Atandomala kupoza kapolo wa mkulu wa acikunda ule, Jezu adayenda ku Naini mzinda omwe ukhacita mtantho wa kukwana makilometro 32 kucokera ku m’mwera kwa mzinda wa Kafarinaumu. Tsono iye akhali lini yekha. Anyakupfunza wace pabodzi na thimu likulu la wanthu adayenda naye pabodzi. Kukhayamba kale kudoka pomwe iwo akhafika ku mzinda wa Naini. Kumweko adagumana na Ajuda azinjisa omwe akhadanyamula nkhawa. Iwo akhacoka mu mzindamo ndipo akhayenda ku thenje kuti akapendese mulumbwana omwe akhadafayo.

Tsono pa thimu la wanthu omwe akhaperekeza nkhawayo, omwe akhadasunama kwene-kwene akhali mai wa mulumbwanayo. Iye akhali mkazi mansiwa ndipo tsapano mwana wace m’bodzi yekhayo adafa pomwe. Pomwe mwamuna wace adafa, iye akhadasala na mwana wace wakufunidwayo. Bzinkuwoneka kuti mkaziyo akhathemba mwana waceyo kuti ndiye omwe angadadzamuthandiza ku tsogolo. Tsono pomwe mwanayo adafa, mkaziyo akhalibe munthu munango omwe angadakhala naye acimbamulimbisa. Kodi mbani omwe angadadzamusamalira?

Pomwe Jezu adanyang’anisa mkaziyo, adatokonyedwa kwene-kwene na msunamo omwe mkaziyo akhanaye, na momwe bzinthu bzikhaliri pa moyo wace. Tenepo, Jezuyo adauza mkaziyo mwakutsimikiza kuti: ‘Leka kulira.’ Ndipo iye adafendera aciphata makha yomwe akhadatakulira munthu wakufayo. (Luka 7:13, 14) Na bzimwebzi, wanthuwo adaima ndipo adadabwa na bzomwe Jezu adacitabzo. Pinango iwo akhambabzibvunza kuti: ‘Kodi umweyu an’funa kulewanyi na bzimwebzi? Kodi n’ciyani comwe an’funa kucita?’

Kodi tani pakulewa bza wanthu omwe akhadayenda pabodzi na Jezuyo ndipo akhadawona kale iye acipoza matenda yakusiyana-siyana? Iwo akhanati kale kuwona Jezu acilamusa munthu kwa anyakufa. Napo kuti iwo akhadabva na kutali kuti iye akhalamusa anyakufa, koma mpsakukwanisika kuti akhabzibvunza kuti kodi umweyu animulamusambo? (1 Wamambo 17:17-23; 2 Wamambo 4:32-37) Jezuyo adati: ‘Mulumbwanawe, ndinkulewalewa na iwepo, lamuka!’ (Luka 7:14) Ndipo mulumbwanayo adalamukadi aciyamba kulewalewa! Patsogolo pace Jezuyo adamupereka kwa mai wace omwe akhadabwa ndipo akhakondwa kwene-kwene, pakudziwa kuti tsapano akhali lini pomwe wokha.

 Pomwe wanthuwo adawona kuti mulumbwanayo akhanamoyodi, iwo adayamba kutumbiza Yahova omwe ambapereka moyo, mwa kulewa kuti: ‘Mpolofeta mkulu wawonekera pakati pathu.’ Pakuzindikira thandauzo la bzomwe Jezu adacitabzo winango adati: ‘Mulungu waceukira wanthu wace.’ (Luka 7:16) Mbiri ya cakucitika cakudabwisaci idabvekera mwakamfulumize mu mzindamo mpaka ku Nazaleti, mu mzinda omwe Jezu adakulira omwe ukhacita mtantho wa kukwana makilometro 10 kucokera ku Naini. Ndipo mbiriyo idakafika mpaka ku m’mwera kwa Judeya.

Pa nthawe imweyi, Juwau Batista akhali m’kawoko basi ndipo akhafunisisa kudziwa bzakudabwisa bzomwe Jezu akhacita. Anyakupfunza wa Juwauyo ndiwo akhamuuza bzakudabwisabzo. Kodi n’ciyani comwe Juwauyo adacita?