Jezu akhali ku Galileya acimbapfunzisa, pomwe Paskwa ya m’gole la 32 EC ikhafendera. Pakufuna kubvera cakutonga ca Mulungu, iye adayenda ku Jeruzalemu kuti akagumanikembo pa msinda wa Paskwayo. Pa ulendobo, Jezu adacita bzinthu mwakusamala kwene-kwene, thangwe Ajuda akhafuna kumupha. (Juwau 7:1) Pomwe msindayo udamala, iye adabwerera pomwe ku Galileya.

Bzinkuwoneka kuti Jezu akhali ku Kafarinaumu pomwe adamufikira Anembi na Afarizeu omwe akhadacokera ku Jeruzalemu. Thangwe ranyi Afarizeuwo adacita ulendo butalibo kuti akawonane na Jezu? Iwo akhamunyang’anira mathangwe yakuti am’mange nayo mulandu wakuti iye akhabweresa phiringu ku cipembedzo cawo. Iwo adamubvunza kuti: ‘Thangwe ranyi anyakupfunza wanu ambateweza lini miyambo ya abereki wakale? Mwa ciratizo, iwo ambasamba lini m’manja [mpaka mu akakono-kono] akafuna kudya.’ (Mateu 15:2) Tsono, Mulungu akhalibe kuuza wanthu wace kuti ambacite mwambo wakumbasamba ‘m’manja mpaka mu akakono-kono.’ (Marko 7:3) Koma, Afarizeuwo akhawona kuti munthu omwe akhacita lini bzimwebzo, akhaphonya kwene-kwene.

M’mbuto mwa kutawira mbvunzo wawoyo, Jezu adalatiza kuti iwo akhasiya utowa kubvera Cakutonga ca Mulungu. Iye adawabvunza kuti: ‘Thangwe ranyi imwepo mumbateweza lini cakutonga ca Mulungu thangwe ra miyambo yanu? Mwa ciratizo, Mulungu adalewa kuti: “Umbalemekeze babako na mai wako.” Ndipo adalewambo kuti: “Munthu omwe alewe kuipa babace na mai wace, aphedweretu.” Tsono imwe mumbati: “Omwe auze babace ayai mai wace kuti: ‘Bzinthu bzense bzomwe ndinabzo, bzomwe ndingadakuthandizani nabzo, ni mphaso yakuperekedwa kwa Mulungu,’ munthu umweyo an’funika lini kulemekeza babace.”’—Mateu 15:3-6; Kufuluka 20:12; 21:17.

Afarizeuwo akhalewa kuti kobiri ayai cinthu ciri-cense comwe munthu akhacipambula kuti adzacipereke kwa Mulungu ninga mphaso, cinthuco cikhafunika lini kuphatisidwa basa mu njira inango. Tsono bzomwe bzikhacitika mpsakuti, mphasoyo ikhapitiriza basi kukhala na munthuyo. Mwa ciratizo, munthu akalewa kuti kobiri yace ayai bzinthu bzace ni ‘koribani’ bzomwe bzikhathandauza kuti ni mphaso yakudzaperekedwa kwa Mulungu ayai ku templo, bzikhakhala ningati bzinthubzo bziri kale m’manja mwa templo, ndipo bzikhafunika lini kuphatisidwa basa napo bzikali ku mui kwaceko. Napo penu munthuyo akhaphatisa basa kobiriyo ayai bzinthubzo pa bzakufuna bzace, iye akhalambiratu kubziphatisa basa kuti athandize nabzo abereki wace wakukalamba ayai wakusauka. Pa kucita bzimwebzi iwo akhathawa udindo bwawo bwakusamalira abereki wawo.—Marko 7:11.

Jezu adakalipa thangwe Afarizeu akhateweza lini Cakutonga ca Mulungu, ndipo adawauza kuti: ‘Mwacitisa kuti Fala la Mulungu limale mphanvu thangwe ra miyambo yanu. Wanthu wacinyengomwe! Zaiya adaleweratu bza imwepo, pomwe iye adati: “Wanthuwa ambandondilemekeza na miromo yokha, tsono mitima yawo iri kutali na inepano. Ankundobonera kundinamata, pakuti ankupfunzisa malamulo ya wanthu.”’ Afarizeuwo adasaya cakulewa pomwe adawatsimula mwa mphanvu. Ndipo Jezu adacemera wanthu kuti abwere pafupi, ndipo adawauza kuti: ‘Tetekerani, mucibvesesa thandauzo la ibzi: Bzomwe bzimbapita na pa mulomo bzimbapswipiza lini munthu, tsono bzomwe bzimbacoka na pa mulomo ndibzo bzimbapswipiza munthu.’—Mateu 15:6-11; Zaiya 29:13.

Patsogolo pace, Jezu adapita m’nyumba inango, ndipo anyakupfunza wace adamubvunza kuti: ‘“Kodi mukudziwa kuti Afarizeu aipidwa na bzomwe mwalewa bzire?” Iye adatawira kuti: “Kamuti kali-kense komwe kalibe kucita kubzalidwa na Baba wangu wa kudzulu, kan’dzazulidwa. Alekeni. Iwo ni atsogoleri azimola. Pakuti, zimola akatsogolera zimola mwanzace, wense an’dzagwera m’dindi.”’—Mateu 15:12-14.

 Jezu adadabwa pomwe Pedru mwa kuimira anzace, adamubvunza kuti n’ciyani comwe cimbapswipisa munthu. Tsono, iye adamutawira kuti: ‘Kodi mumbadziwa lini kuti cinthu-cense comwe cimbapita na pa mulomo, cimbayenda m’mimba, cicikamalizira kutaidwa ku thengo? Tsono, bzomwe bzimbacoka na pa mulomo, bzimbacokera mu mtima, ndipo bzimwebzo ndibzo bzimbapswipisa munthu. Mwa ciratizo, nzeru zakuipa, za kupha, za upombo, za unzazi, za kuba, umboni bwakunama na nzeru zakunyoza Mulungu, zimbacokera mu mtima. Bzimwebzi ndibzo bzimbapswipisa munthu, tsono kudya mwakusaya kusamba m’manja, kumbapswipisa lini munthu.’—Mateu 15:17-20.

Sikuti Jezu akhaletsa wanthu kumbakhala wa khonkho, ayai kuti aleke kumbasamba m’manja akafuna kudya. M’mbuto mwace, iye akhatsimula atsogoleri wa cipembedzo omwe akhacita bzinthu mwa cinyengo pakuleka kubvera malamulo ya Mulungu, acimbateweza miyambo ya wanthu. Tenepo, nfundo ya Jezu ikhali yakuti: Bzinthu bzakuipa bzomwe munthu ambacita, bzimbayambira mu mtima, ndipo bzimwebzo ndibzo bzimbapswipisa munthuyo.