Jezu atamaliza kucita mwambo wa paskwa mu 30 EC padandopita tu nsiku tung’ono-ng’ono Juwau Batista adamangidwa, aciyikhidwa m’kawoko. Juwau akhafuna kuti anyakupfunza wace akhale ateweri wa Jezu, tsono ni wense lini omwe adacita bzimwebzi pa nthawe yense yomwe Juwauyo akhali m’kawoko.

Pomwe nsiku ya paskwa ya mu 31 EC ikhafika, anyakupfunza winango wa Juwau adafenderera Jezu acimubvunza kuti: ‘Thangwe ranyi ifepano na Afarizeu timbabzimana kudya, koma anyakupfunza wanu ambacita lini bzimwebzi?’ (Mateu 9:14) Afarizeu akhawona kuti kucita mcepswo ni mtemo wa cipembedzo. Patsogolo pace Jezu adalewa bza there la Mfarizeu munango omwe akhabziwona ninga wakulungama. Mfarizeuyo pakupemba akhalewa kuti: ‘Imwe Mulungu, ndinkukutendani kuti ndiri lini ninga wanthu winangowa . . . Ndimbabzimana kudya kawiri pa mdzinga uli-wense.’ (Luka 18:11, 12) Pinango anyakupfunza wa Juwau akhawonambo kuti kucita mcepswo ukhali mtemo. Ayai pinango iwo akhacita mcepswo na kuti akhadasunama thangwe Juwau akhali m’kawoko. Wanthu azinji adadabwa pakuwona kuti anyakupfunza wa Jezu akhacitambo lini mcepswo, pinango wanthuwo akhakumbuka kuti anyakupfunza wa Jezuwo akhalibe nsisi na kumangidwa kwa Juwau.

Jezu adawatawira mwakuphatisa basa bziratizo, iye adati: ‘Kodi axamwali wa namwali angasuname uko ali pabodzi na namwaliyo? Koma in’dzafika nthawe yomwe namwaliyo an’dzacosedwa pakati pawo, pamwepo iwo an’dzabzimanambo kudya.’—Mateu 9:15.

Juwau adalewa kuti Jezu akhali ninga namwali wacimuna. (Juwau 3:28, 29) Pa nthawe yomwe Jezu akhana moyo, anyakupfunza wace akhacita lini mcepswo. Patsogolo pace, pomwe Jezu adaphedwa bzikhali bzakubveka kuti anyakupfunza wacewo akhale na msunamo mpaka kuleka kudya. Tsono bzinthu bzidacinja pomwe Jezu adalamusidwa. Anyakupfunza wacewo akhalibe pomwe thangwe la kukhalira na msunamo mpaka kuleka kudya.

Patsogolo pace, Jezu adawafotokozera mathere mawiri, iye adati: ‘Palibe omwe ambasonerera cigamba cipsa pa cakubvala cakale. Pakuti mphanvu ya cigambaco ingapfuwe na kung’amba, cakubvala cakaleco, cicing’ambikiratu kwene-kwene. Ndipo wanthu ambaikha lini vinyu mu nthawa zakale-kale. Akacita bzimwebzo nthawazo zin’dzang’ambika, zicidzongeka, ndipo vinyuyo un’dzataika. Tsono wanthu ambaikha vinyu mupsa mu nthawa zipsa.’ (Mateu 9:16, 17) Kodi Jezu akhafuna kulewa ciyani?

Jezu akhafuna kuthandiza anyakupfunza wa Juwau kuti abvesese thangwe lomwe anyakupfunza wa Jezuwo akhateweza lini mitemo yacijuda ninga kucita mcepswo. Iye alibe kubwera kudzathumizira mitemo ipsa pa mitemo yakale. Ndipo alibe kubwera kudzalimbisa wanthu kuti ambateweze mitemo yomwe ikhadasala pang’ono kusiya kuphata basa. Kunamata komwe Jezu adalimbisa kukhali kwakusiyana  na komwe Ajuda akhacita pa nthawe imweyo, thangwe iwo akhasanganiza mitemo ya Mulungu pabodzi na mitemo yawo. Tsono Jezu angadacita bzimwebzi, bzingadakhala ninga akhasonerera cigamba cipsa pa cakubvala cakale ayai kuikha vinyu mu nthawa zakale-kale.