Pomwe Jezu adandomala kutsimula Afarizeu thangwe ra kumbateweza miyambo ya wanthu, iye adacoka ku Kafarinaumu pabodzi na anyakupfunza wace, aciyenda ku madera ya Tiro na Sidoni m’cigawo ca Fenisiya, kumpoto kwa Kafarinaumu.

Pomwe adafika kumweko, iye adagumana nyumba kuti akhale, koma akhafuna lini kuti wanthu adziwe kuti iye akhali kumweko. Tsono wanthuwo adadziwa basi. Mkazi munango Mgirego omwe akhadabadwira m’dera limweri, adagumana na Jezu, ndipo adayamba kumudandaulira kuti: ‘Ndibvereni nsisi Mbuya, Mwana wa Davide. Mwanangu wacikazi ana dimonyo omwe ambamuboneresa kwene-kwene.’—Mateu 15:22; Marko 7:26.

Padandopita kanthawe, anyakupfunza wa Jezu adamuuza kuti: ‘Muuzeni ayende, thangwe ankukuwa kwene-kwene m’mbuyo mwathumu!’ Mtawiro wa Jezu udalatiza thangwe lomwe iye akhanyamalira. Jezu adawauza kuti: ‘Ndiribe kutumizidwa kwa munthu ali-wense koma kwa mabira yakutaika ya m’nyumba ya Jirayeri.’ Tsono mkaziyo adafendera pakhana iyepo, ndipo adamugodamira, aciti: ‘Ndithandizenimbo ine, Mbuya!’—Mateu 15:23-25.

Pakufuna kuwona penu mkaziyo akhana cikhulupirodi cakulimba, Jezu adaphatisa basa mafala yomwe Ajuda akhayaphatisa basa pakunyoza wanthu wa mitundu inango. Iye adalewa kuti: ‘Si bwino kutenga cakudya ca wana, kuthusira tunkhanda.’ (Mateu 15:26) Pakulewa fala lakuti ‘tunkhanda,’ Jezu adalatiza kuti akhabverambo nsisi wanthu omwe akhali lini Ajuda, ndipo pinango pomwe adalewa mafalaya, nkhope na mafala yace bzidalatiza bzimwebzi.

Tsono, mkaziyo m’mbuto mwa kukalipa na mafalayo, iye adaphatisa basa mafala ya Jezuyo, acitawira kuti: ‘Inde, Mbuya, tsono tunkhandato tumbadyambo mvululu, zomwe zimbagwa kucokera pa citawo ca mbuya wawo.’ Jezu adazindikira mtima wace wabwino, ndipo adamuuza kuti: ‘Mkaziwe, cikhulupiro cako n’cikulu kwene-kwene! Bzicitike ninga momwe unkufunira.’ (Mateu 15:27, 28) Tenepo, mwana wa mkaziyo adalimbiratu, napo akhali ku mui. Pomwe mkaziyo adabwerera ku mui, adakagumana mwanayo adagona pa kama, koma akhali bwino-bwino. ‘Dimonyo ule akhadacoka.’—Marko 7:30.

Patsogolo pace, Jezu na anyakupfunza wace adacoka m’dera la Fenisiyalo aciyendera kumpoto kwa nyanza ya Galileya. Iwo adayambuka mkulo wa Joridano, acifika ku Dekapoli. Kumweko, adakakwira m’phiri linango, tsono thimu la wanthu lidakawagumana kumweko. Wanthuwo adabweresa anyakupunduka, azimola na abewewe, ndipo adawagonesa m’minyendo mwa Jezu ndipo iye adapoza wensenewo. Wanthuwo adadabwa na bzomwe Jezu adacita, acitumbiza Mulungu wa Jirayeri.

Jezu adathandizambo munthu munango omwe akhali bewewe na nkhuthu. Munthuyo akhali lini wakutsudzuka kukhala pakati pa thimu la wanthulo. Pomwe Jezu adazindikira bzimwebzi, adamutenga aciyenda naye pa mphunzu. Ali kwawokhako, Jezu adapitisa bzala bzace m’makutu mwa munthuyo, ndipo adapsipa mata, acikhuya lirime lace. Patsogolo pace Jezu adadjiguma, acilewa mafala yomwe yambathandauza kuti: ‘Funguka.’ Nthawe imweyo, munthuyo adayamba kubva na kulewalewa bwino-bwino. Jezu akhafuna lini kuti bzimwebzi bzidziwike kwa wanthu azinji, thangwe akhafuna kuti wanthuwo ambamukhulupire, sikuti kucokera pa bzinthu bzakundobva, koma kucokera pa bzinthu bzomwe adacita kuwona na kubzibvera okha.—Marko 7:32-36.

Wanthuwo adadabwa kwene-kwene pakuwona kuti Jezu akhana mphanvu zakukwanisa kupozera atenda. Iwo adalewa kuti: ‘Iye ambacita bzinthu bzense bwino-bwino. Ambacitisa kuti ankhuthu abve, nakuti abewewe alewelewe.’—Marko 7:37.