Pambuyo pa kugumana na bvuto likulu m’madzi mule, anyakupfuna wa Jezu, adacoka m’mwadiyamo, ndipo akhanjenjemera na bzinthu bzomwe akhawona. Iwo adawona amuna awiri wakugopswa omwe akhadapoteredwa na madimonyo. Amuna awiriwo akhacokera ku thenje lapafupi, acithamangira komwe kukhana Jezu. Koma Bibliya limbafotokoza bza munthu m’bodzi basi, pinango thangwe akhali waciwembo kwene-kwene ndipo akhana madimonyo kwa nthawe itali.

Munthu umweyu akhapasa nsisi, ndipo akhafamba pezi. ‘Usiku na masikati, iye akhambakuwa-kuwa m’thenje na m’mapiri acimbabzitema-tema na minyala.’ (Marko 5:5) Iye akhagopswa kwene-kwene mwakuti wanthu akhabva mantha kumbapita na njira yakuthenjeyo. Wanthu winango adayezera kumumanga manja na minyendo na unyolo, koma iye akhabwedza unyolobo. Palibe munthu omwe akhakwanisa kumukunda.

Pomwe munthuyo adafenderera Jezu adagwa m’minyendo mwace, ndipo madimonyoyo yadamucitisa kulewalewa mwakukuwa kuti: ‘Kodi ndinamwe ciyani, Jezu Mwana wa Mulungu Wakudzulu? Lumbirani kwa Mulungu kuti mun’ndizunza lini.’ Pamwepo, Jezu adalatiza kuti akhana mphanvu kuposa madimonyo mwakulewa kuti: ‘Coka m’thupi mwa munthuyo, mzimu wakunyansawe.’—Marko 5:7, 8.

Kulewa cadidi, yakhali madimonyo mazinji yomwe yakhadapotera munthuyo. Ndipopa, pomwe Jezu adamubvunza kuti ‘dzina lako ndiwe yani?’ Iye adatawira kuti: ‘Dzina langu ndine Thimu, thangwe ndife azinji.’ (Marko 5:9) Ku Roma fala lakuti thimu, likhaimira acikunda azinjisa. Tenepo, ni madimonyo mazinjisa yomwe yakhaboneresa munthuyo ndipo yakhapfatsa na kumuboneresako. ‘Madimonyoyo yadadandaulira Jezu kuti aleke kuyatonga kuti yayende kuciphompho.’ Bzimwebzi bzidalatiza kuti madimonyoyo yakhadziwa bzomwe bzin’dzawacitikira pabodzi na mtsogoleri wawo Sathani.—Luka 8:31.

Pafupi na pamwepo, pakhana nkhumba zakukwana 2.000, zomwe zikhawonedwa zakupswipa mwakubverana na cakutonga, ndipo Ajuda akhafunikira lini nakuzifuwako. Madimonyoyo yadakumbira Jezu kuti: ‘Tiyendeseni kuna nkhumba zire, kuti tikazipotere.’ (Marko 5:12) Jezu adayauza kuti yayende, ndipo yadakapoteradi  nkhumbazo. Tenepo, nkhumba zense zakukwana 2.000, zidamogera m’nyanza, zicimira mwemo.

Pomwe anyakusamalira nkhumbazo adawona bzimwebzi, adayenda mwakanfulumize kukauza wanthu wa mu mzindamo bzomwe bzidacikabzo. Ndipo wanthu azinji adayenda kukawona bzimwebzo. Pomwe iwo adafika, adawona kuti munthu omwe akhadapoteredwa na madimonyo ule, tsapano akhali bwino ndipo akhadabvala. Iye akhadakhala pansi pabodzi na Jezu.

Wanthu omwe adabva bzimwebzi na omwe adawona munthuyo, adacita mantha, ndipo adayamba kucita thupo pa kukumbukira bzinthu bzinango bzomwe Jezu angadacita. Na bzimwebzi, iwo adauza Jezu kuti acoke mu mzinda mwawomo. Pomwe Jezu adakwira m’mwadiya kuti ayende, munthu omwe akhadapoteredwa na madimonyo ule adakumbira Jezu kuti ayende naye pabodzi. Koma Jezu adamuuza kuti: ‘Ndoko kumui kwa adzinza wako, kumweko ukawauze bzense bzomwe Yahova wakucitira pabodzi na nsisi zomwe Iye wakulatiza.’—Marko 5:19.

Nthawe zense Jezu akapoza wanthu, akhawauza kuti aleke kuuza wanthu winango bzomwe akhawacitirabzo thangwe iye akhafuna lini kuti wanthu amukhulupire thangwe ra bzakudabwisa bzomwe akhabvabzo. Koma pa nkhani imweyi, munthu omwe adacosedwa madimonyoyo akhali umboni bwa mphanvu za Jezu, ndipo angadacitirambo umboni kwa wanthu omwe Jezuyo alibe kuwafikira. Bzomwe munthuyo akhalewa, bzikhamalisambo gunkha lomwe wanthu akhalewa bza kuluzika kwa nkhumba zizinjizo. Ndipopa munthuyo adayamba kumbafotokozera wanthu ku Dekapoli kwense bzomwe Jezu adamucitira.