Pakhadapita nsiku zitatu kucokera pomwe Nataniyeri adakhala m’bodzi wa anyakupfunza wakuyambirira wa Jezu. Jezuyo pabodzi na anyakupfunza wace winango, adayenda ku mzinda wa kumpoto kwa Galileya komwe iwo adabadwira. Koma cakulinga cawo cikhali ca kukafika ku cigawo ca Kana komwe Nataniyeri adabadwira. Cigawo cimweci cikhali ku mapiri ya kumpoto kwa Nazaleti, komwe Jezu caiyeyo adakulira. Iwo adacemeredwa kuti akagumanike ku malowozi yomwe yadacitika ku Kana.

Mai wace wa Jezu akhalipombo ku malowoziko. Pakuti Mariya akhali xamwali wa wanthu omwe akhalowolanawo, iye akhathandiza mabasa mazinji pa malowozipo. Tenepo, Mariyayo adazindikira kuti pakhana cinthu cinango comwe cikhaperewera kuti wanthu omwe akhadacemeredwawo amwe, ndipo Mariyayo adauza Jezu mwakamfulumize kuti: ‘Vinyu yawamalira.’—Juwau 2:3.

Pakulewa mafala yamweya, Mariya akhafuna kuti Jezu awathandize. Tsono, Jezu adawatawira kuti: ‘Inepano na imwepo tinabzo basa lanyi bzimwebzi?’ (Juwau 2:4) Jezu ni Mambo wakusankhulidwa na Mulungu, ndipopa ni pai wace wa kudzulu okha omwe akhafunika kumuuza bzakucita, sikuti wadzinza ayai axamwali wace. Mwanzeru, Mariya adayisiya nkhaniyi m’manja mwa mwana wace, ndipo adauza wanthu omwe akhatumikira pa malowoziwo kuti: ‘Citani ciri-cense comwe akuuzenico.’—Juwau 2:5.

Pakhana mitsuko yakukwana mitanthatu, ndipo m’tsuko uli-wense ukhapita malitru 40 ya madzi. Jezu adauza wanthu omwe akhaphata basa pa malowozipo kuti: ‘Dzazani madzi m’mitsukoyi.’ Patsogolo pace adawauza kuti: ‘Tsapano tungani pang’ono mukapase nyakunyang’anira madyoya.’—Juwau 2:7, 8.

Nyakunyang’anira madyoyo adadabwa kwene-kwene pomwe adalawidza vinyuyo thangwe ikhakoma kwene-kwene, tsono iye akhadziwa lini kuti wakonzedwa mwakudabwisa. Tenepo adacemera mwamuna omwe akhacita malowoziyo, ndipo adamuuza kuti: ‘Munthu ali-wense ambayamba kupereka vinyu yabwino, ndipo wanthu akaledzera, ni pomwe ambapereka yakusaya kukoma. Tsono iwepo wakoya vinyu yabwinoyi mpaka pano.’—Juwau 2:10.

Cimweci cikhali cakudabwisa cakuyamba comwe Jezu adacita. Pomwe anyakupfunza wakuyambirira wa Jezu adawona cakudabwisa cimweci, cikhulupiro cawo pa Jezu cidathumizirika. Patsogolo pace Jezu, mai wace na azibale wace adanyamuka, aciyenda ku Kafarinaumu, mzinda omwe ukhali kumadokero kwa nyanza ya Galileya.