Pomwe Jezu adalamusidwa, adacita makonzedwe yakuti awonane na apostolo wace wakukwana 11 pa phiri linango la Galileya. Ndipo anyakupfunza pafupi-fupi 500 akhalipombo kumweko, koma winango wa iwo akhapenukira kuti Jezuyo walamusidwadi. (Mateu 28:17; 1 Wakolinto 15:6) Koma bzomwe adawauza pa nthawe imweyi bzidawathandiza kukhulupira kuti iye adalamusidwadi.

Jezu adawafotokozera kuti Mulungu adamupasa mphanvu yakuti atonge kudzulu na dziko la pansi. Ndipo adawalimbisa kuti: ‘Ndokoni mukapfunzise wanthu wa mitundu yense, muciwabatiza m’dzina la Baba, na la Mwana, na la mzimu wakucena na kuwapfunzisa kukoya bzinthu bzense bzomwe ndidakuuzani.’ (Mateu 28:18-20) Na mafalaya bzidalatiza kuti pomwe Jezu adalamusidwa akhafunisisa kuti bzipsa bzabwino bzipaliziridwe.

Ateweri wense wa Jezu—amuna, akazi pabodzi na wana omwe akhalipo pa nthawe imweyire, adapasidwambo basa la kupfunzisa wanthu. Ndipo iye adawauzambo kuti wanthu winango an’dzatsutsa basa lakupalizira na lakupfunzisa wanthu, ndipo adawalimbisa kuti: ‘Ndidapasidwa utongi bwense, kudzulu na pa dziko la pansi.’ Kodi malafaya yadalimbisa tani anyakupfunza wacewo? Iye adawauza kuti: ‘Dziwani kuti ine ndiri pabodzi na imwe nsiku zense mpaka kuphampha kwa mkonzedwe uno wa bzinthu wa nthawe ino.’ Tsono Jezu akhalewa lini kuti wense omwe an’dzapalizira bzipsa bzabwino an’dzapasidwambo mphanvu yakucita mabasa yakudabwisa. Koma an’dzacita basa limweri mwakuthandizidwa na mzimu wakucena.

Pomwe Jezu adalamusidwa adawonekera kwa anyakupfunza wace kwa ‘nsiku zakukwana 40.’ Pa nthawe imweyi iye akhawonekera kwa anyakupfunza wace na thupi ninga lathuli kuti awapase umboni ‘bwakutsimikizirika kuti iye akhana moyo.’ Ndipo adawapfunzisambo bza ‘Umambo bwa Mulungu.’—Mabasa 1:3; 1 Wakolinto 15:7.

Bzinkuwoneka kuti pomwe apostolo akhali ku Galileya, Jezu adawauza kuti abwerere ku Jeruzalemu. Ndipo pomwe adagumana nawo mu Jeruzalemumo, iye adawauza kuti: ‘Lekani kucoka mu Jeruzalemu muno, koma pitirizani kudikhirira bzomwe Baba adapicira, ninga momwe ndidakuuzirani. Juwau adabatiza na madzi, koma tsapanopapa imwepo mun’dzabatizidwa na mzimu wakucena.’—Mabasa 1:4, 5.

Na kupita kwa nthawe, Jezu adagumana pomwe na anyakupfunza wace. Iye adawatsogolera ‘aciyenda nawo ku Betaniya.’ Mzinda omwe ukhali kummwera kwa phiri la Mioliva. (Luka 24:50) Napo kuti Jezu akhadawauza kale bzakuti iye akuyenda kudzulu, iwo adapitiriza kukhulupira kuti Umambo bwace bungadakhazikisidwa pa dziko la pansi pa nthawe imweyire.—Luka 22:16, 18, 30; Juwau 14:2, 3.

