uxamwali bwanyi mungacite na Mulungu?
Kupfunza Fala la Mulungu kun’dzakuthandizani kukula mwa uzimu. Pakumalizira, mun’dzacita uxamwali wakupambulika kwene-kwene na Yahova. Imwepo mun’dzakhala m’bodzi wa pa banja lace.—Werengani 2 Wakolinto 6:18.
4. Mungapitirize tani kuyenda kutsogolo?
Imwepo mungayende kutsogolo mwa uzimu mwa kupitiriza kupfunza Fala la Mulungu. (Wahebereu 5:13, 14) Kumbirani m’bodzi wa Mboni za Yahova apfunze namwe Bibliya mwa kuphatisira basa bukhu Bzomwe Bibliya Limbapfunzisa Pomwe mukupfunza bzizinji bza m’Fala la Mulungu, moyo wanu un’dzakhala wa mpfatso.—Werengani Psalymo 1:1-3; 73:27, 28.
Bzipsa bzabwino bzimbacokera kwa Yahova, Mulungu wakukondwa. Mungafenderere Mulungu mwa kufenderera wanthu wace. (Wahebereu 10:24, 25) Pa kulimbika kukondwesa Yahova, imwepo mun’dzagumana moyo wacadidi—moyo wa muyaya. N’cadidi, kufenderera Mulungu n’cinthu cabwino comwe imwepo mungacite.—Werengani 1 Timotio 1:11; 6:19.
Imwepo Mungakomedwembo na
BZA IFE
Thangwe Ranyi Tin’funika Kupfunza Bibliya?—Vidiyo Yense
Bibliya linkupereka mitawiro ya mibvunzo yakufunika kwene-kwene kwa wanthu bzulu na bzulu, kuzungulira dziko lense la pansi. Kodi mun’funa kukhalambo m’bodzi wa wanthu amwewo?
