Pomwe padapita nsiku 10 Jezu atabwerera kudzulu, anyakupfunza wace adatambira mzimu wakucena pa pentekosite. Bumwebu budakhala umboni bwakuti Jezu alidi kudzulu. Tsono padadzacitika pomwe umboni bunango bomwe budalatiza kuti Jezu ali kudzulu. Sitefano omwe akhali nyakupfunza wa Jezu, akanati kubomedwa na minyala thangwe ra kupalizira mwakukhulupirika, iye adalewa kuti: ‘Ndinkuwona kudzulu kwakufunguka, ndipo Mwana wa munthu adaima kumbali yamadidi ya Mulungu.’—Mabasa 7:56.

Pomwe Jezu adafika kudzulu, iye akhafunika kudikhirira kuti Baba wace amuuze bzomwe angadacita, mwakubverana na bzomwe bzikhadalewedwa kale m’Fala la Mulungu. Mulungu adauza Davide kuti anembe kuti: ‘Yahova adauza Mbuya wangu [Jezu] kuti: “Khala ku boko langu la madidi, mpaka ndikadzaikha anyamadulanthaka wako ninga cakupondera minyendo yako.”’ Pambuyo pa kudikhirira nthawe imweyi, Jezu ‘an’dzakunda pakati pa anyamadulanthaka [wace].’ (Psalymo 110:1, 2) Tsono n’ciyani comwe Jezu akhacita pomwe akhadikhirira kupfudza anyamadulanthaka wace?

Pa msinda wa pa Pentekosite wa mu 33 EC, padakhazikisidwa gwere lacikristau. Kucokera nthawe imweyi, Jezu adayamba kutonga anyakupfunza wace wakudzozedwa na mzimu wakucena. (Wakoloso 1:13) Iye adayamba kuwatsogolera pa basa lakupalizira, aciwakonzekeresa basa lomwe angadadzacita kutsogolo. Kodi ni basa liponi lomwe angadadzacita? Na kupita kwa nthawe, anyakudzozedwa omwe an’dzakhala wakukhulupirika mpaka infa an’dzalamusidwa kuti akatonge pabodzi na Jezu mu Umambo bwa kudzulu.

Munthu munango omwe adadzadziwika kuti an’dzatonga ninga mambo ni Saulo, omwe ambadziwika na dzina laciroma lakuti Paulo. Iye akhali m’Juda omwe kuyambira kale-kale akhacita nyongo yakuteweza Cakutonga ca Mulungu, koma iye adapumpsidwa na atsogoleri wa bzipembedzo bza Cijuda, ndipo adabvumiza kuti Sitefano abomedwe na minyala. Pomwe bzimwebzi bzidacitika, Saulo adapitiriza ‘kugopswa anyakupfunza wa Mbuya na kufuna kuwapha,’ tenepo adayenda ku Damasko. Iye adabvumizidwa na Mkulu wa Ansembe Kaifasi kuti akamange anyakupfunza wa Jezu aciyenda nawo ku Jeruzalemu. (Mabasa 7:58; 9:1) Pomwe akhali mu njira, ceza camphanvu cidamuzungulira, cicitoya m’maso mwace ndipo iye adagwa pansi.

Ndipo Saulo adabva mafala yomwe akhadziwa lini komwe yakhacokera yakuti: ‘Saulo, Saulo thangwe ranyi unkundizunza?’ Tsono Saulo adabvunza kuti: ‘Mbuya wangu, kodi ndimwe yani?’ Ndipo mtawiro wace udakhala wakuti: ‘Ine ndine Jezu, omwe iwepo unkumuzunza.’—Mabasa 9:4, 5.

