Apostolo 12 wa Jezu akhadakondwa kwene-kwene thangwe ra kupalizira m’madera yense ya Galileya, ndipo atagumana na Jezu, iwo adamufotokozera ‘bzinthu bzense bzomwe akhadacita na kupfunzisa.’ Apostolowo akhadaneta kwene-kwene, ndipo akhagumana lini nthawe yakuti apume ayai adye pakuti wanthu akhambacoka winango acimbabwera kuti adzawonane na Jezu. Tenepo Jezu adawauza kuti: ‘Tiyendeni ku mbuto yatekha kuti mukapume pang’ono.’—Marko 6:30, 31.

Pinango iwo akhali pafupi na ku Kafarinaumu, ndipo iwo adapakira ngalawa, aciyendera kumabvadzuwa kwa mkulo wa Joridano, ku mbali inango ya Betsaida. Tsono wanthu azinji adabva bzimwebzo, ndipo winango adawona pomwe iwo akhacoka. Tenepo, wanthuwo adathamanga na m’mphepete mwa nyanzayo. Ndipo pomwe ngalawayo idakafika, wanthuwo akhadafika kale.

Pomwe Jezu adabuluka m’ngalawamo, aciwona thimu likulu la wanthuwo, iye adawabvera nsisi, thangwe wanthuwo akhali ninga mabira yakusaya m’busa. Tenepo, iye ‘adayamba kuwapfunzisa bzinthu bzizinji’ bza Umambo bwa Mulungu. (Marko 6:34) Ndipo iye adapozambo ‘omwe akhafunikira kupozedwa.’ (Luka 9:11) Pomwe kukhadoka, anyakupfunza wace adamuuza kuti: ‘Kuno kumbakhalidwa lini na wanthu, ndipo nthawe yapita kale. Auzeni wanthuwa ayende m’midzi kuti akagule cakudya.’—Mateu 14:15.

Jezu adawatawira kuti: ‘Bzin’funika lini kuti iwo ayende; apaseni imwepo cakudyaco.’ (Mateu 14:16) Napo Jezu akhadziwa kale bzomwe angadacita, iye adabvunza Firipi kuti: ‘Kodi tin’kayigula kuponi mikate yakuti wanthu wensenewa adye?’ Jezu adabvunza Firipiyo, thangwe iye akhakhala pafupi na ku Betsaidako. Tsono kugula cakudyaco cingadakwana lini, pakuti akhalipo amuna 5.000, pabodzi na akazi na wana azinjisa. Ndipopa Firipi adamutawira kuti: ‘Napo mikate ya kobiri 200 za denariyo ingakwanire lini wanthu wensenewa, ne kuti munthu m’bodzi-m’bodzi atambire pang’ono pokha.’—Juwau 6:5-7.

Ndipo Andereya pakufunambo kulatiza kuti bzingadakwanisika lini kudyesa wanthu wensenewo, iye adati: ‘Pano pana mulumbwana m’bodzi omwe ana mikate mixanu ya sevada na tunsomba tuwiri. Tsono n’ciyanimbo cimweci kuti bzikwane wanthu wensenewa?’—Juwau 6:9.

Bzimwebzi bzidacitika mkati mwa mwezi wa Março ayai Abril, itasala pang’ono kucitika Paskwa ya mu gole la 32 EC, ndipo mapiri yakhadagudira na mauswa. Jezu adauza anyakupfunza wace kuti akumbire wanthuwo akhale pansi pa mauswapo m’magulu ya 50 ayai 100. Ndipo iye adatenga mikate mixanuyo na nsomba ziwirizo acipemba kwa Mulungu. Patsogolo pace, Jezuyo adabedula mikateyo ndipo adagwata-gwata nsombazo, acipereka kwa anyakupfunza wace kuti agawanise wanthuwo. Ndipo cakudabwisa n’cakuti wanthu wensenewo adadya, acikhuta!

Patsogolo pace, Jezu adauza anyakupfunza wace kuti: ‘Konkhani bzomwe bzasalabzo kuti paleke kudzongedwa ciri-cense.’ (Juwau 6:12) Ndipo bzomwe adakonkhabzo bzidadzala bzitundu 12!