Atamala nsiku 40 m’dambo, pomwe akhanati kubwerera ku Galileya, Jezu adayenda pomwe kuna Juwau, omwe adamubatiza ule. Pomwe adafika, Juwau adamulata, aciuza omwe akhali pamwepowo kuti: ‘Onani, Mwana wa Bira wa Mulungu omwe ankucosa pikado za m’dziko! Umweyu ngule omwe ndikhalewa kuti: “M’mbuyo mwangu munkubwera munthu omwe wandipinzula, pakuti iye akhalipo kale ine ndikanati kubadwa.”’ (Juwau 1:29, 30) Napo Juwau akhali mkulu kuposa Jezu, iye akhadziwa kuti Jezu akhalipo kale ninga munthu wauzimu kudzulu pomwe Juwauyo akhanati kubadwa.

Pomwe pakhadasala midzinga ming’ono-ng’ono kuti Jezu abatizidwe, Juwau akhatsimikiza lini kuti Jezuyo ndiye omwe angadadzakhala Mesiya. Iye adati: ‘Inepano ndikhamudziwambo lini, ndipopa ndabwera kudzamubatiza m’madzi, kuti adziwike mu Jirayeri.’—Juwau 1:31.

Tenepo Juwau adafotokozera abveseri wace bzomwe bzidacitika pomwe iye akhabatiza Jezu kuti: ‘Ndidawona mzimu unkupolika kucokera kudzulu ninga nkhangaiwa ucipitiriza kukhala pa iye. Inepano ndikhamudziwa lini, koma Omwe adandituma kudzabatiza m’madzi adandiuza kuti: “Ule omwe un’dzawona mzimu unkumumbutha ucikhala pa iye, umweyo ni omwe an’batiza na mzimu wakucena.” Ndipo ine ndidawona bzimwebzo, ndicicitira umboni bwakuti umweyu ni Mwana wa Mulungu.’—Juwau 1:32-34.

Mangwana yace Jezu adayenda kwa Juwau ndipo pa nthawe imweyo Juwauyo akhana anyakupfunza wace awiri. Ndipo iye adalewa kuti: ‘Onani Mwana wa Bira wa Mulungu!’ (Juwau 1:36) Pamwepo, anyakupfunza awiri wa Juwau Batista adakhala ateweri wa Jezu. M’bodzi wa iwo akhali Andereya. Waciwiriyo dzina lace akhali Juwaumbo, ndipo ndiye omwe adanemba bzakucitikabzi. Bzinkuwoneka kuti Juwauyu akhali m’bale wace wa Jezu thangwe akhali mwana wa Salome. Ndipo Salomeyo akhali m’bale wa Mariya ndipo mwamuna wace akhali Zebedeu.

Pomwe adazungunuka, Jezu adawona Juwau na Andereya akhamutewera, ndipo adawabvuza kuti: ‘Kodi munkunyang’ana ciyani?’

Iwo adati: ‘Rabi, munkukhala kuponi?’

Jezu adawatawira kuti: ‘Bwerani, ndipo mun’dzawona.’—Juwau 1:37-39.

Zikhali nthawe zinai za kumaulo, ndipo Andereya na Juwau adakhala na Jezu nsiku yenseyo. Ndipo Andereya akhakomedwa kwene-kwene mpaka adakanyang’ana m’bale wace Simau omwe akhacemeredwambo kuti Pedru, ndipo adamuuza kuti: ‘Ifepano tagumana Mesiya.’ (Juwau 1:41) Andereya adamutenga Pedruyo, aciyenda naye komwe kukhana Jezu. Patsogolo pace nkhaniyi imbalatiza kuti Juwau adakanyang’anambo m’bale wace Tiyago, aciyenda nayembo komwe kukhana Jezu; koma Juwau alibe kunemba bza nkhani imweyi.

Mangwana yace Jezu adawona Firipi omwe adacokera ku Betsaida. Komwe kukhali kufupi na  nyanza ya Galileya ndipo ni komwe akhakhalambo Andereya na Pedru. Tenepo, Jezu adacemera Firipi acimuuza kuti: ‘Khala mteweri wangu.’—Juwau 1:43.

Patsogolo pace Firipi adawona Nataniyeri omwe akhacemeredwambo kuti Bartolomeu, ndipo adamuuza kuti: ‘Tamugumana ule omwe Mozeji adanemba bza iye m’cakutonga na ule omwe apolofeta adamunembambo. Iye ambacemeredwa Jezu mwana wa Zuze, wa ku Nazaleti.’ Nataniyeri adadabwisika ndipo adauza Firipi kuti: ‘Kodi mu Nazareti mungacoke cinthu cabwino?’

Firipi adamutawira kuti: ‘Tiyende ukawone.’ Pomwe Jezu adawona Nataniyeri ankufendera iye adati: ‘Onani m’Jirayeri wacadidi, omwe mwa iye mulibe cinyengo.’

Ndipo Nataniyeri adabvunza kuti: ‘Kodi mwandidziwa tani?’

Jezu adamutawira kuti: ‘Pomwe Firipi akhanati kukucemera, pomwe iwepo ukhali pansi pa muti wa mkuyu ule, ine ndidakuwona.’

Nataniyeri adadabwa ndipo adalewa kuti: ‘Rabi, imwepo ndimwedi mwana wa Mulungu, imwepo ndimwe Mambo wa Jirayeri.’

Ndipo Jezu adamubvunza kuti: ‘Kodi iwepo wakhulupira thangwe ndakuuza kuti ndidakuwona pomwe ukhali pansi pa mkuyu? Iwepo un’dzawona bzinthu bzikulu kuposa bzimwebzi.’ Patsogolo pace Jezu adalewa kuti: ‘Ndinkukuuzani mwakutsimikiza kuti: Imwepo mun’dzawona kudzulu kwakufunguka ndipo wanjo wa Mulungu acimbakwira na kumbabulukira Mwana wa Munthu.’—Juwau 1:45-51.

Pambuyo pa bzimwebzi, Jezu na anyakupfunza wace wakuyambirirawo adacoka ku mkulo wa Joridano, ndipo adacita ulendo bwa kuyenda ku Galileya.