 Jezu adauza Saulo kuti apite mu mzinda wa Damasko acidikhirira m’mwemo kuti amupase malango, ndipo kuti apite mu mzindamo adacita kuphatidwa boko thangwe ceza cakudabwisa cire cikhadamukhalisa zimola. Tsono Jezu adawonekerambo kwa Ananiya, nyakupfunza munango omwe akhakhala ku Damasko. Tenepo Jezu adauza Ananiya momwe angadayendera kuti akagumane na Saulo. Tsono Ananiya akhafuna lini kuyenda kukagumana na Saulo thangwe akhacita mantha, koma Jezu adamuuza kuti: ‘Munthu umweyu ni combo cangu cakufunika kwene-kwene comwe cacita kusankhulidwa kuti cidziwise dzina langu kwa wanthu wa mitundu inango, kwa maumambo na wana wa Jirayeri.’ Pambuyo pa bzimwebzi, Saulo adayamba kuwona ndipo ali ku Damaskoko ‘adayamba kupalizira bza Jezu kuti iye ni Mwana wa Mulungu.’—Mabasa 9:15, 20.

Na thandizo la Jezu, Paulo pabodzi na apalizi winango adapitiriza kupalizira basa lomwe lidayambisidwa na Jezuyo. Ndipo Mulungu adawasimba kwene-kwene mwa kucitisa kuti basa lawo lifambe bwino. Pomwe padapita magole 25 kucokera pomwe Jezu adawonekera kwa Paulo mu mseu wakuyenda ku Damasko, Pauloyo adanemba kuti bzipsa bzabwino ‘bzapaliziridwa mu cirengedwe cense ca pansi.’—Wakoloso 1:23.

Na kupita kwa nthawe, Jezu adawonesa matsomphenya yakusiyana-siyana mpostolo wace wakufunidwa Juwau, ndipo matsomphenyayo yambagumanika mu bukhu la Cibvumbulutso. Pakuwona matsomphenyaya, bzidakhala ninga kuti Juwau ankuwona Jezu akuyamba kutonga ninga Mambo. (Juwau 21:22) ‘Na matsomphenyaya [Juwau] adakhala mu nsiku ya Mbuya.’ (Cibvumbulutso 1:10) Kodi ni lini pomwe nsikuyo idayamba?

Kubvesesa bwino mapolofesiya ya m’Bibliya kwatithandiza kudziwa kuti ‘nsiku ya Mbuya,’ idayamba mu nthawe zathu zino. Ndipo mu gole la 1914, kudacitika nkhondo yomwe idadzadziwika na dzina lakuti Nkhondo Yakuyamba ya pa Dziko Lense. Ndipo kundoyambira mu gole limweri padzikoli padayamba kucitika nkhondo zizinji, matenda, njala, bziteke-teke na bzinthu bzinango bzomwe bzinkulatiza kuti ‘cizindikiro ca kukhala’ kwace ‘pabodzi na mamaliziro’ bzomwe Jezu adauza apostolo wace bzinkukwanisika. (Mateu 24:3, 7, 8, 14) Ndipo tsapano bzipsa bzabwino bza Umambo bzinkupaliziridwa padziko lense la pansi, sikuti kokha m’madera yomwe yakhatongedwa na Aroma.

Mulungu adauza Juwau kuti anembe thandauzo la bzimwebzi. Iye adanemba kuti: ‘Tsapano cafika cipulumuso, na mphanvu, na Umambo bwa Mulungu wathu pabodzi na utongi bwa Kristu wace.’ (Cibvumbulutso 12:10) Umambo bwa Mulungu bomwe Jezu akhabupalizira buli kudzulu ndipo n’bwacadidi.

Imweyi ikhali nkhani yomwe anyakupfunza wa Jezu akhakomedwa nayo kwene-kwene. Ndipo bzikuwoneka kuti iwo adakomedwa na mafala ya Juwau yakuti: ‘Kondwani kudzulu na imwe omwe mumbakhala kumweko, tsoka dziko na nyanza thangwe Dyabu apolikira kumweko, omwe ana ukali bukulu pakudziwa kuti ana kanthawe kakucepa.’—Cibvumbulutso 12:12.

Tsapano Jezu ankundokhala lini kumbali yamadidi ya Baba wace, koma iye ankutonga ninga Mambo ndipo tsapanopapa anipfudza anyamadulanthaka wace wense. (Wahebereu 10:12, 13) Tsono anyamadulanthaka wace wense akadzapfudzidwa, moyo un’dzakhala wakudekeza kwene-kwene.