Jezu adaphatisa basa kamwana kuti apfunzise anyakupfunza wace kuti ambakhale wakubzicepswa. Adacita bzimwebzo pakufuna kuwathandiza kuti ambabziwone ninga wana omwe ambakhala wakubzicepswa, ndipo ambafuna lini kukhala wapadzulu kuposa anzawo. Ndipo iye adalewa kuti ‘ali-wense omwe angadatambira mwana ninga umweyo m’dzina lace, akhatambirambo Jezuyo.’—Mateu 18:5.

Apostolowo akhadamala kunesana pa nkhani yakuti mbani omwe akhali mkulu pakati pawo, tenepo, pinango iwo adabva ningati Jezu ankuwatsimula pomwe adawauza kuti akhale wakubzicepswa ninga kamwana. Ndipopa mpostolo Juwau adayamba kulewa bza nkhani yomwe ikhadamala kucitika. Iye adati: ‘Tawona munthu munango ankucosa madimonyo m’dzina lanu, ndipo tamuletsa pakuti iye ambafamba lini pabodzi na ifepano.’—Luka 9:49.

Kodi Juwau akhakumbuka kuti ni apostolo okhawo omwe akhathemera kupoza wanthu na kucosa madimonyo? Penu akhakumbuka tenepoyo, tsono, kodi munthuyo akhakwanisa tani kucosa mizimu yakuipayo? Bzinkuwoneka kuti Juwau akhakumbuka kuti munthuyo akhathemera lini kucita bzinthu bzakudabwisabzo thangwe akhafamba lini na Jezu pabodzi na apostolowo.

Tsono, Juwau adadabwa pomwe adabva Jezu ankumuuza kuti: ‘Lekani kumuletsa, pakuti palibe munthu omwe angacite bzinthu bzamphanvu m’dzina langu, ndipo pa nthawe ibodzi-bodziyo acindilewa kuipa. Pakuti ule omwe ambatsutsana lini nafe, ali kumbali yathu. Ndipo inepano ndinkukutsimikizirani kuti ule omwe akupaseni madzi yakumwa, thangwe rakuti imwepo ndimwe wa Kristu, iye cipo acidzaluza mabaibai yace.’—Marko 9:39-41.

Munthu ule akhafunikira lini kucita kufamba na Jezu kuti alatize kuti akhali ku mbali ya Jezuyo. Pa nthawe imweyi gwere lacikristau likhanati kukhazikisidwa, ndipopa kusaya kufamba na Jezu bzikhalatiza lini kuti munthuyo akhatsutsana naye ayai kuti akhayambisa cipembedzo cakunama. Bzinkuwoneka kuti munthu ule akhakhulupira Jezu, ndipo bzomwe Jezu adalewa bzidalatiza kuti iye angadadzatambira mabaibai yace.

Penu apostolowo angadacita ayai kulewa cinthu comwe cingadakhukhumudwisa munthu ule, bzimwebzo bzingadakhala bzakuipa kwene-kwene. Jezu adalewa kuti: ‘Tsono omwe akhukhumudwise m’bodzi pa ang’ono omwe ana cikhulupirowa, bzingadakhala bwino kuti iye amangiriridwe m’khosi mwace mwala wakupeyera, ninga omwe umbazungulirisidwa na bulu ule, acikathusidwa m’nyanza.’ (Marko 9:42) Patsogolo pace Jezu adalewa kuti ateweri wace akhafunika kusiya bzinthu bzomwe bzingadawakhukhumudwisa, napo bzicikhala bzinthu bzakufunika ninga boko, mwendo ayai diso. Bzingadakhala bwino munthu kuleka kukhala na bziwalobzi, koma acipita mu Umambo bwa Mulungu, kuposa kukhala na bziwalo bzense, koma acidzapfudzidwa mu Gehena (cigwa ca Hinomi). Apostolowo akhacidziwa bwino cigwa cimweci, comwe cikhali pafupi na mzinda wa Jeruzalemu, ndipo ku mbuto imweyo akhambatenthera lixo. Tenepo iwo adabvesesa kuti Jezu akhafuna kulewa kuti munthuyo akadzaphedwa, angadadzakhala alibe cidikhiro ca kudzakhala pomwe na moyo.

