Pomwe apostolo akhapalizira ku Galileya, Juwau Batista omwe ndiye adayamba kupalizira bza kubwera kwa Jezu, akhacita magole mawiri ali m’kawoko.

Juwau adatsimula mambo Herode Antipa thangwe ra kulowola Herodiya, omwe akhali mkazi wa mbale wace Firipo. Herode adacita kulambana na mkazi wace wakuyamba kuti alowole Herodiya. Mwakubverana na cakutonga ca Mozeji, comwe Herode akhalewa kuti akhacitewerambo, kumweku kukhali kucita upombo ndipo malowozi yamweya yakhali yakusaya kubvumizika. Thangwe ra kukalipa na mafala yomwe Juwau adalewaya, Herode adafungira Juwauyo m’kawoko. Pinango ni Herodiya omwe adakumbira kuti Herode acite bzimwebzi.

Herode akhaneseka kugumana cirango comwe angadapereka kuna Juwau, thangwe wanthu azinji ‘akhakhulupira kuti Juwauyo akhali mpolofeta.’ (Mateu 14:5) Koma Herodiya akhadziwa kale bzomwe angadacita na Juwau thangwe iye ‘akhadamukoyera cakumtima,’ mwakuti akhandonyang’ana njira yakuti amuphere. (Marko 6:19) Ndipo tsapano Herodiya akhadagumana mpata wakukwanirisa cakulinga cace.

Pomwe madyo ya Paskwa ya mu 32 EC yakhadasala pang’ono kucitika, Herode adakonza madyo makulu ya kusekerera nsiku ya kubadwa kwace. Pa madyopo akhalipombo akulu-akulu wa boma la Herode, akulu-akulu wa acikunda pabodzi na atsogoleri wa ku Galileya. Pomwe madyoyo yakhacitika, Salome mwana wacikazi wa Herodiya omwe adamubereka na Firipo, adacemeredwa kuti akabzine kuti atsangalaze alendowo. Alendowo adakomedwa kwene-kwene na momwe Salomeyo adabzinira.

Atakomedwambo kwene-kwene na kabzinidweko, Herode adauza Salome kuti: ‘Ndikumbire cinthu ciri-cense comwe ufuneco, ndipo ine ndin’dzakupasa.’ Inde, adacita kulumbira kuti: ‘Ciri-cense comwe undikumbireco, ndin’dzakupasa, napo icikhala kati na kati ya umambo bwangu.’ Tenepo, anati kutawira mtsikanayo adayamba kukabvunza mai wace kuti: ‘Kodi ndikakumbire ciyani?’—Marko 6:22-24.

Umweyu ukhali mpata omwe Herodiya akhaunyang’ana. Tenepo, Herodiyayo adamutawira Salome kuti: ‘Kakumbire msolo wa Juwau Batista.’ Nthawe imweyoletu iye adayenda kwa mamboyo acikamukumbira kuti: ‘Ndin’funa kuti mundipase msolo wa Juwau Batista mu mbale tsapanopapa.’—Marko 6:24, 25.

Herode adaneseka kwene-kwene na bzomwe mtsikanayu adamukumbirabzi, tsono iye akhadamuuza kale kuti angadamupasa ciri-cense pamaso pa wanthu wense. Bzingadakhala bza manyazi Herodeyo angadasaya kupereka bzomwe akhadalewabzo, napo kuti bzikhathandauza kupha munthu wakusaya thangwe. Tenepo Herode adatumiza mcikunda wace kuti akaphe Juwau. Mu tumphindi tung’onong’ono, mcikundayo adabweresa msolo wa Juwau mu mbale ndipo adaupereka kuna Salome, omwe patsogolo pace adakauperekambo kuna mai wace.

Pomwe anyakupfunza wa Juwau adabva bzomwe bzidacitikabzo, iwo adayenda kukatenga mtemboyo acikaupendesa. Patsogolo pace iwo adadziwisa Jezu bza nkhaniyi.

Patapita nthawe, pomwe Herode adabva kuti Jezu akhapoza atenda na kucosa madimonyo, adayamba kucita mantha kwene-kwene. Iye akhakumbuka kuti Jezuyo akhali Juwau Batista ndipo ‘akhadamuka kwa anyakufa.’ (Luka 9:7) Tenepo Herode Antipa akhafunisisa kuwona Jezu. Iye akhafuna lini kubva bzomwe Jezu akhapalizira. Koma cakulinga ca Herode cikhali cakuti atsimikize penu bzomwe akhakumbuka bzikhali bza cadidi ayai ne.