Jairo adawona pomwe Jezu adapoza mkazi omwe akhana matenda yakutaya mulopa. Tenepo, iye akhapenukira lini kuti Jezu angadakwanisambo kuthandiza mwana wace napo kuti iye akhadziwa kuti ‘mwana waceyo akhadafa kale.’ (Mateu 9:18) Kodi bzingadakwanisika kuti mwanayo athandizidwe?

Pomwe Jezu akhalewalewa na mkazi omwe adamupoza ule, padafika amuna winango omwe akhacokera kumui kwa Jairo ndipo adamuuza Jairoyo kuti: ‘Mwana wanu ule wafa! Musiyeni Mpfunzisiyu lekani kumuboneresa.’—Marko 5:35.

Pakubva bzimwebzi, Jairo adasaya cakucita. Napo akhali munthu wakulemekezeka kwene-kwene, koma pa nthawe imweyi, palibe comwe iye angadacita, pakuti mwana wace omwe akhali m’bodzi yekha akhadafa. Tsono Jezu atabva bzimwebzi, adazungunuka acinyang’anisa Jairo, ndipo adamulimbisa kuti: ‘Leka kugopa, ndokhulupira basi.’—Marko 5:36.

Patsogolo pace, Jezu adaperekeza Jairo pakubwerera kumui kwace. Pomwe adafika kumui kwa Jairoko, iwo adagumana wanthu azinjisa. Wanthuwo akhalira, akhadandaula, acimbabzimenya-menya pankhombe thangwe ra nsisi. Jezu adapita m’nyumbamo ndipo adalewa mafala yomwe yadadabwisa wanthuwo yakuti: ‘Mwanayu, alibe kufa koma wandogona tulo.’ (Marko 5:39) Pakubva mafalaya, wanthuwo adayamba kumuseka Jezu, thangwe iwo akhadziwa kuti mwanayo akhadafadi. Tenepo, mwa kuphatisa basa mphanvu zomwe adapasidwa na Mulungu, Jezu adalatiza kuti mpsakukwanisika kumusa wanthu kwa anyakufa ninga momwe angalamusire munthu kutulo twa kufa nato.

Jezu adakumbira kuti wanthu wense acoke m’nyumbamo, koma adandosala ni Pedru, Tiyago, Juwau na abereki wa kamtsikana komwe kakhadafako. Jezu adatenga wanthu axanuwa, aciyenda nawo pomwe pakhana kamtsikanapo. Iye adaphata boko la kamtsikanako, acilewa kuti: ‘“Talita cumi,” bzomwe bzimbathandauza kuti: ‘‘Mtsikanawe, ndinkukuuza kuti: ‘Lamuka!’”’ (Marko 5:41) Nthawe imweyoletu kamtsikanako kadalamuka, kaciyamba kufamba. Ndokumbukirani cikondweso comwe Jairo na mkazi wace adakhala naco! Kuti alatize kuti mwanayo akhana moyodi, Jezu adakumbira kuti amupase cakudya.

Mu nthawe za m’mbuyomo, Jezu akhakumbira wanthu omwe akhawapoza kuti aleke kumbauza winango bzomwe akhawacitirabzo, ndipo adacita bzibodzi-bodzibzo na abereki wa kamtsikanako. Koma pakuti adakondwa kwene-kwene, aberekiwo pabodzi na wanthu winango adayamba kuimwaza nkhaniyo ‘mu dera lensero.’ (Mateu 9:26) Bzingadakhala kuti m’bodzi wa adzinza wanu amusidwa kwa anyakufa, kodi mungaleke kukondwa kwene-kwene muciuzambo winango bzomwe bzacitikabzo? Pa wanthu omwe Jezu adawalamusa, imweyi ni nkhani yaciwiri yomwe idanembedwa m’Bibliya.