Jezu adawacenjezambo kuti: ‘Samalani kuti muleke kunyoza m’bodzi wa ang’onowa, pakuti inepano ndinkukuuzani kuti wanjo wawo kudzuluku ambawona nthawe zense nkhope ya Baba wangu.’ Kodi ‘ang’ono’  amwewa akhali wakufunika tani kwa Mulungu? Pakufuna kuthandiza anyakupfunza wace momwe Mulungu akhawonera ang’onowo, Jezu adafotokoza there lakulewa bza munthu munango omwe akhana mabira 100, ndipo bira m’bodzi akhadataika. Munthuyo adasiya mabira 99, aciyenda kukanyang’ana bira omwe akhadataikayo. Pomwe adamugumana, iye adakomedwa kwene-kwene na bira umweyo, kuposa na mabira 99 yomwe yakhalibe kutaika yale. Ndipo Jezu adathumizira kuti: ‘Baba wangu omwe ali kudzulu an’funambo lini kuti m’bodzi wa ang’onowa ataike.’—Mateu 18:10, 14.

Pakukumbukira anyakupfunza wace omwe akhanesana pa nkhani yakuti mbani omwe angadadzakhala mkulu mu Umambo, Jezu adawalimbisa kuti: ‘Khalani na munyu mwa imwe wene, ndipo sungani mtendere pakati panu.’ (Marko 9:50) Munyu umbacitisa kuti cakudya cikhale na goso. Tenepo, munyu wakundendemezera umbathandiza kuti munthu aleke kumbaneseka kubvuma bzomwe mwanzace an’lewa bzomwe bzingacitise kuti pakhale mtendere, pakuti wanthu angakhale lini pa mtendere akambanesana.—Wakoloso 4:6.

Patsogolo pace Jezu adafotokoza bzomwe munthu angacite penu mwanzace wamucitira pikado ikulu. Iye adalewa kuti: ‘M’bale wako akacita pikado, ndoko ukafotokozerane naye pikadoyo pa mwekha, iwepo na iye basi. Akakutetekera, wamupulumusa m’bale wakoyo.’ Tsono tani penu munthuyo angadabva lini? Jezu adati: ‘Ndoko na munthu m’bodzi ayai wanthu awiri, kuti nkhaniyo ikatsimikiziridwe na pa mulomo pa mboni ziwiri ayai zitatu.’ Tsono penu bzingadakwanisika lini kukonza nkhaniyo, iwo angadakafotokozera ‘gwere,’ omwe ni akulu omwe ana udindo bwa kudziwa bzakucita pa nkhaniyo. Tsono tani penu nyakuphonyayo angadabverambo lini akuluwo? Jezu adati: ‘Kwa iwe, iye akhale ninga munthu wa mitundu inango na anyakukhomesa mtsonkho.’ Jezu adalewa bza wanthu wa mitundu inango na anyakukhomesa mitsonkho, thangwe Ajuda akhabverana lini na wanthu amwewa.—Mateu 18:15-17.

Akulu ambafunika kuteweza mwapafupi bzomwe Fala la Mulungu limbalewa. Iwo akawona kuti munthu omwe ana mulandu aphonyadi, bzomwe angasankhule kucita pa nkhaniyo ‘bzimbakhala bzitamangidwambo kale kudzulu.’ Tsono akuluwo akawona kuti munthuyo alibe kuphonya, ndiye kuti ‘bzimbakhala bzitatsudzulidwambo kale kudzulu.’ Malangoya yadayamba kuphata basa pomwe gwere lacikristau lidakhazikisidwa. Jezu adafotokoza bzomwe bzimbacitika akulu akakhala ankutonga nkhani zikulu-zikulu. Iye adalewa kuti: ‘Pali-pense pomwe an’tsonkhana awiri ayai atatu m’dzina langu, ine ndimbakhala ndiri pakati pawo.’—Mateu 18:18-20..