Pomwe adacoka ku Judeya, Jezu pabodzi na anyakupfunza wace adayenda kumpoto kwa Galileya ndipo adapita na m’cigawo ca Samariya. Iwo akhadaneta kwene-kwene na ulendobo. Ndipo ca ku masikati adayima kuti apume pafupi na mzinda wa Sikari pa mcera omwe Djakobi adacera ayai adacita kuceresa, acilipira kwa magole mazinji m’mbuyomu. Ndipo mpaka pano, mcerayo umbagumanika pafupi na mzinda wa Nablus.

Pomwe Jezu akhapuma pafupi na mcerayo, anyakupfunza wace adayenda ku mzinda wa pafupi kuti akagule cakudya. Anyakupfunzawo atacoka, mkazi wacisamariya adafika kuti atunge madzi. Ndipo Jezu adamuuza kuti: ‘Ndipasembo madzi yakumwa.’—Juwau 4:7.

Ajuda na Asamariya akhabverana lini thangwe ra ciwengo ca kale-kale comwe cikhalipo pakati pawo. Tenepo mkaziyo adadabwa kwene-kwene ndipo adabvunza Jezu kuti: ‘Pakuti imwepo ndimwe Mjuda, n’thangwe ranyi mukundikumbira madzi yakumwa napo ndine mkazi wacisamariya?’ Jezu adatawira mkaziyo kuti: ‘Ungadadziwa mphaso yafovolo ya Mulungu na ule omwe ankukuza kuti: “Ndipasembo madzi yakumwa,” ungadamukumbira iye ndipo angadakupasa madzi ya moyo.’ Mkaziyo adalewa kuti: ‘Mbuya imwepo mulibe combo cakutungira madzi, ndipo mcerayu ngwakuzika. Kodi madzi yamoyoyo muniyatenga kuponi? Kodi imwepo ndimwe mkulu kuposa baba wathu Djakobi, ule omwe adatipasa mcerayu omwe akhamwa iye, wana wace pabodzi na ng’ombe zace?’—Juwau 4:9-12.

Jezu adalewa kuti: ‘Ali-wense omwe animwa madzi aya, an’dzabva pomwe nyota. Koma omwe an’dzamwa madzi yomwe inepano ndimupase, an’dzabva lini pomwe nyota ne napang’onopo. Ndipo madzi yomwe ndin’dzamupasayo yan’dzasanduka nsansa ya madzi yakucokera mwa iye, yakupasa moyo wakusaya kumala.’ (Juwau 4:13, 14) Napo Jezu akhadaneta, koma akhafuna kuuza mkazi wacisamariyayo mafala ya cadidi yomwe yangadamuthandiza kugumana moyo.

Mkaziyo adalewa kuti: ‘Mbuya ndipaseni madzi yamweyo, kuti ndileke kudzabva pomwe nyota na kuti ndileke kudzabwera pomwe kuno kudzatunga madzi.’ Pamwepo, Jezu adacinja, nkhani acimuuza kuti: ‘Ndoko ukacemere mwamuna wako ubwere naye kuno.’ Mkaziyo adamutawira kuti: ‘Ndiribe mwamuna.’ Tsono mkaziyo adadabwa na bzomwe Jezu akhalewa bza iye, ndipo Jezuyo adati: ‘Walewa cadidi kuti, “Ndiribe mwamuna.” Pakuti ukhadalowodwa na amuna axanu, ndipo mwamuna omwe unaye tsapano ngwako lini.’—Juwau 4:15-18.

Bzomwe Jezu adalewabzo bzidacitisa mkaziyo kuzindikira nfundo inango yakufunika kwene-kwene ndipo adalewa mwakudabwa kuti: ‘Mbuya ndazindikira kuti ndimwe mpolofeta.’ Patsogolo pace mkaziyo adalatiza kuti akhafunadi kulinga bzinthu bzauzimu: Thangwe iye adapitiriza kulewa kuti: ‘Abereki wathu [Asamariya] akhanamata m’phiri iri [phiri la Gerizimu, lomwe likhali pafupi na kumwekule], koma imwepo mumbalewa kuti Jeruzalemu ndiyo m’mbuto yomwe wanthu an’funika kumbanamatira.’—Juwau 4:19, 20.

 Tenepo, Jezu adamufotokozera kuti mbuto yakunamatira iribe basa. Jezuyo adati: ‘In’dzafika nthawe yomwe imwepo mun’dzanamata lini pomwe Baba ne m’phiri iri ne ku Jeruzalemu.’ Patsogolo pace adamuuza pomwe mkaziyo kuti: ‘Nthawe in’dzafika, mwakuti njimweino, pomwe anyakunamata wacadidi an’dzanamata Baba mu mzimu na cadidi, pakuti Babayo ankunyang’ana wanthu ninga amwewo kuti am’namate.’—Juwau 4:21, 23, 24.

Bzomwe Baba wa Jezu ambafuna kwa wanthu omwe ambamunamata ni mbuto lini koma ni  bzomwe ambacita pakumunamatapo. Mkaziyo adadabwa ndipo adalewa kuti: ‘Ndikudziwa kuti Mesiya an’dzabwera, wakucemeredwa Kristu. Umweyo akadzabwera an’dzatifotokozera bzinthu bzense padeca.’—Juwau 4:25.

