Ku dera la ku mabvadzuwa kukhana amuna winango omwe akhakhulupira nyenyezi. Iwo akhakhulupira kuti angadakwanisa kudziwiratu bzomwe bzingadacitika pa moyo wa munthu kokha mwa kundowona momwe nyenyezi zinkufambira. (Zaiya 47:13) Tsono nsiku inango ali kumui kwawo ku mabvadzuwa, iwo adawona ‘nyenyezi’ ndipo adayamba kuitewera. Nyenyeziyo idawatsogolera ku Jeruzalemu sikuti ku Beremu ndipo ulendobo bukhali butali kwene-kwene.

Pomwe adafika ku Jeruzalemu, anyakupfunza nyenyeziwo adabvunza kuti: ‘Kodi ali kuponi mambo wa Ajuda omwe wabadwa tsapanopa? Pakuti tawona nyenyezi yace pomwe tikhali ku mabvadzuwa, ndipo tabwera kudzamunamata.’—Mateu 2:1, 2.

Pomwe Herode mambo wa ku Jeruzalemu adabva bzimwebzi, adakalipa kwene-kwene. Tenepo iye adacemeresa akulu-akulu wa wansembe na akulu-akulu wa bzipembedzo bzacijuda, aciwabvunza kuti nkuponi komwe Kristu akhadabadwira. Mwakuphatisa basa bzinembo iwo adatawira kuti: ‘Ku Beremu.’ (Mateu 2:5; Mikeya 5:2) Pakubva bzimwebzi, Herode adacemeresa anyakukhulupira nyenyezi wale mwakabise-bise, aciwauza kuti: ‘Ndokoni mukamunyang’ane mwanayo mwakusamala ndipo mukakamugumana, mudzandidziwise kuti inepano, ndidzayendembo kukamunamata.’ (Mateu 2:8) Tsono Herode cakulinga cace cikhali cakuti akawone tcecero, acilipha!

Anyakupfunza nyenyezi wale atandocoka, padacitika cinthu cakudabwisa. ‘Nyenyezi’ yomwe ikhawatsogolera kucokera kumabvadzuwa ire, idawonekera pomwe. Bzidawonekeratu kuti ikhali lini nyenyezi yacirengedwe koma idacita kutumizidwa kuti iwatsogolere. Nyenyeziyo idawatsogolera mpaka kukaima pamui pomwe Zuze na Mariya akhakhala pabodzi na mwana wawo.

Pomwe anyakupfunza nyenyeziwo adapita m’nyumbamo, iwo adawona Mariya na mwana wace—Jezu. Pamwepo, anyakupfunza ‘nyenyeziwo’, adamugodamira. Ndipo iwo adamupasa mphaso za oro, nsonono yakununcira, na mira. Pakubwerera, iwo akhafuna kupita na kwa Herode, tsono usiku Mulungu adawacenjeza kutulo kuti aleke kucita bzimwebzo. Tenepo, iwo adabwerera kwawo na njira inango.

Kodi munkukumbuka kuti ni mbani omwe adatumiza ‘nyenyezi’ yomwe ikhatsogolera wanthuwo? Kumbukirani kuti iyo iribe kuwatsogolera lunga-lunga kuyenda ku Beremu komwe kukhana Jezu. Koma cakuyamba idawatsogolera ku Jeruzalemu, komwe adakalewalewa na mambo Herode omwe akhafuna kupha Jezu. Ndipo mambo Herodeyo angadacitadi bzimwebzo bzingadakhala kuti Mulungu alibe kuipitira nkhaniyi, mwakucenjeza anyakupfunza nyenyezi wale kuti aleke kukamuuza komwe kukhana Jezu. Bzinkuwonekeratu kuti omwe adatumiza nyenyezi ire akhali nyamadulanthaka wa Mulungu, Sathani omwe akhafuna kuti Jezu aphedwe, ndipo iye adaphatisa basa njira imweyi kuti akwanirise cakulinga cace.