Pambuyo pakucita paskwa ya mu 30 EC, Jezu pabodzi na anyakupfunza wace adacoka ku Jeruzalemu. Tenepo, iwo alibe kubwerera lungalunga kuyenda kumuyi kwawo ku Galileya. Iwo adayamba kuyenda ku mzinda wa ku Judeya, komwe adakabatiza wanthu azinji. Juwau Batista akhacitambo basa limweri kwa gole lathunthu, ndipo anyakupfunza wace akhanaye pabodzi, pinango ku mkulo wa Joridano.

Jezu alibe kubatiza munthu ali-wense koma anyakupfunza wace ndiwo akhacita bzimwebzi mwa kutsogoleredwa na iye. Pa nthawe ya utumiki bwa Jezu, Jezuyo pabodzi na Juwau akhapfunzisa Ajuda omwe adakungula pikado zawo pakuphonyera mpangano wa Cakutonga ca Mulungu.—Mabasa 19:4.

Koma anyakupfunza wa Juwau adayamba kumbacitira nsanje Jezu ndipo adauza Juwauyo kuti: ‘[Jezu] munthu omwe mukhanaye ule . . . iyembo ankubatiza ndipo wanthu wense ankuyenda kwa iye.’ (Juwau 3:26) Tsono Juwau alibe kumucitira nsanje. Iye akhakondwa na kuthumizirika kwa basa la Jezu ndipo akhafuna kuti anyakupfunza wace akondwembo. Tenepo iye adawakumbusa kuti: ‘Imwepo ndimwe mboni zangu pa mafala yomwe ndidalewa yakuti: “Ine ndine lini Kristu, koma ndidatumizidwa kutsogolo kwace.”’ Pakufuna kuthandiza anyakupfunza wacewo kubvesesa nkhani imweyi iye adafotokoza there iri: ‘Omwe ana namwali wacikazi ni namwali wacimuna. Koma xamwali wa namwali wacimuna akakhala ali pafupi, acibva fala la namwali wacimunayo, ambakhala wakukondwa kwene-kwene. Ndipopa cikondweso cangu cakuladi.’—Juwau 3:28, 29.

Pambuyo pa minyezi ming’ono-ng’ono, Juwau omwe akhali ninga mwanzace wa namwali, akhakondwa pakuthandiza anyakupfunza wace kuti amudziwe Jezu. Winango wa anyakupfunza wa Juwau adayamba kutewera Jezu ndipo na kupita kwa nthawe adadzozedwa na mzimu wakucena. Juwau akhafuna kuti anyakupfunza wace omwe akhanawowo atewerembo Jezu. Cakulinga ca Juwau cikhali cakufungula njira ya utumiki bwa Kristu. Ndipopa iye adalewa kuti: ‘Iye an’funika kuyenda acithumizirika koma ine ndin’funika kuyenda ndicicepa.’—Juwau 3:30.

Juwau munango, omwe adakhala nyakutewera wa Jezu wakuyambirira, patsogolo pace adanemba bza komwe Jezu adacokera na udindo bukulu bomwe akhanabo pa kuthandiza wanthu kuti adzapulumuke. Iye adati: ‘Wakucokera kudzulu ngwakuposa winango wense. . . . Baba ambafuna mwana wace ndipo adapereka bzense m’manja mwace. Ule omwe an’khulupira Mwanayo ana moyo wakusaya kumala, omwe an’khulupira lini Mwanayo an’dzaugumana lini moyo, koma ukali bwa Mulungu bun’dzakhala pa iye.’ (Juwau 3:31, 35, 36) Cimweci ni cadidi cakufunika kwene-kwene kuti wanthu acidziwe.

Pakanati kupita nthawe itali kucokera pomwe Juwau Batista adalewa kuti basa lace likhafunikira kucepa, iye adamangidwa na Mambo Herode. Herodeyo adatenga mkazi wa m’bale wace Firipi, omwe akhacemeredwa Herodia. Pomwe Juwau adamutsimula na bzomwe adacitabzo, Herode adamuyikha m’kawoko. Pomwe Jezu adadziwa kuti Juwau ali m’kawoko, iye pabodzi na anyakupfunza wace adacoka ku Judeya ‘aciyenda ku Galileya.’—Mateu 4:12; Marko 1:14.