Mbiri ya Jezu idabvekera ku mizinda yakutali kwene-kwene. Tenepo, wanthu wakucokera ku mbuto zakusiyana-siyana adayenda kuna Jezuyo kuti akabve bzomwe iye akhapfunzisa, na kuwonambo bzakudabwisa bzomwe iye akhacita.Tsono, pambuyo pa nsiku zing’ono-ng’ono, iye adabwerera ku Kafarinaumu ku mzinda komwe akhakhala kawiri-kawiri. Pomwe adafika kumweko, wanthu wa m’mizinda ya m’mphepete mwa nyanza ya Galileya adabva kuti iye akhadafika. Tenepo, wanthu azinji adayenda pa mui pomwe Jezu akhali. Afarizeu azinji pabodzi na apfunzisi wa cakutonga adayendambo kucokera ku Galileya, ku Judeya na ku Jeruzalemu.

‘Tenepo, wanthu azinji adakonkhana kumweko mwakuti pakhalibe pomwe mbuto yakukhala, thangwe iwo akhadadzala mpaka pa msuwo, ndipo iye adayamba kuwauza bzipsa bzabwino.’ (Marko 2:2) Jezu adacita cinthu cakudabwisa kwene-kwene. Bzomwe adacitabzo bzimbatithandiza kudziwa kuti iye ana mphanvu ya kumalisa mabvuto yomwe wanthu ankugumana nayo, na kupozambo munthu ali-wense.

Pomwe Jezu akhapfunzisa wanthu omwe akhali pamwepowo, amuna anai adabwera na munthu wakulemala adagona pa makha. Iwo akhafuna kuti Jezu apoze xamwali wawoyo. Tsono thangwe ra kudzala kwa wanthuwo ‘iwo adatazira kupita naye na pa msuwo.’ (Marko 2:4) Amunawo adabva ciya kwene-kwene. Tsono iwo adakwira pa nsodzi ya nyumbayo. Ndipo adafungula mphotco pa nsodzipo, acimubulusira na pamwepo nyakulemalayo, omwe akhadagona pa makha.

Tsono kodi Jezu adakalipa na kuti amunawa akhadamugwatiza? Ne napang’onopo. M’mbuto mwace iye adadabwa na cikhulupiro comwe amunawa akhanaco, ndipo adauza nyakulemalayo kuti: ‘Pikado zako zalekereredwa.’ (Mateu 9:2) Kodi Jezu angadakwanisadi kulekerera wanthu pikado zawo? Afarizeu na Anembi adakhumudwa na bzomwe Jezuyo adalewa ndipo adayamba kumbakumbuka m’mitima mwawo kuti: ‘Thangwe ranyi munthu umweyu ankulewalewa tenepa? Umweyi ankunyoza Mulungu. Mbani winango omwe angalekerere pikado kupambula Mulungu yekha?’—Marko 2:7.

Pa kuzindikira bzomwe iwo akhakumbuka, Jezu adawabvunza kuti: ‘Thangwe ranyi munkukumbuka bzimwebzi m’mitima mwanu? Kodi n’ciponi cidapusa kuuza nyakufa bziwalo kuti: “Pikado zako zalekereredwa,” ayai kumuuza kuti: “Lamuka ndipo nyamula makha yako uyende”?’ (Marko 2:8, 9) Inde, mwakubverana na nsembe yomwe Jezu angadadzaipereka, iye angadalekereradi pikado za wanthu.

Patsogolo pace, Jezu adalewa mafala yomwe yadathandiza wanthu wensenewo kuphatanidza na omwe akhamutawiriza lini kudziwa kuti ndiye yekha pa dziko lapansi omwe angalekerere pikado za wanthu. Ndipo iye adanyang’anisa munthu wakufa bziwaloyo acimuuza kuti: ‘Lamuka, nyamula makha yako, ndipo ndoko kumui.’ Tenepo, iye adalamuka, ndipo pa nthawe imweyoletu adanyamula makha yaceyo, aciyamba kufamba pamaso pa wanthu wense. Na bzimwebzo, wanthu wensewo adadabwa, aciyamba kutumbiza Mulungu mwa kumbalewa kuti: ‘Tikanati kale kuwona bzinthu ninga bzimwebzi.’—Marko 2:11, 12.

Pamwepa Jezu adalatiza kuti pana kubverana pakati pa pikado na matenda, ndipo adalatizambo kuti kulekerera pikado kumbabverana na thanzi la munthu. Bibliya limbatipfunzisa kuti Adamu omwe ni baba wathu wakuyamba adaphonya, ndipo tensenefe timbabadwa na mabvuto yomwe yambayamba thangwe ra pikado, ndipo mabvuto yamweyo ni matenda na infa. Tsono Umambo bwa Mulungu bukadzayamba kutonga, Jezu an’dzalekerera pikado za wanthu wense omwe ambatumikira na kufuna Mulungu. Tenepo wanthu an’dzaduwala lini pomwe.—Waroma 5:12, 18, 19.