Pakhadapita magole 17 kucokera pomwe Jezu akhacita mibvunzo apfunzisi mu templo pomwe akhana magole 12 yakubadwa. Tsapano kukhali kuphampha kwa gole la 29 EC. Wanthu azinji akhalewalewa bza Juwau m’bale wace wa Jezu, omwe adapalizira ku mbali yense ya kumadokero kwa Mkulo wa Joridano.

Wanthu akhadabwa na kawonekedwe ka Juwau pabodzi na kalalewedwe kace. Bzakubvala bzace bzikhadakonzedwa na maukuse ya ngamira ndipo m’ciuno mwace akhadamanga na bande la khanda. Bzakudya bzace bzikhali dzombe na uci bwa m’thengo. Kodi ni mafala yanyi yomwe iye akhapalizira? Ni mafala yakuti: ‘Kungulani, pakuti Umambo bwakudzulu bwafendera.’—Mateu 3:2.

Mafala yomwe Juwau akhapalizirayo yakhatokonya wanthu omwe akhamubveserawo. Azinji wa iwo adawona kufunika kwa kukungula, ndipo adacita bzimwebzo mwa kucinja, acisiyiratu bzicito bzawo bzakuipa. Omwe akhabwerawo akhacokera ku ‘Jeruzalemu, ku Judeya kwense pabodzi na midzi yense yapafupi na mkulo wa Joridano.’ (Mateu 3:5) Wanthu azinji omwe adabwera kwa Juwau adakungula. Iye akhawabatiza mwa kuwamiza m’madzi ya mu mkulo wa Joridano. Thangwe ranyi?

Iye akhabatiza wanthu ninga cizindikiro cakuti wanthuwo akhadakungula pikado zawo kucokera pansi pa mtima ndipo adacita bzimwebzi thangwe ra kubvera cakutonga ca Mulungu. (Mabasa 19:4) Koma ni wense lini omwe adakungula mwacadidi. Pomwe atsogoleri winango wa bzipembedzo, ninga Afarizeu na Asaduki, adayenda komwe kukhana Juwau, iye adawacemera kuti: ‘Wana wa nyokamwe.’ Ndipo adalewa pomwe kuti: ‘Mubereke bzisapo bzakulatiza kuti mwakungula. Lekani kumbabzinamiza kuti: “Tinaye baba wathu Abalahamu.” Pakuti ndinkukuuzani kuti Mulungu angamupase wana Abalahamu kucokera pa minyalayi. Mbadzo yaikhidwa kale pa mizi ya miti. Tenepo, muti uli-wense omwe unibereka lini bzisapo bzabwino unigwatidwa ucithusidwa pamoto.’—Mateu 3:7-10.

Thangwe rakuti Juwau adapalizira mafala yamphanvu kwene-kwene, ndipo wanthu adakhulupira acibatizidwa, wansembe na Alevi adatumidwa kuti akamubvunze kuti: ‘Kodi iwepo ndiwe mbani?’

Juwau adawatawira kuti: ‘Ine ndine lini Kristu.’

Ndipo iwo adamubvunza pomwe kuti: ‘Tsono ndiwe mbani? Kodi ndiwe Eliya?’

Iye adawatawira kuti: ‘Ne ndine lini.’

Tsono, kodi ‘ndiwe mpolofeta?’ Pamwepa adakumbuka bza mpolofeta omwe Mozeji akhadaleweratu kuti an’dzabwera.—Bzakutonga 18:15, 18.

Juwau adawatawira kuti ‘Ne!’

Koma iwo adapitiriza kumubvunza kuti: ‘Ndiwe mbani ndipo? Tin’funa kudziwa kuti tikakwanise kukatawira wanthu omwe atituma. Kodi iwepo umbabziti ndiwe mbani maka-maka?’ Juwau adawatawira kuti: ‘Ndine mafala ya munthu omwe ambakuwa mu dambo kuti: “Lungamizani njira ya Yahova,” ninga momwe mpolofeta Zaiya adalewera.’—Juwau 1:19-23.

Iwo adamubvunza pomwe kuti: ‘Penu iwepo ndiwe lini Kristu, ne Eliya ne mpolofeta, thangwe ranyi unkubatiza wanthu?’ Iye adawatawira mwakubveka bwino kuti: ‘Ine ndimbabatiza m’madzi. Pakati panu paima munthu munango omwe imwepo mumbamudziwa lini. Iye ndiye omwe ankubwera m’mbuyo mwangumu.’—Juwau 1:25-27.

Inde, Juwau adadziwa kuti iye akhakonza njira mwa kukonzekeresa mitima ya wanthuwo kuti adzakwanise kutambira Mesiya, omwe an’dzakhala Mambo. Pakulewa bza mesiyayo Juwau adati: ‘Omwe ankubwera m’mbuyo mwangu, ana  mphanvu kuposa inepano, ndipo ndiribe kuthemera kumukhundula nsapano zace.’ (Mateu 3:11) Tenepo, Juwau adalewa pomwe kuti: ‘Omwe ankubwera m’mbuyo mwanguyu wandipitirira ine, thangwe iye adakhala ine ndikanati kubadwa.’—Juwau 1:15.

Tenepo mafala yomwe Juwau adapalizira yakuti: ‘Kungulani pakuti Umambo bwakudzulu bwafendera,’ yakhali yakuthemera kwene-kwene. (Mateu 3:2) Mafalaya yadacenjeza wanthu wense kudziwa kuti utumiki bomwe Mambo wakusankhulidwa na Mulungu omwe ni Jezu Kristu bwasala pang’ono kuyamba.