Pambuyo pa Gabriyeli kuuza Mariya kuti an’dzabereka mwana omwe an’dzacemeredwa Jezu ndipo an’dzatonga ninga Mambo kwa muyaya, Mariya adabvunza kuti: ‘Kodi bzimwebzi bzingacitike tani, pakuti cibadwiremo ndikanati kugona na mwamuna?’—Luka 1:34.

Gabriyeli adamutawira kuti: ‘Mzimu wakucena un’dzabwera pa iwepo, ndipo mphanvu ya wakudzulu in’dzakumpsinkha. Pa thangwe limweri, omwe an’dzabadwayo an’dzacemeredwa kuti wakucena, mwana wa Mulungu.’—Luka 1:35.

Pinango Gabriyeli akhafuna kuthandiza Mariya kukhulupira, pomwe adati: ‘Ndipo dziwa kuti, m’bale wako Elizabeti, omwe wanthu ambamulewa kuti ni ngomwa, an’dzakhalambo na mwana wacimuna mu ukalamba bwace, ndipo uno ni mwezi wa citanthatu. Bzomwe Mulungu an’lewa, palibe comwe cingatazike.’—Luka 1:36, 37.

Mariya adakhulupira bzomwe Gabriyeli adamuuzabzo, ninga momwe tinkuwonera mu mtawiro waceyu. ‘Ine ndine kapolo wa Yahova! Bzomwe mwalewabzo bzicitike kwa ine.’—Luka 1:38.

Pomwe Gabriyeli adamusiya, Mariya adakonzekera kuti akazungire Elizabeti omwe akhakhala na mwamuna wace Zakariya, kufupi na ku Jeruzalemu ku mzinda wa kumapiri kwa Judeya. Kucokera komwe Mariya akhakhala mpaka ku Nazaleti, bukhali ulendo bwakufamba nsiku zitatu ayai zinayi.

Tenepo, Mariya adafika ku mui kwa Zakariya. Pomwe adapita m’nyumba, iye adamusa m’bale wace Elizabeti. Pamwepo Elizabeti adadzazidwa na mzimu wakucena, ndipo adauza Mariya kuti: ‘Ndiwe wakusimbidwa pakati pa akazi wense, ndipo n’cakusimbidwambo cisapo ca m’mimba mwako. Kodi bzakwanisika tani kukhala na mwayi umweyu, wakuti mayi wa mbuya wangu abwere kuna ine? Pakuti pomwe ndabva mafala yako yakundimusa m’makutu mwangumu, mwana omwe ali m’mimba mwanguyu amoga na cikondweso.’—Luka 1:42-44.

Tenepo Mariya adatawira mwakukondwa kuti: ‘Moyo wangu unkutumbiza Yahova, ndipo mzimu wangu ungaleke lini kukondwa kwene-kwene na Mulungu, mpulumusi wangu, thangwe wawona kubzicepswa kwa kapolo wace. Ndipo onani! Kuyambira tsapano mibwadwo yense in’dzalewa kuti ndine wakusimbidwa, thangwe rakuti Wamphanvuyo wandicitira bzinthu bzikulu kwene-kwene.’ Onani kuti napo Mariya adapasidwa mwayi ukuluyi, iye adatumbiza Yahova mwakulewa kuti: ‘Ndipo dzina lace ndakucena, ndipo ku mibadwo na mibadwo nsisi zace zimbakhala kwa omwe ambamugopa.’—Luka 1:46-50.

Mariya adapitiriza kutumbiza Yahova na mafala yakufuliziridwa yomwe ni polofesiya yakuti: ‘Wacosa wanthu wa mphanvu pa mipando ya umambo, ndipo wakuza wanthu wakusauka; wakhutisa wanthu omwe akhana njala na bzinthu bza bwino, ndipo wanthu omwe akhana cuma awabweza cimanja-manja. Iye wathandiza mtumiki wace Jirayeri, pakukumbukira piciro lace lakuti an’dzalatiza nsisi kwa muyaya, ninga momwe adauzira abereki wathu wa kale-kale, Abalahamu na mbewu yace kwa muyaya.’—Luka 1:51-55.

Mariya adakhala na Elizabeti pafupi-fupi minyezi mitatu ndipo mpsakupenukisa lini kuti iye akhamuthandiza mabasa yakusiyana-siyana pomwe ikhadasala midzinga yakucepa kuti Elizabeti abereke. Bzikhali bwino kwene-kwene azimai awiri wakukhulupirikawa omwe adatenga pathupi mwakuthandizidwa na Mulungu kukhalira pabodzi pa nthawe ya cikondweso na yakupambulika kwene-kweneyi!

Cakudabwisa n’cakuti Jezu adayamba kulemekezedwa napo akhanati kubadwa. Elizabeti adamucemera kuti ‘mbuya wangu’ ndipo mwana omwe akhali m’mimba mwa Elizabetiyo ‘adamoga na cikondweso.’ Bzimwebzi bzikhali bzakusiyaniratu na bzomwe wanthu winango adadzacitira Mariya pabodzi na mwana wace, ninga momwe tiniwonera kutsogoloku.