Wanthu adatokonyedwa kwene-kwene pakuwona kuti Jezu adadyesa wanthu azinji mu njira yakudabwisa. Iwo adazindikira kuti Jezu akhalidi ‘Mpolofeta ule omwe akhati angadzabwera pa dziko,’ nakuti akhadathemera kukhala mtongi wabwino. (Juwau 6:14; Bzakutonga 18:18) Tenepo, iwo adapangana kuti aphate Jezuyo, acimukhazika mambo.

Tsono Jezu adazindikira bzomwe wanthuwo akhafuna kucita. Tenepo, iye adauza wanthuwo kuti ayende kumui kwawo, ndipo adauzambo anyakupfunza wace kuti akapakire ngalawa, abakayende. Kodi anyakupfunzawo adayenda kuponi? Adapita na ku Betsaida aciyenda ku Kafarinaumu. Tsono, Jezu adakwira m’phiri yekha-yekha usikubo kuti akapembe.

Pomwe kukhadasala pang’ono kucena, Jezu akhakwanisa kuwona ngalawa ire na patali, pakuti kukhana mwezi. Pa nyanzapo pakhacita conzi camphanvu, mwakuti anyakupfunzawo ‘akhatazira kucapa, pakuti akhalimbana’ na conzico. (Marko 6:48) Jezu adabuluka m’phirimo, ndipo adayamba kufamba padzulu pa madzi, acimbayenda komwe kukhana anyakupfunzawo. Pomwe bzimwebzi bzikhacitika, anyakupfunzawo akhadacapa kale ‘mtantho wa makilometro 5 ayai 6.’ (Juwau 6:19) Anyakupfunzawo pakuwona Jezu ankufamba padzulu pa madzi, iwo adakumbuka kuti yakhali ‘matsomphenya’ ndipo adakuwa na mantha.—Marko 6:49.

Tsono Jezu adawauza kuti: ‘Khwimikani! Ndinepano, lekani kugopa.’ Ndipo Pedru adamutawira, aciti: ‘Mbuya, penu ndimwepodi, ndiuzeni ndibwere pana Imwepopo ndinkufamba padzulu pa madzipa.’ Iye adati: ‘Bwera!’ Tenepo, pomwe Pedru adabuluka m’ngalawa mule, adafamba padzulu pa madzi, aciyenda komwe kukhana Jezu kule. Tsono, pakuwona conzi cire, iye adabva mantha, ndipo pakuti akhayamba kumira, adakuwa, aciti: ‘Ndipulumuseni ine, Mbuya!’ Mwakamfulumize, Jezu adafuthula djanja lace, acimuphata. Ndipo adamuuza kuti: ‘Nandi iwe nyacikhulupiro cing’onowe, thangwe ranyi watsitsimwa?’—Mateu 14:27-31.

Pedru na Jezu adapakira mu ngalawamo, ndipo conzico cidaderekha. Anyakupfunzawo adadabwa kwene-kwene. Tsono kodi iwo akhafunikiradi kudabwa? Penu anyakupfunzawo akhadabvesesa ‘thandauzo’ la cakudabwisa comwe Jezu adacita pa kudyesa wanthu bzulu na bzulu wale, iwo angadafunikira lini kudabwa pakuwona Jezu ankufamba padzulu pa madzi na kuderekhesa conzi. Tsono, thangwe ra kuwona bzomwe bzikhadacitikabzo, iwo adamugodamira, acilewa kuti: ‘Imwepo ndimwedi Mwana wa Mulungu!’—Marko 6:52; Mateu 14:33.

Patandopita nthawe pang’ono, iwo adafika ku ng’ambu ya Djenezaleti, kummwera kwa dera la Kafarinaumu. Mbuto imweyi ikhali ya ndovolo kwene-kwene. Ndipo iwo adatsamisa ngalawa yawo, acibuluka. Wanthu wa m’deramo adazindikira Jezu, ndipo iwo pabodzi na wanthu winango wa m’madera ya pafupipo adabweresa atenda kuti Jezu awapoze. Ndipo atendawo akandokhuya cakubvala cakunja ca Jezuyo, akhaciriratu.

Pomwe bzimwebzi bzikhacitika, wanthu omwe adadyesedwa na Jezu wale adazindikira kuti Jezu akhadacoka m’dera mwawomo. Tenepo, pomwe ngalawa zing’ono-zing’ono zakucokera ku Tiberiya zidafika, wanthuwo adapakira ngalawazo, aciyenda ku Kafarinaumu kuti akanyang’ane Jezu. Pomwe adamugumana, iwo adamubvunza kuti: ‘Kodi Rabi, mwafika lini kuno?’ (Juwau 6:25) Tsono, Jezu adawatsimula. Ndipo thangwe lomwe adawatsimulira linkufotokozedwa mu nkhani inkutewerayi.