Patsogolo pace Jezu Adafotokoza cadidi cakufunika kwene-kwene, iye adati: ‘Munthu umweyo ndinepano omwe ndinkulewalewa nawe.’ (Juwau 4:26) Ndokumbukirani bzimwebzi! Iye akhali mkazi omwe adabwera kudzatunga madzi. Tsono Jezu adamudekera mtima kwene-kwene. Adamuuza bzinthu bzomwe akhanati kale kuuza munthu ali-wense—kuti iye ndiye Mesiya.

Anyakupfunza wa Jezu adafika na cakudya kucokera ku Sikari. Iwo adamuwona akali pa mcera wa Djakobi ule, koma tsapano akhaceza na mkazi wacisamariya. Pomwe anyakupfunzawo adafika, mkaziyo adasiya mtsuko wace wa madzi, aciyenda mu mzinda wa Sikari.

Pomwe akhali mu mzindamo, mkaziyo adafotokozera wanthu bzinthu bzense bzomwe Jezu adamuuza. Mwakutsimikiza, iye adawauza kuti: ‘Tiyendeni mukawone munthu omwe wandiuza bzense bzomwe ndikhacita.’ Patsogolo pace, pinango kuti iwo akhulupire iye adawabvunza kuti: ‘Kodi umweyu angakhale lini Kristu?’ (Juwau 4:29) Mbvunzo umweyu ukhali wakufunika kwene-kwene thangwe wanthu akhafuna kudziwa bza nkhani imweyi kuyambira mu nthawe ya Mozeji. (Bzakutonga 18:18) Bzimwebzi bzidacitisa wanthu wa mu mzindawo kufunisisa kukamuwona okha Jezuyo na maso yawo.

Pomwe bzimwebzi bzikhacitika, anyakupfunzawo adakumbira Jezu kuti adye cakudya comwe akhadabweresaco. Koma iye adawauza kuti: ‘Ndinaco cakudya comwe imwepo mun’cidziwa lini.’ Anyakupfunzawo adadabwa na bzimwebzi, ndipo adayamba kumbabvunzana okha-okha kuti: ‘Kodi alipo munthu omwe amubweresera cakudya?’ Jezu mwakudeka mtima  adawafotokozera anyakupfunza wacewo thandauzo la mafala yamweya. Iye adati: ‘Cakudya cangu ni kucita kufuna kwa ule omwe adandituma na kumaliza basa lace.’—Juwau 4:32-34.

Jezu akhalewa lini bza basa lakubvuna mbeu zacadidi lomwe likhafunika kucitika kutasala minyezi minayi. M’mbuto mwace, iye akhalewa bza basa la kubvuna mwauzimu pomwe adati: ‘Nyang’anisani m’mindamu, imo mwacena kale ndipo mun’funika kubvunidwa. Ndipo tsapanopapa wakubvuna ankutambira kale malipiro ndipo ankutsonkhanisa bzisapo ku moyo wakusaya kumala, kuti nyakubzala mbeu na nyakubvuna wense apfatsire pabodzi.’—Juwau 4:35, 36.

Bzinkuwoneka kuti Jezu akhadziwa kale bzomwe bzingadacitika pambuyo pakupalizira mkazi wacisamariya ule. Wanthu azinji wa ku Sikari adakhulupira Jezu thangwe ra bzomwe mkazi wacisamariyayo adawauza kuti: ‘Iye wandiuza bzense bzomwe ndimbacita.’ (Juwau 4:39) Pomwe wanthu wa ku Sikariwo adafika pa mcera pomwe pakhana Jezupo, iwo adamukumbira kuti akhale kumweko kwa nsiku zizinji. Jezu adabvuma mkumbiro wawoyo ndipo adakhala ku Samariyako kwa nsiku ziwiri.

Asamariyawo akhamutetekera Jezu, ndipo azinji adamukhulupira. Iwo adauza mkaziyo kuti: ‘Ifepano tinkukhulupira lini thangwe ra mafala yako yokha yale nee, pakuti tabzibvera tekha ndipo tadziwadi kuti munthuyu ni mpulumusi wa dziko.’ (Juwau 4:42) Kulewa cadidi, bzomwe mkazi wacisamariyayo adacita, ni ciratizo ca bwino ca momwe tingathandizire wanthu winango kudziwa bza Kristu. Timbacite bzomwe tingakwanise kuti timbalewelewe mafala yomwe yangacitise wanthu kufuna kupfunza bzizinji.

Bzinkuwoneka kuti Jezu adagumana na mkazi wacisamariyayo mwezi wa Novembro ayai Dezembro. Tinkulewa tenepo thangwe Jezu adalewa kuti kwasala minyezi minayi kuti basa lakubvuna liyambe. Pale Jezu pomwe adagumana na mkazi wacisamariya ule akhacokera ku paskwa ya mu 30 EC, ndipo patsogolo pace adayenda ku Judeya komwe adakapfunzisa na kubatiza wanthu. Patsogolo pace iwo adayenda komwe adabadwira kumpoto kwa Galileya. Kodi kumweko adakagumana na ciyani?