Apostolowo adabvunza Jezu kuti: ‘Mbuya, kodi munikhazikisa umambo kwa Jirayeri pa nthawe ino?’ Iye adawatawira kuti: ‘Mulibe ugo bwakudziwa nthawe ayai nyengo yomwe Baba wangu adaiyikha pansi pa utongi bwace. Mzimu wakucena ukadzafika pa imwepo, mun’dzatambira mphanvu. Pamwepo mun’dzakhala mboni zangu mu Jeruzalemu, ku Judeya kwensene na ku Samariya mpaka kumalekezero ya dziko la pansi.’—Mabasa 1:6-8.

Pomwe Jezu akhali pabodzi na apostolo wace pa phiri la Mioliva adayamba kukwira kuyenda kudzulu. Mtambo udamumpsinkha ndipo apostolo wacewo alibe kumuwona pomwe. Pomwe Jezu adalamusidwa, iye akhambabvala thupi laumunthu, koma pomwe akhayenda kudzulu, iye adakhundula thupi laumunthulo, aciyenda ninga cakulengedwa cauzimu. (1 Wakolinto 15:44, 50; 1 Pedru 3:18) Pomwe apostolowo akhanyang’anisa Jezu akuyenda kudzulu adawona ‘amuna awiri omwe akhadabvala bzakubvala bzicena’ ataima ku mbali kwawo. Amuna amwewa akhali wanjo, ndipo adabvunza kuti: ‘Amuna wa ku Galileyamwe, thangwe ranyi mudaima mucimbanyang’anisa kudzulu? Jezu omwe atengedwa pakati panuyu aciyenda kudzulu, an’dzabwera pomwe ninga momwe mwamuwonera ankuyenda kudzulu.’—Mabasa 1:10, 11.

Pomwe Jezu akhayenda kudzulu alibe kuwonedwa na wanthu azinji, koma ni ateweri wace wakukhulupirika okha omwe adamuwona. Ndipo kubwera kwace kun’dzawonedwa lini na wanthu azinji, koma ni ateweri wace wakukhulupirika okha omwe an’dzazindikira kuti Jezu wayamba kutonga ninga Mambo.

Pomwe Jezu adayenda kudzulu, apostolo adabwerera ku Jeruzalemu. Ndipo mu nsiku zakutewera zace, iwo adatsonkhana pabodzi na anyakupfunza winango, kuphatanidzambo ‘Mariya mai wa Jezu na . . . abale wace.’ (Mabasa 1:14) Tsono pomwe iwo akhatsonkhana akhacita mpembo, ndipo nkhani inango yomwe adaipembera ikhali ya kusankhula nyakupfunza omwe angadapita m’mbuto mwa Juda Sikaliyoti kuti mulewengo wa apostolo upitirize kukhala 12. (Mateu 19:28) Iwo akhafuna kusankhula nyakupfunza omwe adawona na maso bzomwe Jezu adacita na omwe adamuwona atalamusidwa. Ndipo kuti asankhule mwakubverana na kufuna kwa Mulungu anyakupfunzawo adacita maere. Ndipo bumwebu budakhala ulendo bwakumalizira kuti maere yagumidwe m’Bibliya. (Psalymo 109:8; Mimwani 16:33) Matiya, omwe pinango akhali m’gulu la anyakupfunza wakukwana 70 omwe Jezu adawatumiza kuti akapalizire, ni omwe adasankhulidwa kuti ‘akhale m’gulu la apostolo 11 wale.’—Mabasa 1:26.

Pakhadandopita nsiku zakukwana 10 pomwe Jezu adayenda kudzulu, Ajuda adacita msinda wa Pentekosite wa mu 33 EC. Ndipo anyakupfunza pafupi-fupi 120 adatsonkhana m’cipinda cinango ku Jeruzalemu. Koma mwadzidzidzi kudabveka ciwowo ninga ca mphepo yamphanvu ndipo cidadzaza m’cipinda censeneco. Ndipo pa msolo pa ali-wense omwe akhalipo padayamba kuwoneka moto omwe ukhali ninga lirime. Tsono anyakupfunza wense adayamba kulewalewa bzirewedwe bzakusiyana-siyana. Bumwebu budakhala umboni bwakuti anyakupfunzawo adatambira mzimu wakucena omwe Jezu akhadawapicira!—Juwau 14:26.