Wanthu akhacita bzinthu mwakubverana na mitima yawo, ndipo bzikhali bzakusiyana na bzomwe Jezu akhalewa ayai akhacita. Bzimwebzi bzidawoneka bwino pomwe Jezu akhali kumui kwa Mfarizeu munango ku Galileya. Mfarizeuyo dzina lace akhali Simau, iye adacemera Jezu kuti akadye ku mui kwace, pinango adacita bzimwebzi kuti akakhale na mwayi wakuceza na Jezu omwe akhacita bzinthu bzakudabwisa. Jezu adabvuma kuyenda kumui kwa Mfarizeuyo thangwe adawona kuti angadakhala na mwayi wakupalizira wanthu winango omwe akhadacemeredwambo. Kamweka kakhali lini kakuyamba kucemeredwa, thangwe nthawe inango atacemeredwa adayenda, ndipo adakadya pabodzi na anyakukhomesa mtsonkho na anyapikado.

Jezu alibe kutambiridwa ninga momwe alendo wense akhatambiridwira nthawe imweyire. M’miseu yomwe akhafamba ku Palestina, ikhali ya pfumbi ndipo akabvala xango, minyendo ikhapswipa ndipo ikhawawa. Na bzimwebzi kumweko kukhana mwambo wakuti mulendo akafika pamui, akhamusambisa minyendo na madzi yakudjedjera ndipo akhamupsompsona. Tsono pomwe Jezu adafika alibe kumusambisa minyendo ne kumupsompsona ninga momwe akhacitira akatambira mulendo. Mwambo unango omwe ukhacitika ukhali wa kuikha mafuta mu msolo mwa mulendoyo pakulatiza kuti amutambira na manja mawiri, koma iwo alibe kumucitira pomwe Jezu bzimwebzi. Kodi tenepo tingalewe kuti iwo adamutambira?

Alendo wense adakhala mwakuzungulira pa meza ndipo adayamba kudya. Pomwe akhadya, mkazi munango omwe akhalibe kucemeredwa adapitambo m’cipindamo mwakazizizi. ‘Mkaziyo akhadziwika mu mzindamo kuti ngwa pikado.’ (Luka 7:37) Wanthu wense ana pikado, koma bzinkuwoneka kuti mkaziyo akhana makhalidwe yakuipa ndipo pinango akhali puta. Tingalewe kuti iye adabva bzomwe Jezu akhapfunzisa ndipo adabva pomwe akhacemera wanthu ‘wense wakuneta na anyakulemedwa kuti akawadukuze.’ (Mateu 11:28, 29) Bzomwe Jezu akhapfunzisa na bzomwe akhacita, bzidamutokonya mkaziyo ndipo adayamba kumunyang’ana mpaka kumugumana.

Pomwe mkaziyo adapita m’nyumbamo adayenda pomwe pakhana Jezu, acikagodama ku minyendo kwace. Patsogolo pace adayamba kulira, ndipo misozi yace ikhagwera mzayo za Jezu ndipo akhazipukuta na tsisi lace. Adapsompsona minyendo ya Jezuyo acimuikha mafuta yakununcira yomwe akhadayatakula. Simau akhandonyang’anisisa bzomwe bzikhacitikabzo koma bzikhamuipira, ndipo akhalewa mu mtima mwace kuti: ‘Munthuyu angadakhaladi mpolofeta, angadadziwa kuti mkazi omwe ankumuphatayu ni mbani, ndipo mbiri yace iri tani, angadadziwa kuti iye ngwapikado.’—Luka 7:39.

Pomwe Jezu adazindikira makumbukidwe ya Simau, adalewa kuti. ‘Simau, ndin’funa kukuuza cinthu cibodzi.’ Ndipo Simauyo adati: ‘Ndiuzeni Mpfunzisi!’ Tenepo Jezu adati: ‘Amuna awiri adafiyali kwa munthu omwe ambafiyalisi kobiri. M’bodzi adafiyali kobiri zakukwana madinari 500, ndipo munangoyo adafiyali madinari 50. Pomwe adasaya cakupereka kuti amubwezere mangawa yale, mwenekaciro ule adawalekerera wensenewo na mtima wense. Kodi nguponi pa awiriwo omwe angafune kwene-kwene mwenekaciro kobiriyo?’ Simau adatawira kuti: ‘Ndinkuwona kuti ni omwe akhadafiyali zizinjiyu.’—Luka 7:40-43.

Jezu adatawiriza bzomwe Simau adalewabzo. Patsogolo pace, pomwe Jezu akhanyang’anisa mkazi ule adauza Simau kuti: ‘Kodi unkumuwona mkaziyu? Ndapita m’nyumba mwako koma iwepo ulibe kundipasa madzi kuti ndisambisire nzayo zangu. Tsono mkaziyu watotesa nzayo zangu na misozi yace ndipo wazipukuta na tsisi race. Iwepo ulibe kundipsompsona, koma mkaziyu, kuyambira pomwe wandopita muno, iye alibe kuleka kumpsompsona minyendo yangu. Iwepo ulibe kundiikha mafuta mu msolo mwangu, koma mkaziyu wadzola nzayo zangu na mafuta yakununcira. Na thangwe limweri, ndikukuuza kuti pikado zace zalekereredwa, napo kuti n’zizinji kwene-kwene. Ndipopa ankulatiza lufoyi likululi. Koma omwe alekereredwa pikado zakucepa, ambalatizambo lufoyi lakucepa.’—Luka 7:44-47.

Bzomwe Jezu adacitabzo, kukhali lini kulekerera makhalidwe yakuipa. Koma bzidalatiza kuti iye ambabvesesa ndipo ambabvera nsisi wanthu omwe acita pikado zikulu-zikulu, ndipo patsogolo pace ambadzaipidwa na bzomwe adacitabzo ndipo ambakungula aciyenda kwa Kristu kuti akawathandize. Ndipopa mwakusaya kupenukira, mkaziyo adatsangalazidwa pomwe Jezu adamuuza kuti: ‘Walekereredwa pikado zako. . . . Cikhulupiro cako cakupulumusa; ndoko mwa mtendere.’—Luka 7:48, 50.